ମୁମ୍ବାଇ: ବଲିଉଡ୍ ନାୟକ ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ପରେ ବଲିଉଡ୍ରେ ନେପୋଟିଜମକୁ ନେଇ ଆଲୋଚନା ଜାରି ରହିଛି। ଏମିତିକି ଏହାକୁ ନେଇ ସୋସିଆଲ ମିଡିଆରେ ମଧ୍ୟ ଖୁବ୍ ଚର୍ଚ୍ଚା ହେଉଛି। ଏହାକୁ ନେଇ ବଲିଉଡ୍ର କେତେଜଣ ଫିଲ୍ମ ନିର୍ମାତା, କଳାକାର ମଧ୍ୟ ସମାଲୋଚନାର ଶିକାର ହେଉଛନ୍ତି। ଯୁଜର୍ସ ନିର୍ଦ୍ଦେଶକ କରଣ ଜୋହର, ଏକତା କପୁର, ସଲମାନ ଖଁା, ଭୁଷଣ କୁମାର ଆଦିଙ୍କୁ ଲଗାତାର ଟ୍ରୋଲ କରୁଥିବା ଦେଖାଯାଇଛି। ଇତିମଧ୍ୟରେ ନାୟକ ଅକ୍ଷୟ କୁମାରଙ୍କର ଏକ ଭିଡିଓ ଏବେ ଭାଇରାଲ ହେବାରେ ଲାଗିଛି। ଯେଉଁଥିରେ ସେ କ୍ୟାରିୟର ଆରମ୍ଭରୁ ନେପୋଟିଜମର ଶିକାର ହୋଇଥିବା ଦେଖାଯାଇଛି। ଉକ୍ତ ଭିଡିଓରେ କେମିତି ଆଉ ଜଣେ ଅଭିନେତାଙ୍କ ପାଇଁ ରାତାରାତି ତାଙ୍କ ହାତରୁ ଗୋଟିଏ ପ୍ରୋଜେକ୍ଟ ଚାଲି ଯାଇଥିଲା ସେ କଥା ସେ କହିଛନ୍ତି। ଫିଲ୍ମ ‘ଫୁଲ ଔର କାଣ୍ଟେ’ରେ ପ୍ରଥମେ ଅକ୍ଷୟ ଅଭିନୟ କରିବାର ଥିଲା। ଫିଲ୍ମର ଯେତେ ଗୀତ ସବୁର ମେକିଂ ସମୟରେ ସେ ଉପସ୍ଥିତ ରହୁଥିଲେ। କିଛି ଫଟୋ ଶୁଟ୍ ସମୟରେ ମଧ୍ୟ ସେ ଥିଲେ। ରାତିରେ ସବୁ ପ୍ରସ୍ତୁତି ସରିଥିଲା ସକାଳେ ଶୁଟିଂ ପାଇଁ ଯାଇଥାଆନ୍ତେ ଅକ୍ଷୟ। ହେଲେ ଫୋନରେ ତାଙ୍କୁ ଆସିବାକୁ ମନା କରି ଦିଆଯାଇଥିଲା। ସୂଚନାଯୋଗ୍ୟ, ‘ଫୁଲ ଔର କାଣ୍ଟେ’ରେ ଅକ୍ଷୟଙ୍କ ସ୍ଥାନରେ ଅଭିନୟ କରିଥିଲେ ଅଜୟ ଦେବଗନ। ଏହା ସୁପରହିଟ୍ ହୋଇଥିଲା ମଧ୍ୟ। ଅଜୟ ଥିଲେ ବଲିଉଡ୍ର ବେଶ୍ ପରିଚିତ ଷ୍ଟଣ୍ଟମ୍ୟାନ ଭିରୁ ଦେବଗନଙ୍କ ପୁଅ। ଯାହା ହେଉ ଏହାପରେ ୧୯୯୧ରେ ଫିଲ୍ମ ‘ସୌଗନ୍ଧ’ରେ ଡେବ୍ୟୁ କଲେ ଅକ୍ଷୟ ଏହାପରେ ୧୯୯୨ରେ ‘ଖିଲାଡି’। ଆଉ ଏହାପରେ ସେ ଆଉ ପଛକୁ ଫେରି ନ ଥିଲେ। ଏବେ ସେ ବଲିଉଡ୍ର ଜଣେ ଆଗଧାଡିର ନାୟକ ତାଲିକାରେ ନିଜକୁ ସାମିଲ କରିପାରିଛନ୍ତି।
