ବଲିଉଡ ଅଭିନେତା ଅଭିଷେକ ବଚ୍ଚନ ଏବଂ ଐଶ୍ୱର୍ଯ୍ୟା ରାୟ ବଚ୍ଚନ ଇଣ୍ଡଷ୍ଟ୍ରିର ସର୍ବଶ୍ରେଷ୍ଠ ଦମ୍ପତି ଭାବରେ ବେଶ ଜଣାଶୁଣା। ପରସ୍ପର ପାଇଁ ଉଭୟଙ୍କ ପ୍ରେମ ସ୍ପଷ୍ଟ ଭାବରେ ଦେଖାଯାଏ। ଏପରିକି ଉଭୟଙ୍କ ମଧ୍ୟରେ କୌଣସି ପ୍ରକାରର ଝଗଡ଼ା ହେବା ଖବର ଇଣ୍ଡଷ୍ଟ୍ରିରେ କେବେ ଆସିନାହିଁ। ତଥାପି, ପ୍ରତ୍ୟେକ ସ୍ବାମୀ-ସ୍ତ୍ରୀଙ୍କ ପରି କଥା କଥାରେ ଯୁକ୍ତିତର୍କ ହୋଇଯାନ୍ତି। କିନ୍ତୁ ଦୁହିଁଙ୍କ ମଧ୍ୟରେ କେବେ ବି ଅଲଗା ହେବାର ଖବର ଆସି ନଥିଲା। ମାତ୍ର ଥରେ ଦୁହିଁଙ୍କ ମଧ୍ୟରେ ଏତେ ବିବାଦ ଲାଗି ରହିଲା ଯେ, ଅଭିଷେକଙ୍କୁ ଦୁଇ ରାତି ବେଡ୍ ରୁମ ବାହାରେ ବିତାଇବାକୁ ପଡିଲା।
ଅଭିଷେକ ଏକ ସାକ୍ଷାତକାରରେ ପ୍ରକାଶ କରିଛନ୍ତି ଯେ, ଥରେ ସେ ଐଶ୍ୱର୍ଯ୍ୟାଙ୍କ କ୍ରୋଧର ଶିକାର ହୋଇଥିଲେ। ଏ ନେଇ ତାଙ୍କୁ ଦୁଇରାତି ବେଡ୍ ରୁମ୍ ବାହାରେ ବିତାଇବାକୁ ପଡିଲା।
୨୦୧୪ରେ ଯେତେବେଳେ ଅଭିଷେକ ପ୍ରୋ-କବାଡି ଲିଗ ଜିତିଥିଲେ ।ସେହି ସମୟ ମଧ୍ୟରେ ସେ ତାଙ୍କ ଦଳର ଟ୍ରେନିଂ ନେଇ ଚେନ୍ନାଇର ସତ୍ୟଭାମା ବିଶ୍ୱବିଦ୍ୟାଳୟ ଯାଇଥିଲେ। ଏହି ସମୟରେ ଅଭିଷେକ ବିଶ୍ୱବିଦ୍ୟାଳୟର ପ୍ରତିଷ୍ଠାତା କର୍ଣ୍ଣେଲ ଜେପିଆରଙ୍କୁ ଭେଟିଥିଲେ। ତାଙ୍କ କାର୍ଯ୍ୟାଳୟ ବହୁତ ଛୋଟ ଥିଲା । ଅଭିଷେକ ଦେଖିଥିଲେ ଯେ, ଜେପିଆର ଅଫିସ ଚଟାଣରେ ଅନେକ ଟ୍ରଫି ଅଛି। ଅଭିଷେକ ନିଜକୁ ସଂଯମ କରି ନ ପାରି ଜେପିଆରଙ୍କୁ ପଚାରିଥିଲେ ଯେ, ସେ କାହିଁକି ସମସ୍ତ ଟ୍ରଫିକୁ ତଳେ ରଖିଛନ୍ତି?
କର୍ଣ୍ଣେଲ ଜେପିଆର ଅଭିଷେକଙ୍କୁ ଉତ୍ତର ଦେଲେ ଯେ, ସେ ଟ୍ରଫିକୁ ତଳେ ରଖିଥିଲେ କାରଣ ସେ ପୁରସ୍କାରକୁ ତାଙ୍କ ମୁଣ୍ଡରେ ଚଢ଼ିବାକୁ ଦେଉ ନ ଥିଲେ।
ଜେପିଆଇର ଏହି ବିବୃତ୍ତିରେ ଅଭିଷେକ ଅତ୍ୟନ୍ତ ପ୍ରଭାବିତ ହୋଇଥିଲେ ଏବଂ ସେ ଘରକୁ ଯାଇ ଐଶ୍ୱର୍ଯ୍ୟା ଏବଂ ତାଙ୍କ ଟ୍ରଫିକୁ ଭୂମିରେ ସଜାଇଥିଲେ। ପୁରା ବେଡରୁମ୍ ଅନେକ ଟ୍ରଫିରେ ପରିପୂର୍ଣ୍ଣ ଥିଲା । ଐଶ୍ୱର୍ଯ୍ୟା ରୁମ ଭିତରକୁ ଯିବା ମାତ୍ରେ ଏଭଳି ଦୃଶ୍ୟ ଦେଖିବା ପରେ କ୍ରୋଧରେ ଲାଲ ହୋଇଗଲେ।
ଅଭିଷେକ ଏପରି କରିବାର କାରଣ ମଧ୍ୟ ଐଶ୍ୱର୍ଯ୍ୟାଙ୍କୁ କହିଥିଲେ। ମାତ୍ର ଐଶ୍ୱର୍ଯ୍ୟା ରାଗି ଯାଇଥିଲେ। ଏପରିକି ଐଶ୍ୱର୍ଯ୍ୟା ଅଭିଷେକଙ୍କୁ ବେଡ୍ରୁମରୁ ବାହାର କରି ଦେଇଥିଲେ। ଐଶ୍ୱର୍ଯ୍ୟାଙ୍କ କ୍ରୋଧ ହେତୁ ଅଭିଷେକଙ୍କୁ ଦୁଇ ରାତି ବେଡ୍ରୁମ୍ ବାହାରେ କାଟିବାକୁ ପଡ଼ିଲା। ପରେ ସବୁକିଛି ଠିକ୍ ହୋଇଥିଲା।
