ରେନ୍କୋଟ୍ କେବଳ ବର୍ଷାରୁ ରକ୍ଷା କରି ନଥାଏ ଏହାର ବିଭିନ୍ନ ଆକର୍ଷଣୀୟ ଡିଜାଇନ୍ ଟ୍ରେଣ୍ଡି ଲୁକ୍ ବି ଦେଇଥାଏ। କିନ୍ତୁ ଏମିତି ବି କିଛି ରେନ୍କୋଟ୍ ଅଛି; ଯାହା ଦେଖିବାକୁ ଖୁବ୍ ଅଜବ। ଆଉ ଏହି ଅଜବ ଡିଜାଇନ୍ ହିଁ ସେହି ରେନ୍କୋଟ୍କୁ ନିଆରା ଲୁକ୍ ଦେଇଥାଏ…
* ୟୁନିର୍ଭସାଲ୍ ମୋଟର ସାଇକେଲ୍ ରେନ୍କୋଟ୍: ଏହି ରେନ୍କୋଟ୍ରେ ଏକକାଳୀନ ୩ଟି ସୁବିଧା ଉପଲବ୍ଧ ଥାଏ। ମୋଟର ସାଇକେଲ୍ ଚଲାଉଥିବା ଚାଳକ, ପଛରେ ବସିଥିବା ବ୍ୟକ୍ତି ଏବଂ ତା’ସହିତ ଖୋଦ୍ ମୋଟର ସାଇକେଲ୍କୁ ବି ବର୍ଷାରୁ ସୁରକ୍ଷା ଦେଇଥାଏ ଏହି ରେନ୍କୋଟ। ହାଇ କ୍ୱାଲିଟି ଅକ୍ସଫୋର୍ଡ ଫାବ୍ରିକ୍ ତଥା ସ୍ବତନ୍ତ୍ର ଓ୍ବାଟର୍ପ୍ରୁଫ୍ ପିଭିସି କୋଟିଂରେ ତିଆରି ହୋଇଥିବା ଏହି ରେନ୍କୋଟ୍କୁ କେବଳ ବାଇକ୍ ଚଲେଇଲାବେଳେ ନୁହେଁ, ସାଇକ୍ଲିଂ, ହାଇକିଂ, କ୍ୟାମ୍ପିଂ, ଟ୍ରାଭେଲିଂବେଳେ ବି ବ୍ୟବହାର କରାଯାଇପାରିବ।
* ସ୍କର୍ଟ-ଟପ୍ସ ଷ୍ଟାଇଲ୍ ରେନ୍କୋଟ୍: ଏହି ରେନ୍କୋଟ୍ ପିନ୍ଧିଲେ କେହି ବି ଦ୍ୱନ୍ଦ୍ୱରେ ପଡିଯିବେ ଯେ, ଆପଣ ରେନ୍କୋଟ୍ ପିନ୍ଧିଛନ୍ତି ନା କୌଣସି ସ୍କର୍ଟ ଟପ୍ସ। ଅବିକଳ ସ୍କର୍ଟ ଓ ଟପ୍ସ ଷ୍ଟାଇଲ୍ରେ ଆସୁଥିବା ଏହି ରେନ୍କୋଟ୍କୁ ପିନ୍ଧିଲେ ବର୍ଷାଦିନେ ବେଶ୍ କମ୍ଫର୍ଟେବଲ୍ ଲାଗେ। ତା’ସହିତ ଏହାର ଲମ୍ବା ଟିକେ ଅଧିକ ରହୁଥିବାରୁ ଓଦା ହେବାର ସମ୍ଭାବନା ବି କମ୍ ରହିଥାଏ।
* ଟ୍ରାନ୍ସପରେଣ୍ଟ ଓ୍ବାଟରପ୍ରୁଫ୍ ରେନ୍କୋଟ୍: ଏହି ରେନ୍କୋଟ୍ ଟ୍ରାନ୍ସପରେଣ୍ଟ ହୋଇଥିବାରୁ ପୋଷାକ ଉପରେ ଏହାକୁ ପିନ୍ଧିଲେ ବି ଅନ୍ୟମାନେ ଆପଣଙ୍କ ପୋଷାକକୁ ସହଜରେ ଦେଖିପାରିବେ। ତେଣୁ ଏହା ଦ୍ୱାରା ଦୁଇଟି ସୁବିଧା ହୁଏ। ପ୍ରଥମତଃ ବର୍ଷାରୁ ରକ୍ଷା ମିଳେ, ଦ୍ୱିତୀୟରେ ଆପଣଙ୍କର ଷ୍ଟାଇଲିଶ୍ ଆଉଟ୍ଫିଟ୍କୁ ଅନ୍ୟମାନଙ୍କ ଆଗରେ ଶୋ’ ଅଫ୍ ବି କରିହୁଏ। ଏହି ରେନ୍କୋଟ୍ ଉଭୟ ନି ଲେଙ୍ଗ୍ଥ ଆଉ ଲଙ୍ଗ୍ ଲେଙ୍ଗ୍ଥରେ ମିଳିଥାଏ।
* ଫ୍ରକ୍ ଷ୍ଟାଇଲ ରେନ୍କୋଟ୍: ଫ୍ରକ୍ ଷ୍ଟାଇଲ୍ର ଦେଖାଯାଉଥିବା ଏହି ରେନ୍କୋଟ୍ ଯୁବତୀଙ୍କୁ ମଡର୍ନ ଲୁକ୍ ଦେଇଥାଏ। ବର୍ଷାଦିନେ ଫ୍ୟାଶନ୍ ସହ ସାଲିସ୍ କରିବାକୁ ଚାହୁଁ ନ ଥିବା ଷ୍ଟାଇଲିଶ୍ ଯୁବତୀଙ୍କ ପାଇଁ ଏହା ଏକ ଭଲ ଅପ୍ସନ। ଖାସ୍ କରି ନି ଲେଙ୍ଗ୍ଥରେ ଆସୁଥିବା ଏହି ରେନ୍କୋଟ୍ ନି ଲେଙ୍ଗ୍ଥ ଆଉଟ୍ଫିଟ୍ ସହ ହିଁ ଭଲ ମାନିଥାଏ। ତା’ଛଡ଼ା ଘେରବାଲା ତଥା ଫ୍ଲୋରାଲ ଡିଜାଇନ୍ର ଫ୍ରକ୍ ଷ୍ଟାଇଲ୍ ରେନ୍କୋଟ୍ ଅଧିକ ସୁନ୍ଦର ଦେଖାଯାଇଥାଏ।
* ପୋଲ୍କା ଡଟ୍ ରେନ୍କୋଟ୍: ଅଲ୍ ଟାଇମ ଫ୍ୟାଶନେବଲ୍ ଲୁକ୍ ଦେଇଥାଏ ପୋଲ୍କା ଡଟ୍ ଆଉଟ୍ଫିଟ୍। ଏବେ ପୋଲ୍କା ଡଟ୍ ରେନ୍କୋଟ୍ ବି ମାର୍କେଟରେ ମିଳିଲାଣି, ଯାହା ଷ୍ଟାଇଲିଶ୍ ଲାଗିବା ସହ ବିଭିନ୍ନ ଲେଙ୍ଗ୍ଥରେ ବି ଆସୁଛି।
* ଲେସ୍ ରେନ୍କୋଟ୍: ଏହା ବି ଏକ ଷ୍ଟାଇଲିଶ୍ ରେନ୍କୋଟ୍। ଏହି ରେନ୍କୋଟ୍ର ଭିତର ପାର୍ଶ୍ୱରେ ଯେକୌଣସି ଟ୍ରାନ୍ସପରେଣ୍ଟ କଲର୍ର ଏକ ଓ୍ବାଟର୍ପ୍ରୁଫ୍ କପଡ଼ା ଥାଏ ଏବଂ ବାହାର ପାର୍ଶ୍ୱରେ ସେହି କଲର୍ର ଲେସ୍ କାମ ହୋଇଥିବା କପଡ଼ା ଲାଗିଥାଏ। ଫଳରେ ଏହା ବର୍ଷାରୁ ରକ୍ଷା କରିବା ସହ ଆକର୍ଷଣୀୟ ଲୁକ୍ ଦେଇଥାଏ। ବିଭିନ୍ନ ଲେଙ୍ଗ୍ଥ୍ରେ ବି ଏହା ମାର୍କେଟରେ ଉପଲବ୍ଧ ହୋଇଥାଏ।
* ଓ୍ବେଷ୍ଟ ଲେଙ୍ଗ୍ଥ ରେନ୍କୋଟ୍: ଅଣ୍ଟା ପର୍ଯ୍ୟନ୍ତ ଲମ୍ବା ରହୁଥିବାରୁ ଏହାକୁ ପିନ୍ଧି ବର୍ଷାରେ ଯିବାବେଳେ ଆପଣଙ୍କ ପୋଷାକ ଅଣ୍ଟା ପର୍ଯ୍ୟନ୍ତ ଓଦା ହେବନାହିିଁ, କିନ୍ତୁ ଅଣ୍ଟାଠାରୁ ପାଦ ପର୍ଯ୍ୟନ୍ତ ଆପଣ ଓଦା ହୋଇଯିବେ। କେବଳ ଷ୍ଟାଇଲିଶ୍ ଲୁକ୍ ପାଇଁ ଏହାକୁ ଯୁବପିଢ଼ି ପସନ୍ଦ କରୁଛନ୍ତି। ଯେଉଁମାନେ ସଟ୍ସ ପିନ୍ଧୁଛନ୍ତି, ସେମାନେ ଚାହିଁଲେ ଏହାକୁ ପିନ୍ଧି ପାରିବେ।