ନୂଆଦିଲ୍ଲୀ,୧୦।୧୧: ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଅଜିତ ପାୱାର ଶୁକ୍ରବାର ଜାତୀୟତାବାଦୀ କଂଗ୍ରେସ ପାର୍ଟି ମୁଖ୍ୟ ଶରଦ ପାୱାରଙ୍କୁ ଭେଟିଛନ୍ତି। ଏହାର କିଛି ସମୟ ପରେ ଅଜିତ ପାୱାର ଦିଲ୍ଲୀରେ ପହଞ୍ଚିଥିବା ଜଣାପଡିଛି। ଏଠାରେ ସେ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କୁ ଭେଟି ପାରନ୍ତି।
ଦୁଇ ନେତାଙ୍କ ବୈଠକ ଏପରି ଏକ ସମୟରେ ହେବ ଯେତେବେଳେ ଅଜିତ ପାୱାର ଗ୍ରୁପ ଦିଲ୍ଲୀରେ ଏକ ବୈଠକ କରିବାର ସମ୍ଭାବନା ରହିଛି। ଏହା ବ୍ୟତୀତ ଅଜିତ ପାୱାର ଶରଦ ପାୱାରଙ୍କୁ ଭେଟିବା ପରେ ତୁରନ୍ତ ଶାହାଙ୍କୁ ଭେଟିବାକୁ ଦିଲ୍ଲୀ ଆସିବା ନେଇ ରାଜନୈତିକ ମହଲାରେ ଅନେକ କଳ୍ପନାଜଳ୍ପନା ଚାଲିଛି।
ତେବେ ସମସ୍ତ କଳ୍ପନାଜଳ୍ପନାକୁ ଖାରଜ କରି ଶରଦ ପାୱାରଙ୍କ ଭଉଣୀ ସରୋଜ ପାଟିଲ କହିଛନ୍ତି ଯେ, ସମସ୍ତ ସାକ୍ଷାତ ଏକ ପାରିବାରିକ ସମ୍ପର୍କ। ଜନ୍ମଦିନ ହେତୁ ଶରଦ ପାୱାର ଏବଂ ଅଜିତ ପାୱାରଙ୍କର ପ୍ରତାପରାଓ ପାୱାରଙ୍କ ଘରେ ସାକ୍ଷାତ ହୋଇଛି। ଅନ୍ୟପଟେ, ଅଜିତ ପାୱାର ଅମିତ ଶାହାଙ୍କୁ ଭେଟି ମରାଠା ସଂରକ୍ଷଣ ପ୍ରସଙ୍ଗରେ ଆଲୋଚନା କରିପାରନ୍ତି ବୋଲି କହାଯାଉଛି।
