ଅଷ୍ଟ୍ରେଲିଆରେ ଚାଲିଥିବା ଟେଷ୍ଟ ସିରିଜ୍ର ପ୍ରଥମ ମ୍ୟାଚ୍ ହାରିଯିବା ପରେ ଭାରତୀୟ କ୍ରିକେଟ ଦଳ ଟାର୍ଗେଟରେ ଆସିଯାଇଥିଲା। ମାତ୍ର ଦ୍ୱିତୀୟ ମ୍ୟାଚ୍ ଜିତିବା ପରେ ସବୁଆଡ଼େ ଭାରତୀୟ ଦଳର ପ୍ରଶଂସା ହେଉଛି। ବିଶେଷ କରି ଏହି ବିଜୟ ପରେ ଆଜିଙ୍କ୍ୟ ରାହାନେଙ୍କୁ ନେଇ ଚର୍ଚ୍ଚା ଚାଲିଛି। ଅନେକ ଲୋକ ରାହାନେଙ୍କୁ ଧୋନୀଙ୍କ ସହ ତୁଳନା କରି ତାଙ୍କୁ ଭବିଷ୍ୟତର ଅଧିନାୟକ ବୋଲି କହୁଛନ୍ତି। ଏବେ ରାହାନେ ପ୍ରଶଂସା ସାଉଁଟୁଥିବା ବେଳେ କିଛି ଦିନ ପୂର୍ବେ ତାଙ୍କୁ ଟିମ୍ ଇଣ୍ଡିଆରେ ସ୍ଥାନ ପାଇବା ପାଇଁ ସଂଘର୍ଷ କରିବାକୁ ପଡ଼ିଥିଲା। ଉକ୍ତ ସମୟରେ ସେ ବ୍ୟକ୍ତିଗତ ଜୀବନ ସହ ଜଡିତ ଅନେକ ସଂଘର୍ଷ କଥା ଲୋକଙ୍କ ସହ ଶେୟାର କରିଥିଲେ।
ମୁମ୍ବାଇରେ ରହୁଥିବା ରାହାନେ ୨୦୧୧ରେ ଇଂଲଣ୍ଡ ବିପକ୍ଷରେ ନିଜର କ୍ୟାରିୟର ଆରମ୍ଭ କରିଥିଲେ। ଏହା ପରେ ସେ ଆଉ ପଛକୁ ଫେରି ଚାହିଁ ନାହାନ୍ତି। ଆଜି ତାଙ୍କର ତୁଳନା କ୍ୟାପ୍ଟେନ୍ କୁଲ୍ ଧୋନୀଙ୍କ ସହ କରାଯାଉଛି। ଆଜି ରାହାନେ ଯେଉଁ ସଫଳତା ପାଇଛନ୍ତି ତାର ଶ୍ରେୟ ସେ ନିଜ ମା’ବାପାଙ୍କୁ ଦେଇଛନ୍ତି।
ଏକ ସାକ୍ଷାତକାରରେ ରାହାନେ କହିଥିଲେ ଯେ, ଦାରିଦ୍ର୍ୟରେ ଥିବା ବେଳେ ତାଙ୍କର ଖେଳପ୍ରତି ରହିଥିବା ଆଗ୍ରହକୁ ପରିବାର ଲୋକେ ଆଦୌ ହେଲେ କମ୍ ହେବାକୁ ଦେଇ ନ ଥିଲେ। ଏକଦା ତାଙ୍କ ପାଖରେ ରିକ୍ସା ଭଡ଼ା ଦେବାକୁ ଟଙ୍କା ନ ଥିଲା। ତାଙ୍କର ପ୍ରଶିକ୍ଷଣ ଶିବିର ଘରଠାରୁ ୮ କି.ମି. ଦୂରରେ ଥିଲା। ଏଭଳି ପରିସ୍ଥିତିରେ ତାଙ୍କ ମା’ସାନ ଭାଇକୁ କୋଳରେ ଧରି ରାହାନେଙ୍କ ବ୍ୟାଗ୍କୁ କାନ୍ଧରେ ବୋହି ଚାଲି ଚାଲି ଶିବିର ପର୍ଯ୍ୟନ୍ତ ପହଞ୍ଚାଉଥିଲେ। ସପ୍ତାହରେ ମାତ୍ର ଗୋଟିଏ ଦିନ ସେ ରିକ୍ସାରେ ଯାଇପାରୁଥିଲେ। ତେଣୁ ଅନ୍ୟ ଦିନ ଗୁଡିକରେ ମା’ ସାନ ଭାଇକୁ କୋଳରେ ଧରି ଭାରି ବ୍ୟାଗ୍ କାନ୍ଧରେ ଉଠାଇ ପ୍ରଶିକ୍ଷଣ ଶିବିର ପର୍ଯ୍ୟନ୍ତ ପହଞ୍ଚାଉଥିଲେ ବୋଲି ରାହାନେ କହିଥିଲେ।
