ପଦ୍ମପୁର, ୧।୧୦ (ଡି.ଏନ.ଏ.)-ଆମେରିକାର କଲରାଡୋ ବିଶ୍ୱବିଦ୍ୟାଳୟରେ ଉଚ୍ଚତର ଗବେଷଣା ପାଇଁ ମନୋନୀତ ହୋଇଛନ୍ତି ଭଦ୍ରକ ଜିଲା ସଦର ବ୍ଲକ ଅଧୀନ ସାବରଙ୍ଗ ଗ୍ରାମର ଐଶ୍ୱର୍ଯ୍ୟ ଅଭିଷେକ ମହାପାତ୍ର। ସେ ଅକ୍ଟୋବର ୩୧ରେ ସେଠାରେ ଯୋଗଦେଇ ଗବେଷଣା ଜାରି ରଖିବେ। ସାମ୍ପ୍ରତିକ ସ୍ଥିତିରେ ସାରା ପୃଥିବୀରେ ଶକ୍ତି ସଙ୍କଟ ଦେଖାଦେଇଛି। ସିଲିକନ ସଂଯୁକ୍ତ ସୌରଶକ୍ତିର ଊର୍ଜା ଉପରେ ତାଙ୍କର ଗବେଷଣା ପର୍ଯ୍ୟବସିତ। ଯାହା ସୌରଶକ୍ତିକୁ ୧୦ଗୁଣା ଅଧିକ କାର୍ଯ୍ୟକ୍ଷମ କରିବା ସହ ଶକ୍ତି ସଙ୍କଟର ସମାଧାନ କରି ପୃଥିବୀ ପୃଷ୍ଠକୁ ସମ୍ପୂର୍ଣ୍ଣ ପ୍ରଦୂଷଣ ମୁକ୍ତ କରିପାରିବ। ଏହି ପରୀକ୍ଷଣ ବିଭିନ୍ନ ପ୍ରଗତିଶୀଳ ରାଷ୍ଟ୍ରରେ କାର୍ଯ୍ୟକାରୀ ହୋଇସାରିଥିବା ବେଳେ ଆଗାମୀ ଦିନରେ ଭାରତରେ କାର୍ଯ୍ୟକାରୀ ହୋଇପାରିବ ବୋଲି ଅଭିଷେକ କହିଛନ୍ତି।
ଅଭିଷେକ ହେଉଛନ୍ତି ଗ୍ରାମର ସେବାନିବୃତ୍ତ ପ୍ରଧାନ ଶିକ୍ଷକ ଅରୁଣ କୁମାର ମହାପାତ୍ରଙ୍କ ପୁଅ। ବାଙ୍ଗାଲୋର ବିଶ୍ୱବିଦ୍ୟାଳୟରୁ ରସାୟନ ବିଜ୍ଞାନରେ ସ୍ନାତକୋତ୍ତର ପରେ ନିଟ୍, ସିଏସ୍ଆଇଆର୍, ଏସ୍ଆର୍ଏଫ୍ ଓ ଗେଟ୍ ଭଳି ଜାତୀୟ ମେଧା ପରୀକ୍ଷାରେ ସଫଳତା ଅର୍ଜନ କରିଥିଲେ। ବାଙ୍ଗାଲୋର ଇଣ୍ଡିଆନ ଇନ୍ଷ୍ଟିଚ୍ୟୁଟ ଅଫ୍ ସାଇନ୍ସରେ ସୌରଶକ୍ତି ଉପରେ ଗବେଷଣା କରି ପି.ଏଚ୍.ଡି ସମାପ୍ତ କରିଥିଲେ। ତାଙ୍କ ଦ୍ୱାରା ପ୍ରସ୍ତୁତ ସନ୍ଦର୍ଭ ଆନ୍ତର୍ଜାତିକ ସ୍ତରରେ ବିଭିନ୍ନ ବିଶ୍ୱବିଦ୍ୟାଳୟ ଦ୍ୱାରା ଉଚ୍ଚ ପ୍ରଶଂସିତ ହୋଇଥିଲା। ଅଧିକ ଗବେଷଣା ପାଇଁ ତାଙ୍କୁ କେମ୍ବ୍ରିଜ ବିଶ୍ୱବିଦ୍ୟାଳୟ ୟୁନାଇଟେଡ୍ କିଙ୍ଗ୍ଡମ୍, ଲଣ୍ଡନ ତରଫରୁ ଆମନ୍ତ୍ରଣ କରାଯାଇଥିଲା। ସେଠାରେ ଦୁଇବର୍ଷ ଗବେଷଣା କରିବା ପରେ ଆମେରିକାର କଲରାଡୋ ବିଶ୍ୱବିଦ୍ୟାଳୟ ଅଧିକ ଗବେଷଣା ପାଇଁ ତାଙ୍କୁ ଆମନ୍ତ୍ରଣ କରିଛି।