ଓ୍ବାଶିଂଟନ,୮।୫ : ଆମେରିକାର ରାଷ୍ଟ୍ରପତି ଜୋ ବାଇଡେନ ପୁଣିଥରେ ୨୦୨୪ ରାଷ୍ଟ୍ରପତି ନିର୍ବାଚନ ପାଇଁ ନିଜର ଦାବି ଉପସ୍ଥାପନ କରିଛନ୍ତି। ଯାହା ପରେ ରାଷ୍ଟ୍ରପତି ଜୋ ବାଇଡେନ ଏବଂ ଉପରାଷ୍ଟ୍ରପତି କମଲା ହାରିସ ଆମେରିକାର ଶ୍ରେଷ୍ଠ ୧୫୦ ଦାନଦାତାଙ୍କୁ ଭେଟିଥିଲେ। ଏହି ବୈଠକରେ ଆସନ୍ତା ରାଷ୍ଟ୍ରପତି ନିର୍ବାଚନ ପାଇଁ ପାଣ୍ଠି ସଂଗ୍ରହର ରଣନୀତି ଉପରେ ଆଲୋଚନା କରାଯାଇଥିଲା। ଆଗାମୀ ର୍ନିବାଚନ ପାଇଁ ବିଲିୟନ ପାଣ୍ଠି ସଂଗ୍ରହ କରିବାର ଲକ୍ଷ୍ୟ ରଖିଛି ଡେମୋକ୍ରାଟିକ ପାର୍ଟି। ସେମାନଙ୍କ ମଧ୍ୟରେ ସବୁଠାରୁ ଗୁରୁତ୍ୱପୂର୍ଣ୍ଣ ହେଉଛନ୍ତି ଭାରତୀୟ-ଆମେରିକୀୟ ବ୍ୟବସାୟୀ ଅଜୟ ଜୈନ ଭୁଟୋରିଆ। ବାଇଡେନଙ୍କ ରାଷ୍ଟ୍ରପତି ଭାବରେ ପୁଣି ଥରେ କ୍ଷମତା ଦଖଲ ପାଇଁ ଭୁଟୋରିଆ ଜଣେ ଗୁରୁତ୍ୱପୂର୍ଣ୍ଣ ବ୍ୟକ୍ତି।
ଭୁଟୋରିଆ ଆମେରିକାର ସିଲିକନ ଭ୍ୟାଲିରେ ରହୁଥିବା ଜଣେ ବ୍ୟବସାୟୀ। ଭୁଟୋରିଆ ବାଇଡେନଙ୍କ ନିକଟତର ବୋଲି ବିବେଚନା କରାଯାଏ। ଗତ ରାଷ୍ଟ୍ରପତି ନିର୍ବାଚନରେ ମଧ୍ୟ ଭୁଟୋରିଆ ବାଇଡେନଙ୍କ ସପକ୍ଷରେ ପ୍ରଚାର କରି ତାଙ୍କ ନିର୍ବାଚନ ପାଇଁ ପାଣ୍ଠି ସଂଗ୍ରହରେ ମଧ୍ୟ ବିଶେଷ ଅବଦାନ ରଖିଥିଲେ। ଭୁଟେରିଆ ବାଇଡେନଙ୍କ ଡେମୋକ୍ରାଟିକ ପାର୍ଟିର ନ୍ୟାଶନାଲ ଫାଇନାନ୍ସର ଉପାଧ୍ୟକ୍ଷ ଅଟନ୍ତି। ସେ ରାଷ୍ଟ୍ରପତିଙ୍କ ଏସୀୟ ଆମେରିକୀୟ, ଦେଶୀ ହାୱାଇ ଏବଂ ପ୍ରଶାନ୍ତ ଦ୍ୱୀପପୁଞ୍ଜ ପରାମର୍ଶଦାତା ଆୟୋଗର ମଧ୍ୟ ସଦସ୍ୟ ଅଟନ୍ତି।
ଆମେରିକାର ଶାସକ ଡେମୋକ୍ରାଟିକ ପାର୍ଟି ପାଇଁ ଭୁଟୋରିଆ ଅନ୍ୟତମ ପ୍ରମୁଖ ପାଣ୍ଠି ସଂଗ୍ରହକାରୀଙ୍କ ମଧ୍ୟରୁ ଅନ୍ୟତମ। ୨୦୨୦ ମସିହାରେ ରାଷ୍ଟ୍ରପତି ନିର୍ବାଚନରେ ଭୁଟୋରିଆ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ଏଥିସହ ଦକ୍ଷିଣ ଏସୀୟ ମୂଳ ଆମେରିକୀୟ ନାଗରିକମାନଙ୍କୁ ବାଇଡେନଙ୍କ ସପକ୍ଷରେ ଆଣିବାରେ ଭୁଟୋରିଆର ଏକ ଭୂମିକା ଥିଲା।