ମୁମ୍ବାଇ,୨୮।୮: ମହାରାଷ୍ଟ୍ରରେ ଜାତୀୟତାବାଦୀ କଂଗ୍ରେସ ପାର୍ଟି ମଧ୍ୟରେ ଚାଲିଥିବା କଳହକୁ ନେଇ ଶିବସେନା (ଉଦ୍ଧବ ବାଲାସାହେବ ଠାକରେ) ମଧ୍ୟ ଏକ ବଡ଼ ପ୍ରତିକ୍ରିୟା ଦେଇଛନ୍ତି। ଦଳର ମୁଖପତ୍ର ସାମ୍ନାରେ ଏନସିପି ମୁଖ୍ୟ ଶରଦ ପାୱାର ଏବଂ ରାଜ୍ୟର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ଉପରେ ଏକ ବଡ଼ ଆକ୍ରମଣ ହୋଇଛି। ବାରମତିରେ ଅଜିତ ପାୱାରଙ୍କ ସମାବେଶ ପ୍ରସଙ୍ଗରେ ସାମ୍ନାର ସମ୍ପାଦକୀୟରେ କୁହାଯାଇଛି ଯେ, ଉପମୁଖ୍ୟମନ୍ତ୍ରୀ କହିଛନ୍ତି ଯେ ସେ କ୍ଷମତା ଚାହୁଁ ନାହାଁନ୍ତି। ସେ କ୍ଷମତା ପାଇଁ ନୁହେଁ ବରଂ ବିକାଶ ଏବଂ ଶାହୁ, ଫୁଲେ, ଆମ୍ବେଦକରଙ୍କ ଚିନ୍ତାଧାରା ପାଇଁ ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଏବଂ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କ ସହ ଯାଇଛନ୍ତି କିନ୍ତୁ ଏକଥା ଖାଲି ବାହାସ୍ଫୁଟ। ସେ ଏତେ ବର୍ଷ ପର୍ଯ୍ୟନ୍ତ କ୍ଷମତାରେ ରହିଲେ, ସେ କେତେ ବିକାଶ ଯୋଜନା କରିଥିଲେ?
ଶରଦ ପାୱାରଙ୍କ ବିଷୟରେ ଉଲ୍ଲେଖ କରି ସାମ୍ନାର ସମ୍ପାଦକୀୟ କୁହାଯାଇଛିି ଯେ, ଅଜିତ ପାୱାର ଏପର୍ଯ୍ୟନ୍ତ ଅତି କମରେ ଚାରିଥର ଉପମୁଖ୍ୟମନ୍ତ୍ରୀ ହୋଇଛନ୍ତି ଏବଂ ସେ କେବଳ ଶରଦ ପାୱାରଙ୍କ କୃପା ଯୋଗୁ ଏହି ପଦବୀ ପାଇଛନ୍ତି।
ଜୁଲାଇ ୨ରେ ଅଜିତ ପାୱାର ଏବଂ ଛଗନ ଭୁଜବଳ, ହାସନ ମୁଶ୍ରିଫ ଏବଂ ଦିଲୀପ ୱାଲ୍ସ ପାଟିଲଙ୍କ ସମେତ ଆଠ ଜଣ ଏନସିପି ବିଧାୟକ ଏକନାଥ ଶିନ୍ଦେ ସରକାରରେ ଯୋଗ ଦେଇଥିଲେ, ଯାହା ପରେ ଦଳକୁ ବିଭାଜନର ସମ୍ମୁଖୀନ ହେବାକୁ ପଡିଥିଲା। ପରେ ଅଜିତ ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ। ଏହାପରେ ଶରଦ ପାଓ୍ବାର ଏବଂ ଅଜିତ ପାଓ୍ବାରଙ୍କ ମଧ୍ୟରେ ଅନେକଥର ଗୁପ୍ତ ବୈଠକ ହୋଇସାରିଛି।