ମୁମ୍ବାଇ,୯ ।୩: ମହାରାଷ୍ଟ୍ର ବିଧାନସଭାରେ ବିରୋଧି ଦଳ ନେତା ଅଜିତ ପାୱାର ଗୁରୁବାର ଏକ ବଡ ଅଭିଯୋଗ ଆଣିଛନ୍ତି । ସେ କହିଛନ୍ତି, ଦେବେନ୍ଦ୍ର ଫଡନଭିସଙ୍କ ନେତୃତ୍ୱରେ ଥିବା ସରକାରଙ୍କ କାର୍ଯ୍ୟକାଳରେ ରାଜ୍ୟରେ ସୂଚନା ଏବଂ ପ୍ରସାରଣ ବିଭାଗରେ ୫୦୦ କୋଟି ଟଙ୍କାର ଘୋଟାଲା ହୋଇଥିଲା । ପାୱାର ଦାବି କରିଛନ୍ତି ଯେ ଫଡନଭିସ ସରକାରରେ ସରକାରୀ ଅଧିକାରୀ ମୁଖ୍ୟମନ୍ତ୍ରୀଙ୍କ ବିନା ମଞ୍ଜୁରୀରେ ୨୦୧୯ରେ ୫୦୦ କୋଟିରୁ ଊର୍ଦ୍ଧ୍ୱ ଟଙ୍କାର ମିଡିଆ ବିଜ୍ଞାପନକୁ ପ୍ରକାଶିତ କରିବାକୁ ମଞ୍ଜୁରୀ ଦେଇଥିଲେ । ପାୱାର ଏବେ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କୁ ଏହି ଅଧିକାରୀଙ୍କୁ ଦଣ୍ଡ ଦେବାକୁ ଦାବି କରିଛନ୍ତି ।
ଗୁରୁବାର ବିଧାନସଭାରେ ଉଦବୋଧନ ଦେଇ ବରିଷ୍ଠ ଏନସିପି ନେତା କହିଛନ୍ତି ଯେ, ଅଧିକାରୀମାନେ ଫାଇଲରେ ଉଲ୍ଲେଖ କରିଛନ୍ତି ଯେ ପ୍ରକୃତରେ ତାଙ୍କ ଅନୁରୋଧ ନ ନେଇ ବିଜ୍ଞାପନ ପ୍ରକାଶନ ପାଇଁ ୫୦୦ କୋଟି ଟଙ୍କା ଖର୍ଚ୍ଚ ବିଷୟରେ ମୁଖ୍ୟମନ୍ତ୍ରୀଙ୍କୁ ଅବଗତ କରାଯାଇଥିଲା । ସୂଚନାଯୋଗ୍ୟ, ସୂଚନା ଓ ପ୍ରସାରଣ ବିଭାଗ ମୁଖ୍ୟମନ୍ତ୍ରୀଙ୍କ ଅଧିନରେ ଆସିଥାଏ । ଏହାସହ ୨୦୧୪ରୁ ୨୦୧୯ ପର୍ଯ୍ୟନ୍ତ ବେଦେନ୍ଦ୍ର ଫଡନଭିସଙ୍କ ନେତୃତ୍ୱରେ ତତ୍କାଳୀନ ଶିବସେନା ସହିତ ଭାଜପା ରାଜ୍ୟରେ ସରକାର ଚଳାଇଥିଲା ।