ନୂଆଦିଲ୍ଲୀ,୫।୧୧: ୟୁଏଇ ଏବଂ ଓମାନରେ ଚାଲିଥିବା ଆଇସିସି ଟି-୨୦ ବିଶ୍ୱକପ୍ର ପ୍ରାରମ୍ଭିକ ମୁକାବିଲାରେ ଖରାପ ପ୍ରଦର୍ଶନ କରିଥିଲା ଭାରତ। ପାକିସ୍ତାନ ଏବଂ ନ୍ୟୁଜିଲାଣ୍ଡ ବିପକ୍ଷ ଦୁଇ ମ୍ୟାଚ୍ରେ ପରାଜିତ ହୋଇଥିଲା ଦଳ। ଏହାକୁ ନେଇ ବିଶ୍ୱକପ୍ର ସେମିଫାଇନାଲ ମୁକାବିଲାରେ ପ୍ରବେଶ କରିବା ଭାରତ ପାଇଁ କଷ୍ଟକର ହୋଇପଡ଼ିଛି। ଭାରତୀୟ ଟିମ୍ର ଯାତ୍ରା ଗ୍ରୁପ୍ ମୁକାବିଲାରେ ହିଁ ସମାପ୍ତ ହୋଇଥିବା କୁହାଯାଉଛି। ହେଲେ ଦଳ ନିକଟରେ ତୃତୀୟ ମୁକାବିଲାରେ ଆଫଗାନିସ୍ତାନଠାରୁ ବିଜେତା ହୋଇଥିଲା। ଏବେ ପାକିସ୍ତାନର ପୂର୍ବ ଅଧିନାୟକ ଓ୍ବାସିମ ଆକ୍ରମ ଭାରତର ପ୍ରଦର୍ଶନକୁ ନେଇ ପ୍ରତିକ୍ରିୟା ଦେଇଛନ୍ତି।
ଏକ ସାକ୍ଷାତକାରରେ ଆକ୍ରମ କହିଛନ୍ତି, ଭାରତ ଶେଷଥର ପାଇଁ ମାର୍ଚ୍ଚରେ ସୀମିତ ଓଭର ସିରିଜ ଖେଳିଥିଲା। ଏଥିରେ ସମସ୍ତ ସିନିୟର ଖେଳାଳି ଥିଲେ। ଏବେ ଆମେ ନଭେମ୍ବରରେ। ଭାରତର ଖେଳକୁ ଦେଖିଲେ ଖେଳାଳିମାନେ ଅନ୍ତରାଷ୍ଟ୍ରୀୟ ସିରିଜ୍କୁ ଗମ୍ଭୀରତାର ସହ ନେଉ ନ ଥିବା ଦେଖାଯାଉଛି। ତାଙ୍କୁ ଆଇପିଏଲ୍ରେ ଖେଳିବା ପର୍ଯ୍ୟାପ୍ତ ବୋଲି ଲାଗୁଛି। ଦୁନିଆରେ ତୁମେ ଯେତେବି କ୍ରିକେଟ ଲିଗ୍ ଖେଳ, ଅନ୍ତରାଷ୍ଟ୍ରୀୟ କ୍ରିକେଟ ସବୁଠାରୁ ଅଲଗା ରହିବ। ଲିଗ୍ କ୍ରିକେଟରେ ବିରୋଧି ଟିମ୍ରେ ଜଣେ କିମ୍ବା ଦୁଇଜଣ ଭଲ ବୋଲର୍ଙ୍କ ସାମ୍ନା କରିବାକୁ ପଡ଼ିଥାଏ। ହେଲେ ଅନ୍ତରାଷ୍ଟ୍ରୀୟ କ୍ରିକେଟରେ ୫ଜଣ ପ୍ରଭାବୀ ବୋଲରଙ୍କ ସାମ୍ନା କରିବାକୁ ପଡ଼ିଥାଏ ବୋଲି ସେ କହିଛନ୍ତି।