ମେଲବୋର୍ନ,୨୭।୧୨: ବ୍ୟକ୍ତିଗତ କାରଣରୁ ଅଷ୍ଟ୍ରେଲିଆ ଗସ୍ତ ଛାଡ଼ି ସ୍ବଦେଶ ଫେରିଛନ୍ତି ଭାରତୀୟ ଟିମ୍ର ନିୟମିତ ଅଧିନାୟକ ବିରାଟ କୋହଲି। ଏଣୁ ଅଷ୍ଟ୍ରେଲିଆ ବିପକ୍ଷ ଦ୍ୱିତୀୟ ଟେଷ୍ଟ ମ୍ୟାଚ୍ରେ ନେତୃତ୍ୱ ନେଇଛନ୍ତି ଅଜିଙ୍କ୍ୟ ରାହାଣେ। ଅଧିନାୟକ ଭାବେ ରାହାଣେ ଦମ୍ଦାର ବ୍ୟାଟିଂ କରି ନିଜ କ୍ୟାରିୟରର ୧୨ତମ ଶତକ କରିଛନ୍ତି। ରବିବାର ମ୍ୟାଚ୍ର ଦ୍ୱିତୀୟ ଦିନରେ ରାହାଣେ ଏହି କାରନାମା କରିଦେଖାଇଛନ୍ତି। ମେଲବୋର୍ନରେ ତାଙ୍କର ଏହା ୨ୟ ଶତକ। ଏହି ଶତକୀୟ ପାଳି ସହ ରାହାଣେ ଏକ ସ୍ବତନ୍ତ୍ର ଉପଲବ୍ଧି ହାସଲ କରିଛନ୍ତି।
ଉକ୍ତ କ୍ରିକେଟ ପଡ଼ିଆରେ ଦୁଇଟି ଶତକ ଲଗାଇଥିବା ଦ୍ୱିତୀୟ ଭାରତୀୟ ଖେଳାଳି ସେ ପାଲଟିଛନ୍ତି। ତାଙ୍କ ପୂର୍ବରୁ ବିନୁ ମାଙ୍କଡ ଏହା କରିଥିଲେ। ୧୯୪୮ ଜାନୁୟାରୀରେ ୧୧୬ ଏବଂ ଫେବୃୟାରୀରେ ୧୧୧ ରନ୍ କରିଥିଲେ। ତାଙ୍କ ପରେ ରାହାଣେ ଏକମାତ୍ର ବ୍ୟାଟ୍ସମ୍ୟାନ୍ ପାଲଟିଛନ୍ତି।
ଏତଦବ୍ୟତିତ ୨୧ ବର୍ଷ ପରେ ଟେଷ୍ଟ କ୍ରିକେଟରେ ଶତକ କରିଥିବା ଭାରତର ୧୨ତମ ଅଧିନାୟକ ପାଲଟିଛନ୍ତି ସେ। ୧୯୯୯ରେ ସଚିନ ତେନ୍ଦୁଲକର ୧୧୬ରନ୍ କରି ରେକର୍ଡ କରିଥିଲେ। ତେବେ ଅଷ୍ଟ୍ରେଲିଆ ବିପକ୍ଷରେ ରାହାଣେଙ୍କର ଏହା ଦ୍ୱିତୀୟ ଶତକ ମଧ୍ୟ। ୨୦୧୪ରେ ସେ ପ୍ରଥମ ଶତକ ମାରିଥିଲେ।
ପ୍ରକାଶ ଯେ, ରାହାଣେଙ୍କ ଦମ୍ଦାର ପାଳି ଯୋଗୁ ଭାରତ ଏବେ ମଜଭୂତ ସ୍ଥିତିରେ ପହଞ୍ଚିଛି। ଦ୍ୱିତୀୟ ଦିନରେ ଭାରତୀୟ ଟିମ୍ ୨୭୭/୫ ସ୍କୋରରେ ପହଞ୍ଚିଛି। ଜାଡେଜାଙ୍କ ସହ ରାହାଣେ କ୍ରିଜ୍ରେ ଅଛନ୍ତି।