ମୁମ୍ବାଇ,୨୧।୭: ମହାରାଷ୍ଟ୍ର ବିଧାନସଭା ନିର୍ବାଚନ ପୂର୍ବରୁ ରାଜ୍ୟ ରାଜନୀତି ଏକ ନୂଆ ମୋଡ଼ ନେଇଛି। ରାଜନୈତିକ ଉତ୍ତରାଧିକାରୀ ସଂଗ୍ରାମରେ ମାମୁଁ ଶରଦ ପାୱାରଙ୍କ ସହ ସମ୍ପର୍କ ଭାଙ୍ଗିଥିବା ଭଣଜା ଅଜିତ ପାୱାର କ୍ରମାଗତ ଭାବରେ ଖବରରେ ରହି ଆସୁଛନ୍ତି। ଏବେ ଚର୍ଚ୍ଚା ହେଲାଣି କି, ବିଧାନସଭା ନିର୍ବାଚନ ୨୦୨୪ ପୂର୍ବରୁ ପାୱାର ପରିବାର ଏକଜୁଟ ହେବେ କି? ମହାରାଷ୍ଟ୍ରରେ ଅଜିତ ପାୱାର ଏବଂ ଶରଦ ପାୱାରଙ୍କ ବିଷୟରେ କଳ୍ପନାଜଳ୍ପନା ଜାରି ରହିଛି। ଏସବୁ ମଧ୍ୟରେ ଗୋଟିଏ ବୈଠକରେ ମାମୁଁ ଶରଦ ପାୱାର ଓ ଅଜିତ ପାଓ୍ବାର ଏକାଠି ନଜର ଆସିଥିଲେ। ଏହି ସଭାରେ ସୁପ୍ରିୟା ସୁଲେ ମଧ୍ୟ ଉପସ୍ଥିତ ଥିଲେ।
ମହାରାଷ୍ଟ୍ରର ରାଜନୈତିକ ସମୀକରଣରେ ପରିବର୍ତ୍ତନ ହେବାର ଲକ୍ଷଣ ଦେଖିବାକୁ ମିଳୁଛି। ଏହାର ସବୁଠାରୁ ବଡ଼ ଉଦାହରଣ ହେଉଛି ପୁଣେ ଜିଲା ଯୋଜନା ଏବଂ ବିକାଶ ପରିଷଦର ବୈଠକ। ଏଥିରେ ରାଜ୍ୟର ଉପମୁଖ୍ୟମନ୍ତ୍ରୀ ଅଜିତ ପାୱାର ଅଧ୍ୟକ୍ଷତା କରିଥିଲେ। ଏହି ବୈଠକରେ ଯୋଗଦେବା ପାଇଁ ଏନସିପି (ଶରଦ ଦଳ) ସୁପ୍ରିମୋ ତଥା ଭେଟେରାନ ନେତା ଶରଦ ପାୱାର ମଧ୍ୟ ପହଞ୍ଚିଥିଲେ। ଏହା ବ୍ୟତୀତ ଏମପି ସୁପ୍ରିୟା ସୁଲେ ମଧ୍ୟ ଏହି ସଭାରେ ଉପସ୍ଥିତ ଥିଲେ।
ମହାରାଷ୍ଟ୍ରରେ ରାଜନୈତିକ ଅସ୍ଥିରତା ତୀବ୍ର ହୋଇଛି। ବିଧାନସଭା ନିର୍ବାଚନ କିଛି ମାସ ମଧ୍ୟରେ ଅନୁଷ୍ଠିତ ହେବ, ତେଣୁ ରାଜ୍ୟରେ ରାଜନୈତିକ ହଲଚଲ ଦେଖିବାକୁ ମିଳିଛି। ଏନସିପି (ଅଜିତ ଦଳ) ର ପିମ୍ପ୍ରି-ଚିଞ୍ଚୱାଡ ଅଞ୍ଚଳର ବହୁ ନେତା ଶରଦ ପାୱାରଙ୍କ ଦଳରେ ଯୋଗ ଦେଇଛନ୍ତି। କେବଳ ମହାରାଷ୍ଟ୍ର ନୁହେଁ ଦେଶର ଭେଟେରାନ ରାଜନୈତିକ ନେତା ଶରଦ ପାୱାର ଏହାକୁ ନେଇ ବହୁତ ଉତ୍ସାହିତ ଅଛନ୍ତି। ରାଜନୈତିକ ମହଲରେ ଆଲୋଚନା ହେଲାଣି କି ଉଭୟ ପାୱାର ପୁଣି ଥରେ ସମାନ ମଞ୍ଚରେ ଏକାଠି ହେବେ କି?
ନିକଟରେ ଶେଷ ହୋଇଥିବା ଲୋକ ସଭା ନିର୍ବାଚନରେ ମହାରାଷ୍ଟ୍ରରେ ଭାଜପା ନେତୃତ୍ୱାଧୀନ ଏନଡିଏ ମେଣ୍ଟ ଅସୁବିଧାର ସମ୍ମୁଖୀନ ହୋଇଥିଲେ। ଏଥି ସହିତ ଏନସିପି (ଶରଦ ଦଳ) ର ମହା ଅଗାଡି, ଶିବସେନା (ଉଦ୍ଧବ ଦଳ) ଏବଂ କଂଗ୍ରେସ ଭଲ ପ୍ରଦର୍ଶନ କରିଥିଲା। ଏଭଳି ପରିସ୍ଥିତିରେ ଅଜିତ ପାୱାରଙ୍କ ଏନଡିଏରେ ସ୍ଥିତି ଏତେ ସହଜ ନୁହେଁ। ରାଜନୈତିକ ସ୍ଥିତିକୁ ଦେଖିଲେ ସମସ୍ତଙ୍କ ମନରେ କେବଳ ଗୋଟିଏ ପ୍ରଶ୍ନ ଉଠୁଛୁ, ବିଧାନସଭା ନିର୍ବାଚନ ପୂର୍ବରୁ ମହାରାଷ୍ଟ୍ରରେ ରାଜନୈତିକ ସମୀକରଣ ବଦଳିବ କି?