ମୁମ୍ବାଇ: ନୀଳନୟନା ତଥା ବିଶ୍ୱ ସୁନ୍ଦରୀ ଐଶ୍ୱର୍ଯ୍ୟା ରାୟ ତାଙ୍କ ଫିଲ୍ମ କ୍ୟାରିୟରରେ ଦର୍ଶକଙ୍କୁ ଅନେକ ସୁପରହିଟ୍ ଫିଲ୍ମ ଭେଟି ଦେଇଛନ୍ତି। ଐଶ୍ୱର୍ଯ୍ୟା ଏମିତି ଜଣେ ଅଭିନେତ୍ରୀ ଯିଏ କି ତାଙ୍କ ବ୍ୟକ୍ତିଗତ ଜୀବନ ସହିତ ବୃତ୍ତିଗତ ଜୀବନରେ ସନ୍ତୁଳନ ରକ୍ଷା କରି ଚାଲିଥାନ୍ତି। ବିବାହ ପରେ ଐଶ୍ୱର୍ଯ୍ୟା ଯେପରି ତାଙ୍କ ପରିବାରକୁ ପରିଚାଳନା କରୁଛନ୍ତି, ତାହା ପ୍ରକୃତରେ ପ୍ରଶଂସନୀୟ। ସୋସିଆଲ ମିଡିଆରେ ଐଶ୍୍ ଅନ୍ୟ ଅଭିନେତ୍ରୀମାନଙ୍କ ପରି ଏତେ ଆକ୍ଟିଭ୍ ନୁହନ୍ତି। କିନ୍ତୁ ଯେତେବେଳେ ପରିବାରରେ ଏକ ବିଶେଷ ଉତ୍ସବ କିମ୍ବା କାହାର ଜନ୍ମଦିନ କଥା ଆସେ, ସେତେବେଳେ ସେ ସୋସିଆଲ ମିଡିଆ ପ୍ଲାଟ୍ଫର୍ମରେ ପୋଷ୍ଟ ଶେୟାର କରିବାକୁ ଆଦୌ ଭୁଲନ୍ତି ନାହିଁ। ଏବେ ଐଶ୍ଙ୍କ ଏକ ଭିଡିଓ ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି। ଏହି ଭିଡିଓରେ ସେ ତାଙ୍କ ଶାଶୁ ଜୟା ବଚ୍ଚନଙ୍କ ସହ ନଜର ଆସିଛନ୍ତି।
ଯେଉଁ ଭିଡିଓଟି ଭାଇରାଲ ହେଉଛି ତାହା ଏକ ପୁରସ୍କାର ଉତ୍ସବ ସମୟର। ଯେଉଁଥିରେ ବଚ୍ଚନ ପରିବାରର ସମସ୍ତ ସଦସ୍ୟ ଉପସ୍ଥିତ ଥିଲେ। ସେତେବେଳେ ଅଭିଷେକ ଐଶ୍ଙ୍କୁ ବିବାହ କରି ନ ଥିଲେ। ଭିଡିଓରେ ଦେଖିବାକୁ ମିଳିଛି, ଜୟା ବଚ୍ଚନ ଐଶ୍ଙ୍କୁ ମଞ୍ଚରେ ସମ୍ବୋଧିତ କରୁଛନ୍ତି। ସେ ସମସ୍ତଙ୍କ ସାମ୍ନାରେ କହିଛନ୍ତି ଯେ, ଐଶ୍ୱର୍ଯ୍ୟା ଖୁବ୍ଶୀଘ୍ର ତାଙ୍କ ପରିବାରର ଏକ ଅଂଶ ହେବାକୁ ଯାଉଛନ୍ତି। ଭିଡିଓରେ ଜୟା କହୁଛନ୍ତି, ‘ଆଜି ମୁଁ ଜଣେ ଚମତ୍କାର ଏବଂ ସୁନ୍ଦରୀ ଝିଅର ଶାଶୁ ହେବାକୁ ଯାଉଛି। ଯେଉଁ ଝିଅଟି ସମଗ୍ର ବିଶ୍ୱ ପାଇଁ ଗର୍ବ, ସମ୍ମାନ ଏବଂ ଏକ ସୁନ୍ଦର ହସ ପାଇଁ ପ୍ରସିଦ୍ଧ। ପରିବାରକୁ ସ୍ବାଗତ। ମୁଁ ତୁମକୁ ବହୁତ ଭଲପାଏ ଐଶ୍ୱର୍ଯ୍ୟା।
ଜୟାଙ୍କ କଥା ଶୁଣିବା ପରେ ଭାବପ୍ରବଣ ହୋଇ ସେଠାରେ ସମସ୍ତଙ୍କ ସାମ୍ନାରେ କାନ୍ଦିବାକୁ ଲାଗିଲେ ଐଶ୍। ଏହି ସମୟରେ ତାଙ୍କ ସ୍ବାମୀ ଅଭିଷେକ ବଚ୍ଚନ ମଧ୍ୟ ପାଖରେ ବସିଥିବାର ନଜର ଆସିଛନ୍ତି। ଐଶ୍ଙ୍କ ଏହି ପୁରୁଣା ଭିଡିଓକୁ ଦର୍ଶକମାନେ ଖୁବ୍ ପସନ୍ଦ କରିଛନ୍ତି।