ବମ୍ବେ: ଲଗାତାର ଭାବେ ଚର୍ଚ୍ଚାରେ ରହୁଛି ଅକ୍ଷୟ କୁମାରଙ୍କ ଫିଲ୍ମ ‘ରାମ ସେତୁ’। ଆସନ୍ତା ଦୀପାବଳିରେ ଏହା ପରଦାକୁ ଆସିବ। ନିକଟରେ ଏହାର ଟ୍ରେଲର ରିଲିଜ ହୋଇଥିଲା। ଏଥିରେ ଦର୍ଶକଙ୍କୁ ବ୍ୟାକ୍ଗ୍ରାଉଣ୍ଡରେ ଚାଲୁଥିବା ‘ଜୟ ଶ୍ରୀରାମ’ ଗୀତ ବେଶ ପସନ୍ଦ ଆସିଥିଲା। ଉତ୍ସାହକୁ ଦେଖି ନିର୍ମାତା ଏହି ଗୀତକୁ ଗୁରୁବାର ରିଲିଜ କରିଥିଲେ। ଏଯାବତ ୟୁଟ୍ୟୁବ୍ରେ ଏହାକୁ ୧୦ ମିଲିୟନରୁ ଅଧିକ ଲୋକ ଦେଖିସାରିଲେଣି। ଏସବୁ ମଧ୍ୟରେ ଏବେ ଫିଲ୍ମର ଅଭିନେତା ଅକ୍ଷୟ କୁମାରଙ୍କ ବ୍ୟବହାର ଏବେ ସମସ୍ତଙ୍କ ହୃଦୟ ଜିଣିଛି।
ଗୀତର ଲଞ୍ଚ ସମାରୋହରେ ଅକ୍ଷୟ ପ୍ରଶଂସକଙ୍କ ସହ କଥା ହୋଇଥିଲେ। ପରେ ସେ ନିଜେ ‘ଜୟ ଶ୍ରୀରାମ’ ଗୀତ ଗାଇବେ ବୋଲି କହିଥିଲେ। ଏମିତି କରିବା ପୂର୍ବରୁ ସେ ନିଜର ଚପଲ ଓହ୍ଲାଇଥିଲେ। ଗୀତ ଲଞ୍ଚ ହେବା ପରେ ସେ ମଧ୍ୟ ଷ୍ଟେଜରେ ଗୀତ ଗାଉଥିବା ଦେଖାଯାଇଛି। ଏହି ଘଟଣାର ଭିଡିଓ ଏବେ ବେଶ ଭାଇରାଲ ହେଉଛି। ବଡ଼ ଅଭିନେତା ହେଲେ ହେଁ ସେ ହିନ୍ଦୁ ପରମ୍ପରାକୁ ସମ୍ମାନ ଜଣାଇଥାନ୍ତି। ଏହାକୁ ନେଇ ସୋସିଆଲ ମିଡିଆରେ ତାଙ୍କୁ ବେଶ ପସନ୍ଦ କରାଯାଉଛି।
‘ରାମ ସେତୁ’ ବିଷୟରେ କଥା ହେଲେ ଏହା ଚଳିତ ବର୍ଷ ରିଲିଜ ହୋଇଥିବା ଅକ୍ଷୟଙ୍କ ଚତୁର୍ଥ ଫିଲ୍ମ। ଏହା ପୂର୍ବରୁ ରିଲିଜ ହୋଇଥିବା ଅକ୍ଷୟଙ୍କ ତିନୋଟିଯାକ ଫିଲ୍ମ ଫ୍ଲପ ହୋଇଛି। ଏଣୁ ଏହି ଫିଲ୍ମ ଉପରେ ପ୍ରଶଂସକଙ୍କ ଆଶା ରହିଛି।