ସାରବ୍ରକେନ୍ସ (ଜର୍ମାନୀ): କୋଭିଡ୍ ଆଶଙ୍କାରେ ଭାରତୀୟ ବ୍ୟାଡ୍ମିଣ୍ଟନ ଖେଳାଳି ଅଜୟ ଜୟରାମ ଏବଂ ଶୁଭଙ୍କର ଦେ ଗୁରୁବାର ସାର୍ଲର୍ ଲକ୍ସ ଓପନ୍ ଟୁର୍ନାମେଣ୍ଟରୁ ଓହରିଯାଇଛନ୍ତି। ଏହି ଦୁଇ ଖେଳାଳି ବର୍ତ୍ତମାନ ଆଇସୋଲେଶନରେ ଅଛନ୍ତି। ଗତଥରର ଚାମ୍ପିୟନ ୧୯ବର୍ଷୀୟ ଲକ୍ଷ୍ୟ ସେନ୍ଙ୍କ ପିତା ତଥା କୋଚ୍ କରୋନା ପଜିଟିଭ୍ ଜଣାପଡ଼ିବା ପରେ ସେ ନିଜେ ବୁଧବାର ପ୍ରତିଯୋଗିତାରୁ ଓହରିଯାଇଥିଲେ। ଡି.କେ. ସେନ୍ଙ୍କ ନିକଟରେ କିନ୍ତୁ କୌଣସି ଲକ୍ଷଣ ଦେଖା ନ ଥିଲା। ତାଙ୍କ ସହ ସଂସ୍ପର୍ଶରେ ଆସିଥିବାରୁ ସତର୍କତାମୂଳକ ପଦକ୍ଷେପ ସ୍ବରୂପ ଅଜୟ ଜୟରାମ ଏବଂ ଶୁଭଙ୍କର ଦେ ଟୁର୍ନାମେଣ୍ଟରୁ ଓହରିଯିବାକୁ ବାଧ୍ୟ ହୋଇଛନ୍ତି। ଗୁରୁବାର ବ୍ୟାଡ୍ମିଣ୍ଟନ ଓ୍ବାଲର୍ଡ ଫେଡେରେଶନ (ବିଡବ୍ଲ୍ୟୁଏଫ୍) ତରଫରୁ ଏହି ସୂଚନା ଦିଆଯାଇଛି। ପରେ ଜୟରାମ୍ ଏହି ପ୍ରସଙ୍ଗରେ କ୍ରୀଡ଼ାମନ୍ତ୍ରୀ କିରେନ ରିଜିଜୁ, ଜାତୀୟ ବ୍ୟାଡ୍ମିଣ୍ଟନ ମହାସଂଘ ଏବଂ ବିଡବ୍ଲ୍ୟୁଏଫ୍ ଟୁଇଟର ପୋଷ୍ଟ କରିଛନ୍ତି। ଆୟୋଜକଗଣ ସେମାନଙ୍କୁ କେବଳ ଆଇସୋଲେଶନରେ ରହିବାକୁ କହିଛନ୍ତି। ଏହାଛଡ଼ା ଅନ୍ୟ କୌଣସି ସୂଚନା କିମ୍ବା ସହାୟତା ପ୍ରଦାନ କରି ନାହାନ୍ତି। ଏଠାରେ ସେମାନେ ଏକ ଅପ୍ରୀତିକର ପରିସ୍ଥିତିରେ ପଡ଼ିଛନ୍ତି। ସେମାନେ ଭାରତ ଫେରିଯିବାକୁ ଚାହାନ୍ତି। ଜୟରାମ କହିଛନ୍ତି, ସେମାନଙ୍କ ନିକଟରେ କୋଭିଡ୍ ନେଗେଟିଭ୍ ସାର୍ଟିଫିକେଟ ରହିଥିଲା ଏବଂ କୌଣସି ଲକ୍ଷଣ ମଧ୍ୟ ନ ଥିଲା। ଜର୍ମାନୀର ସ୍ଥାନୀୟ କର୍ତ୍ତୃପକ୍ଷଙ୍କ ସହ ଯୋଗାଯୋଗ ସମ୍ଭବ ହୋଇପାରୁ ନାହିଁ। ପୁନଶ୍ଚ ସେମାନଙ୍କର ଏଠାରେ ପୁନର୍ବାର କୋଭିଡ୍ ଟେଷ୍ଟ ହୋଇପାରିବ କି ନା ତାହା ଜାଣିବାକୁ ଚାହୁଛନ୍ତି। ବର୍ତ୍ତମାନ ଯେଉଁ ପରିସ୍ଥିତି ଉପୁଜିଛି ସେଥିପାଇଁ ଶୁଭଙ୍କର ଆୟୋଜକଙ୍କଠାରୁ କ୍ଷତିପୂରଣ ଚାହିଁଛନ୍ତି।
