ବିଶାଖାପାଟଣା,୧୯।୩: ଭାରତ-ଅଷ୍ଟ୍ରେଲିଆ ମଧ୍ୟରେ ଖେଳାଯାଉଥିବା ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜରେ ଶ୍ରେୟସ ଆୟର ଆହତ ହେବା ଯୋଗୁ ଟି୨୦ ଫର୍ମାଟ ସୁପରଷ୍ଟାର ସୂର୍ଯ୍ୟକୁମାର ଯାଦବଙ୍କୁ ସୁଯୋଗ ମିଳିଥିଲା। ହେଲେ ଉଭୟ ମୁମ୍ବାଇ ଏବଂ ବିଶାଖାପାଟଣାରେ ମିଳିଥିବା ସୁଯୋଗର ଫାଇଦା ଉଠାଇବାରେ ବିଫଳ ହୋଇଛନ୍ତି ସେ। ଲଗାତାର ଦ୍ୱିତୀୟ ମ୍ୟାଚ୍ରେ ଅଷ୍ଟ୍ରେଲିଆର ବାମହାତୀ ବୋଲର ମିଚେଲ ଷ୍ଟାର୍କ ତାଙ୍କୁ ଏଲ୍ବିଡବ୍ଲ୍ୟୁ କରି ପ୍ୟାଭିଲିୟନକୁ ପଠାଇଥିଲେ। ଫଳରେ ଯାଦବ ଖାତା ନ ଖୋଲି ଫେରିବାକୁ ବାଧ୍ୟ ହୋଇଥିଲେ। ତେବେ ସେ ଅଜିତ ଅଗରକରଙ୍କ ପରେ ଲଗାତାର ଦୁଇଟି ଦିନିକିଆରେ ଗୋଲ୍ଡେନ୍ ଡକ୍ ସ୍କୋର କରିଥିବା ଭାରତୀୟ ବ୍ୟାଟ୍ସମ୍ୟାନ୍ ପାଲଟିଛନ୍ତି।
ଏଭଳି ସ୍ଥିତିରେ ବିଶାଖାପାଟଣା ଦିନିକିଆ ପୂର୍ବରୁ ଅଗରକର ଦିନିକିଆ ଫର୍ମାଟରେ ସୂର୍ଯ୍ୟକୁମାର ଯାଦବଙ୍କ ବିଫଳତା ପଛର କାରଣ ପ୍ରକାଶ କରିଥିଲେ। ତାଙ୍କ ମାନସିକତା ହେତୁ ଏଭଳି ଘଟୁଛି। ସେ କିଭଳି ଦିନିକିଆରେ ବ୍ୟାଟିଂ କରିବେ ତାହା ସ୍ଥିର କରିବାରେ ଅସମଥର୍ର୍। ଏହି କାରଣରୁ ସେ ଦିନିକିଆରେ ଏଯାବତ ନିଜର ଛାପ ଛାଡ଼ିବାରେ ବିଫଳ ହେଉଛନ୍ତି ବୋଲି ଅଗରକର କହିଛନ୍ତି।
ଜୁଲାଇ ୨୦୨୧ରେ ଶ୍ରୀଲଙ୍କା ବିପକ୍ଷରେ ସୂର୍ଯ୍ୟକୁମାର ନିଜର ଦିନିକିଆ ଡେବ୍ୟୁ କରିଥିଲେ। ଏଯାବତ ସେ ୨୨ ଦିନିକିଆର ୨୦ ଇନିଂସରେ ୪୩୩ ରନ୍ କରିଛନ୍ତି। ସେଥିରେ ୨ ଅର୍ଦ୍ଧଶତକ ରହିଛି। ଅହମ୍ମଦାବାଦରେ ଓ୍ବେଷ୍ଟଇଣ୍ଡିଜ ବିପକ୍ଷରେ ଅର୍ଦ୍ଧଶତକ କରିବା ପରେ ସୂର୍ଯ୍ୟକୁମାର ୧୬ ଦିନିକିଆ ଖେଳିଛନ୍ତି। ଗତ ୧୦ ଦିନିକିଆ ଦେଖିଲେ ସେ ମାତ୍ର ୧୧୦ ରନ୍ ସ୍କୋର କରିବାରେ ସଫଳ ହୋଇଛନ୍ତି। ଏଥିରେ ତାଙ୍କର ଶ୍ରେଷ୍ଠ ପ୍ରଦର୍ଶନ ୩୪* ରହିଛି। ଏମିତିରେ ତାଙ୍କର ଦିନିକିଆରେ ଖେଳିବା ଅସ୍ପଷ୍ଟ ହୋଇଚାଲିଛି।
