ଲଣ୍ଡନ,୨୫।୮: ଇଂଲଣ୍ଡ ବିପକ୍ଷ ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରେ ଭାରତ ୧-୦ରେ ଅଗ୍ରଣୀ ରହିଛି। ପ୍ରଥମ ଟେଷ୍ଟ ଡ୍ର ହୋଇଥିବା ବେଳେ ଲର୍ଡସରେ ଖେଳାଯାଇଥିବା ଦ୍ୱିତୀୟ ମ୍ୟାଚ୍କୁ ଭାରତ ୧୫୧ ରନ୍ରେ ଜିତିଥିଲା। ଏହି ସିରିଜରେ ବିରାଟ କୋହଲିଙ୍କ ଅଧିନାୟକତ୍ୱକୁ ପ୍ରଶଂସା କରାଯାଉଥିଲେ ହେଁ ତାଙ୍କ ବ୍ୟାଟିଂକୁ ସମାଲୋଚନା କରାଯାଉଛି। କାରଣ କୋହଲି ଦୀର୍ଘ ଦିନରୁ ଶତକ ମାରିନାହାନ୍ତି। ନଭେମ୍ବର ୨୦୧୯ରେ ସେ ଶେଷଥର ପାଇଁ ଶତକ ହାସଲ କରିଥିଲେ। ତେବେ କୋହଲିଙ୍କ ଖରାପ ଫର୍ମକୁ ନେଇ ତାଙ୍କୁ ସମାଲୋଚନା କରାଯାଉଥିବା ସତ୍ତ୍ୱେ ପୂର୍ବତନ ଭାରତୀୟ ଭେଟେରାନ କ୍ରିକେଟର ହଜିତ ଅଗରକର ତାଙ୍କୁ ଖୋଲାଖୋଲି ସମର୍ଥନ କରିଛନ୍ତି। ତୃତୀଟେଷ୍ଟ ପୂର୍ବରୁ କୋହଲି ଏକ ବଡ଼ ଇନିଂସ ଖେଳିବାକୁ ଚେଷ୍ଟା କରିବେ ବୋଲି ସେ ଆଶା ପ୍ରକାଶ କରିଛନ୍ତି।
ଇଂଲଣ୍ଡ ବିପକ୍ଷ ନଟିଂହାମ ଟେଷ୍ଟର ପ୍ରଥମ ଇନିଂସରେ କୋହଲି ଶୂନ ରନ୍ କରି ଆଉଟ୍ ହୋଇଥିଲେ। ସେହିଭଳି ଦ୍ୱିତୀୟ ଇନିଂସରେ ବର୍ଷା ଯୋଗୁ ବ୍ୟାଟିଂ କରିପାରି ନ ଥିଲେ। ଦ୍ୱିତୀୟ ଟେଷ୍ଟର ପ୍ରଥମ ଇନିଂସରେ ସେ ୪୨ରନ୍ ଏବଂ ଦ୍ୱିତୀୟ ଇନିଂସରେ ୨୦ ରନ୍ କରିଥିଲେ। ସୋନି ଟିଭି ପକ୍ଷରୁ ଆୟୋଜିତ ଏକ ଖବରଦାତା ସମ୍ମିଳନୀରେ ଅଗରକର ଅଧିନାୟକଙ୍କୁ ପ୍ରଶଂସା କରିବା ସହ କହିଛନ୍ତି, ୩ ଇନିଂସ ପାଇଁ ତାଙ୍କୁ ବାଦ ଦିଆଯାଇପାରିବ ନାହିଁ। କିଛି ସମୟ ଅପେକ୍ଷା କର ଏବଂ ଦେଖ। ତିନୋଟି ଇନିଂସ ଆଧାରରେ କୋହଲିଙ୍କ ଭଳି ଜଣେ ମହାନ ଖେଳାଳିଙ୍କୁ ବରଖାସ୍ତ କରିପାରିବେ ନାହିଁ ବୋଲି ସେ କହିଛନ୍ତି।
ଏହାଛଡ଼ା କୋହଲି ଇଂଲଣ୍ଡ ବିପକ୍ଷ ୨୦୧୮ ସିରିଜରେ ରନ୍ ସ୍କୋର କରିଥିଲେ। ସେତେବେଳେ ଆୟୋଜକ ଦଳର ସମସ୍ତ ବୋଲର ଉପସ୍ଥିତ ଥିଲେ। ଏଣୁ ଆଗାମୀ ଟେଷ୍ଟରେ କୋହଲି ରନ୍ ସ୍କୋର କରିବାକୁ ପସନ୍ଦ କରିବେ। ତାଙ୍କର ପ୍ରଶଂସକମାନେ ସେ ବଡ଼ ଇନିଂସ ଖେଳନ୍ତୁ ବୋଲି ଚାହିଁବେ। ସେ ଅନ୍ତର୍ଜାତୀୟ କ୍ରିକେଟରେ ବହୁତ ରନ୍ କରିଛନ୍ତି। ଯେତେବେଳେ କେହି ଭଲ ବ୍ୟାଟିଂ କରି ନ ଥାନ୍ତି ସେ ସିରିଜରେ ତାହା ଅପେକ୍ଷା କରିଥାନ୍ତି ବୋଲି ଅଗରକର କହିଛନ୍ତି।
