ଲକ୍ଷ୍ନୌ,୧୭।୧: ଆସନ୍ତା ଫେବୃୟାରୀରେ ହେବାକୁ ଥିବା ନିର୍ବାଚନ ଲାଗି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ତାଙ୍କ ଘରୋଇ ଆସନ ଗୋରଖପୁର (ସହର)ରୁ ଟିକେଟ୍ ଦେବାକୁ ନିଷ୍ପତ୍ତି ନେଇଛି ଭାଜପା। ଏଥିଯୋଗୁ ବର୍ତ୍ତମାନ ବିଧାୟକ ରାଧା ମୋହନ ଅଗ୍ରଓ୍ବାଲଙ୍କୁ ସମାଜବାଦୀ ପାର୍ଟି (ସପା) ଟିକେଟ୍ ଯାଚିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ।
ଅନ୍ନ ସଙ୍କଳ୍ପ ଦିବସ ଅବସରରେ ଦଳୀୟ କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ଭାଜପାର ଗୋରଖପୁର (ସହର) ବିଧାୟକ ଅଗ୍ରଓ୍ବାଲଙ୍କ ସମ୍ପର୍କରେ ପ୍ରଶ୍ନ କରାଯାଇଥିଲା। ସପା ମୁଖ୍ୟ ଉତ୍ତରରେ କହିଥିଲେ, ଯଦି ସେ ଇଚ୍ଛୁକ ତେବେ ତାଙ୍କୁ ସପା ତାଙ୍କୁ ଟିକେଟ୍ ଦେବ। ଉଲ୍ଲେଖଯୋଗ୍ୟ, ଗୋରଖପୁର ସହର ଆସନରୁ ୨୦୦୨ରୁ ଅଗ୍ରଓ୍ବାଲ ବିଧାୟକ ଅଛନ୍ତି।
“ମୋର ମୁଖ୍ୟମନ୍ତ୍ରୀଙ୍କ ଶପଥ ଗ୍ରହଣ ଉତ୍ସବ କଥା ମନେ ଅଛି। ସେଠାରେ ମୁଁ ରାଧା ମୋହନ ଅଗ୍ରଓ୍ବାଲଙ୍କୁ ଭେଟିଥିଲି। ତାଙ୍କୁ ସିଟ୍ ନ ମିଳିବାରୁ ସେ ଛିଡ଼ା ହୋଇଥିଲେ। ଭାଜପା ସରକାରରେ ତାଙ୍କୁ ସବୁଠୁ ଅଧିକ ଅସମ୍ମାନିତ କରାଯାଇଛି। ଆମେ ସଭିଙ୍କୁ ଟିକେଟ୍ ଦେଇପାରିବୁ ନାହିଁ। ଭାଜପା ତା’ର ଟିକେଟ୍ ଦେଇପାରେ। ଆମେ କାହାକୁ ସପା ଭିତରକୁ ନେଇପାରିବୁ ନାହିଁ। କିନ୍ତୁ ଯଦି ଅଗ୍ରଓ୍ବାଲଙ୍କ କଥା ଉଠୁଛି, ତେବେ ତାଙ୍କୁ ଟିକେଟ୍ ଦିଆଯାଇପାରେ ” ବୋଲି ଅଖିଳେଶ କହିଛନ୍ତି।
