ନୂଆଦିଲ୍ଲୀ,୪ା୫: ବରିଷ୍ଠ ପଦାର୍ଥ ବିଜ୍ଞାନୀ ଅଜିତ କୁମାର ମହାନ୍ତି ବୁଧବାର ଆଟମିକ୍ ଏନର୍ଜି କମିଶନ (ଏଇସି) ଅଧ୍ୟକ୍ଷ ଏବଂ ଆଣବିକ ଶକ୍ତି ବିଭାଗ ସଚିବ ଭାବେ ଦାୟିତ୍ୱ ଗ୍ରହଣ କରିଛନ୍ତି। ଭାବା ଆଟମିକ୍ ରିସର୍ଚ୍ଚ ସେଣ୍ଟର (ବିଏଆର୍ସି) ନିର୍ଦ୍ଦେଶକ ଭାବେ ଅବସ୍ଥାପିତ ଥିବା ଅଜିତଙ୍କୁ କମଳେଶ ନୀଳକଣ୍ଠ ବ୍ୟାସଙ୍କ ସ୍ଥାନରେ ଅବସ୍ଥାପିତ କରାଯାଇଛି। ଏହି ଅବସରରେ ସେ କହିଛନ୍ତି, ଆଣବିକ ଶକ୍ତିର ସୁବିଧାକୁ କାର୍ବନମୁକ୍ତ ବିଦ୍ୟୁତ୍ରୁ ଊର୍ଦ୍ଧ୍ୱକୁ ନେଇ ଜାତୀୟ ନିରାପତ୍ତା ଓ ସ୍ବାସ୍ଥ୍ୟସେବା ପରିଚାଳନା, ଖାଦ୍ୟ ସୁରକ୍ଷା କ୍ଷେତ୍ରରେ ଉପଯୋଗ କରାଯିବ। ୨୦୨୫ ଅକ୍ଟୋବର ୧୦ରେ ୬୬ ବର୍ଷ ବୟସରେ ସେ ଅବସର ନେବେ ବୋଲି ଏକ ସରକାରୀ ବିଜ୍ଞପ୍ତିରେ କୁହାଯାଇଛି। ୧୯୫୯ରେ ଓଡ଼ିଶାରେ ଜନ୍ମିତ ଅଜିତ ୧୯୭୯ରେ ବାରିପଦା ଏମ୍ପିସି କଲେଜରୁ ପଦାର୍ଥ ବିଜ୍ଞାନରେ ଅନର୍ସ ରଖି ସ୍ନାତକ ଡିଗ୍ରୀ ହାସଲ କରିଥିଲେ। ପରେ ସେ କଟକସ୍ଥିତ ରେଭେନ୍ଶା କଲେଜରୁ ସ୍ନାତକୋତ୍ତର ଡିଗ୍ରୀ ହାସଲ କରିଥିଲେ। ୧୯୮୩ରେ ଅଜିତ ବିଏଆର୍ସିର ନ୍ୟୁକ୍ଲିୟର ଫିଜିକ୍ସ ଡିଭିଜନରେ ଯୋଗଦେଇଥିଲେ।
