ଆରଡି,୨।୨(ଡି.ଏନ.ଏ.) କୋଭିଡ୍ କଟକଣା ଯୋଗୁ ବନ୍ଦ ଥିବା ଭଦ୍ରକ ଜିଲା ଆରଡ଼ିସ୍ଥିତ ପ୍ରସିଦ୍ଧ ଶୈବପୀଠ ବାବା ଆଖଣ୍ଡଳମଣିଙ୍କ ମନ୍ଦିର ମଙ୍ଗଳବାର ଖୋଲିଛି। ଭୋର ୫ଟାରେ ମଙ୍ଗଳ ଆଳତି ପରେ ବାବାଙ୍କୁ ଦିଗମ୍ବର ବେଶରେ ସଜ୍ଜିତ କରାଯାଇଥିଲା। ସକାଳ ୬ଟାରେ ସର୍ବସାଧାରଣ ଦର୍ଶନ ନିମନ୍ତେ ମନ୍ଦିର ଖୋଲା ଯାଇଥିଲା। ଭକ୍ତମାନେ ଶୃଙ୍ଖଳାର ସହିତ ପ୍ରଭୁଙ୍କୁ ଦର୍ଶନ କରିଥିଲେ। ତେବେ ସୋମବାର ରାତିରେ ମନ୍ଦିର ଖୋଲାଯିବା ସମ୍ପର୍କରେ ଜିଲା ପ୍ରଶାସନ ନିଷ୍ପତ୍ତି ନେଇଥିବାରୁ ଖବର ପାଇ ନ ପାରି କମ୍ ସଂଖ୍ୟକ ଭକ୍ତ ବାବାଙ୍କ ଦର୍ଶନ କରିଥିଲେ। ମାସ୍କ ପିନ୍ଧି ମନ୍ଦିରରେ ପ୍ରବେଶ କରିବାକୁ ମନ୍ଦିର କର୍ମଚାରୀମାନେ ଆଗନ୍ତୁକ ଶ୍ରଦ୍ଧାଳୁମାନଙ୍କୁ ପରାମର୍ଶ ଦେଉଥିବା ଦେଖିବାକୁ ମିଳିଥିଲା। ଅପରାହ୍ଣରେ ବାବାଙ୍କୁ ଯୋଗୀବେଶ ଓ ସନ୍ଧ୍ୟାରେ ବଡସିଂହାର ବେଶରେ ସଜ୍ଜିତ କରାଯାଇଥିଲା। ପ୍ରାୟ ୧ ମାସ ପାଖାପାଖି ମନ୍ଦିର ବନ୍ଦଥିବାରୁ ଏହି ବେଶ ଦର୍ଶନ କରିବାରୁ ଭକ୍ତମାନେ ବଞ୍ଚିତ ହୋଇଥିଲେ। ପୁଣି ଥରେ ମନ୍ଦିର ଖୋଲିଥିବାରୁ ଭଦ୍ରକ ଉପଜିଲାପାଳ ମନୋଜ କୁମାର ପାତ୍ର, ମନ୍ଦିର ପରିଚାଳକ ବିଦ୍ୟାଧର ପଲାଇ ସ୍ଥାନୀୟ ଅଧିବାସୀ,ସେବାୟତ ତଥା ଶ୍ରଦ୍ଧାଳୁମାନଙ୍କୁ କୃତଜ୍ଞତା ଜଣାଇଛନ୍ତି। ଏଥିସହିତ କୋଭିଡ୍ ନିୟମ ପାଳନ କରି ପୀଠରେ ସମସ୍ତ କାର୍ଯ୍ୟ ପରିଚାଳନା କରିବାକୁ ଏହି ଅଧିକାରୀ ଦ୍ୱୟ ନିବେଦନ କରିଛନ୍ତି।
