କରାଚୀ, ୨୩।୭: କରୋନା ମହାମାରୀ ଯୋଗୁ ଚଳିତ ବର୍ଷ ଅନୁଷ୍ଠିତ ହେବାକୁ ଥିବା ଆଇସିସି ଟି୨୦ ବିଶ୍ୱକପ୍ ସ୍ଥଗିତ ହୋଇଛି। ଏହା ଆସନ୍ତା ଅକ୍ଟୋବରରେ ଅଷ୍ଟ୍ରେଲିଆରେ ଆୟୋଜିତ ହେବାର କାର୍ଯ୍ୟସୂଚୀ ରହିଥିଲା। କିନ୍ତୁ କରୋନା ଭାଇରସ୍ର ପ୍ରକୋପକୁ ଦୃଷ୍ଟିରେ ରଖି କ୍ରିକେଟ୍ର ସର୍ବୋଚ୍ଚ ସଂସ୍ଥା ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) ଏହାକୁ ସ୍ଥଗିତ ରଖିବାକୁ ନିକଟରେ ନିଷ୍ପତ୍ତି ନେଇଥିଲା। ଏହି ଟି୨୦ ବିଶ୍ୱକପ୍ ଆସନ୍ତା ବର୍ଷ ଅନୁଷ୍ଠିତ ହେବ ବୋଲି ନିକଟରେ ଏକ ବୈଠକରେ ଆଇସିସି ପକ୍ଷରୁ ଘୋଷଣା କରାଯାଇଥିଲା। ତେବେ ଆଇସିସିର ଏହି ନିଷ୍ପତ୍ତିକୁ ନେଇ ପ୍ରାକ୍ତନ ପାକିସ୍ତାନ ଦ୍ରୁତ ବୋଲର ସୋଏବ ଅଖତର୍ ଏକ ସଙ୍ଗୀନ ଅଭିଯୋଗ ଆଣିଛନ୍ତି। ବିଶ୍ୱକପ୍ ସ୍ଥଗିତ ଲାଗି ସେ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (ବିସିସିଆଇ)କୁ ଦାୟୀ କରିଛନ୍ତି। ଆଇପିଏଲ୍ ଆୟୋଜନ କରିବା ଲକ୍ଷ୍ୟରେ ବିସିସିଆଇ ବିଶ୍ୱକପ୍କୁ ସ୍ଥଗିତ ରଖିଛି ବୋଲି ଅଖତର୍ ଅଭିଯୋଗ କରିଛନ୍ତି। ସର୍ବଦା ବିବାଦୀୟ ବୟାନ ଦେଇ ଚର୍ଚ୍ଚାରେ ରହିବାକୁ ପସନ୍ଦ କରୁଥିବା ଅଖତର୍ ପାକିସ୍ତାନ ଗଣମାଧ୍ୟମକୁ ସାକ୍ଷାତ୍କାର ଦେବା ଅବସରରେ କହିଛନ୍ତି, ‘ବିସିସିଆଇ ଆଇପିଏଲ୍ ଆୟୋଜନ କରିବା ଲାଗି ବିଶ୍ୱକପ୍କୁ ସ୍ଥଗିତ କରିଦେଇଛି। ବିଶ୍ୱକପ୍ ନ ହେଲେ ଏସିଆ କପ୍ ନିଶ୍ଚିତ ରୂପେ ଆୟୋଜିତ ହୋଇପାରିଥାନ୍ତା। ଭାରତ ଓ ପାକିସ୍ତାନ ପରସ୍ପର ବିପକ୍ଷରେ ଖେଳିବା ଲାଗି ଏହା ଏକ ସୁନ୍ଦର ସୁଯୋଗ ରହିଥିଲା। ଏହା ନ ହେବା ପଛରେ ବହୁତ କାରଣ ରହିଛି। ଯାହାକୁ ମୁଁ ଯିବାକୁ ଚାହୁଁ ନାହିଁ।’ ପାକିସ୍ତାନର ଏହି ପୂର୍ବତନ କ୍ରିକେଟର୍ ଆହୁରି ମଧ୍ୟ କହିଛନ୍ତି ଯେ, ‘ଟି୨୦ ବିଶ୍ୱକପ୍ ମଧ୍ୟ ଆୟୋଜିତ ହୋଇପାରିଥାନ୍ତା। କିନ୍ତୁ ମୁଁ ପ୍ରଥମରୁ କହିଛି ଯେ ସେମାନେ ଏହାକୁ ହେବାକୁ ଦେବେ ନାହିଁ। ବିଶ୍ୱକପ୍ ନର୍କକୁ ଯାଉ କିନ୍ତୁ ଆଇପିଏଲ୍କୁ କ୍ଷତି ନ ପହଞ୍ଚତ୍ବା ଆବଶ୍ୟକ।’ ଏଠାରେ ଉଲ୍ଲେଖଯୋଗ୍ୟ, ବିଶ୍ୱକପ୍ ଆୟୋଜକ ଅଷ୍ଟ୍ରେଲିଆ କରୋନା ମହାମାରୀ ସମୟରେ ଏତେ ବଡ଼ ଇଭେଣ୍ଟ ଆୟୋଜନ କରିବାକୁ ଅସମର୍ଥ ହୋଇଥିଲା। କରୋନା ସମୟରେ ଏତେ ସଂଖ୍ୟକ ଖେଳାଳିଙ୍କୁ ସୁରକ୍ଷିତ ରଖିବା ସମ୍ଭବପର ନୁହେଁ ବୋଲି ପୂର୍ବରୁ କ୍ରିକେଟ୍ ଅଷ୍ଟ୍ରେଲିଆ ପକ୍ଷରୁ କୁହାଯାଇଥିଲା। ଯେଉଁଥି ପାଇଁ ବିଶ୍ୱକପ୍ ସ୍ଥଗିତ ରଖିବାକୁ ଆଇସିସି ନିଷ୍ପତ୍ତି ନେଇଥିଲା।