ମୁମ୍ବାଇ: ବଲିଉଡ୍ରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ଐଶ୍ୱର୍ଯ୍ୟା ରାୟ ବଚ୍ଚନ କିଛି ବର୍ଷ ପରେ ପୁଣିଥରେ ବଡ ପରଦାରେ ଦେଖାଦେବେ । ଅବଶ୍ୟ ବଲିଉଡ୍ରେ ନୁହେଁ ଟଲିଉଡରେ । ହଁ ନୀଳନୟନା ଐଶ୍ୱର୍ଯ୍ୟା ଏକ ତାମିଲ ଫିଲ୍ମରେ ଅଭିନୟ କରିବାକୁ ଯାଉଛନ୍ତି । ଯାହାର ପ୍ରଥମ ପୋଷ୍ଟର ସେ ନିଜେ ସୋସିଆଲ ମିଡିଆରେ ରିଲିଜ୍ କରିଛନ୍ତି । ଏହାକୁ ଦେଖିବା ପରେ ତାଙ୍କ ପ୍ରଶଂସକମାନେ ଉତ୍ସାହିତ ହୋଇ ପଡିଛନ୍ତି । ପ୍ରଶ୍ନ ଆସୁଛି କେଉଁ ଚରିତ୍ରରେ ଐଶ ନଜର ଆସିବେ । ଖୁବଶୀଘ୍ର ଐଶ୍ୱର୍ଯ୍ୟା ‘ପୋନ୍ନିଇନ ସେଲଭମ’ ଫିଲ୍ମରେ ନଜର ଆସିବେ । ଏହା ଏକ ଐତିହାସିକ ଡ୍ରାମା ଫିଲ୍ମ । ଏହାର ନିର୍ଦ୍ଦେଶନା ଦେଉଛନ୍ତି ମଣିରତ୍ନମ । ଏହା ତାଙ୍କର ଏକ ମହତ୍ୱାକାଂକ୍ଷି ପୋଜେକ୍ଟ ବୋଲି କୁହାଯାଉଛି । ଏହାର ବଜେଟ ରଖାଯାଇଛି ପ୍ରାୟ ୫୦୦କୋଟି । ଏହା ତାମିଲ ଇଣ୍ଡଷ୍ଟ୍ରିର ସବୁଠାରୁ ମହଙ୍ଗା ଫିଲ୍ମ ହେବ ବୋଲି କୁହାଯାଉଛି । ଫିଲ୍ମଟି ଦୁଇଟି ପାର୍ଟରେ ରିଲିଜ୍ କରାଯିବ । ଏହାର ପ୍ରଥମ ଭାଗ ୨୦୨୨ରେ ରିଲିଜ୍ ହେବ । ଏଥିରେ ଐଶ୍ୱର୍ଯ୍ୟା ରାୟଙ୍କ ସହ ବିକ୍ରମ, କାର୍ତ୍ତି, ଜୟମ ରବି, ତୃଷ୍ଣା କୃଷ୍ଣମ ଓ ମୋହନ ବାବୁ ନଜର ଆସିବେ । ଏବେ ଐଶ ତାଙ୍କ ଇନଷ୍ଟାଗ୍ରାମରେ ଫିଲ୍ମର ଫାଷ୍ଟ ଲୁକ୍ ପୋଷ୍ଟର ରିଲିଜ୍ କରିବା ସହ ଲେଖିଛନ୍ତି, ସ୍ୱର୍ଣ୍ଣିମ ଯୁଗ ଜିନ୍ଦା ହୋନେ ଯା ରହା ହୈ । ମଣିରତ୍ନମଙ୍କ ‘ପୋନ୍ନିଇନ ସେଲଭମ’କୁ ନେଇ ଐଶଙ୍କ ପ୍ରଶଂସକମାନେ ବେଶ୍ ଉତ୍ସାହିତ ଅଛନ୍ତି । କମେଣ୍ଟ କରିବାକୁ ଯାଇ କେହି କେହି କହିଛନ୍ତି ଶୀଘ୍ର ବଲିଉଡକୁ ବି ଫେରନ୍ତୁ ଐଶ ।