ବେରୁଟ, ୧୩ା୯: ଆତଙ୍କବାଦୀ ସଙ୍ଗଠନ ଅଲ୍-କାଏଦା ମୁଖ୍ୟ ଆୟାମାନ୍ ଅଲ୍-ଜଓ୍ବାହିରିଙ୍କୁ ଏକ ଭିଡିଓରେ ଦେଖିବାକୁ ମିଳିଛି। ତେଣୁ ଏବେ ବି ସେ ଜୀବିତ ଥିବା ନେଇ ସନ୍ଦେହ ବଢ଼ିଛି। କିଛି ମାସ ହେଲା ତାଙ୍କ ମୃତ୍ୟୁକୁ ନେଇ ଚର୍ଚ୍ଚା ଲାଗି ରହିଥିଲା। ୯/୧୧ ଆକ୍ରମଣର ୨୦ ବର୍ଷ ପୂର୍ତ୍ତି ଅବସରରେ ଅଲ-କାଏଦା ପକ୍ଷରୁ ୬୧ ମିନିଟ୍ର ଏକ ଭିଡିଓ ଜାରି କରାଯାଇଛି। ‘ଜେରୁଜୁଲମ୍ର ଜିହାଦୀକରଣ ହେବ ନାହିଁ’ ବୋଲି ଏହାର ଶୀର୍ଷକ ରହିଛି। ଆମେରିକା ୨୦୧୧ରେ ଅଲ-କାଏଦା ମୁଖ୍ୟ ଓସାମା ବିନ୍ ଲାଡେନ୍ଙ୍କୁ ହତ୍ୟା କରିଥିଲା। ଏହା ପରେ ଇଜିପ୍ଟ ବାସିନ୍ଦା ଅଲ୍ଜଓ୍ବାହିରିଙ୍କୁ ଅଲ-କାଏଦା ମୁଖ୍ୟ କରାଯାଇଥିଲା।
ସଙ୍ଗଠନଗୁଡ଼ିକର ଅନ୍ଲାଇନ ଗତିବିଧି ଉପରେ ନଜର ରଖୁଥିବା ଗୋଇନ୍ଦା ଗ୍ରୁପ୍ ଏସ୍ଆଇଟିଇ ପକ୍ଷରୁ ଅଲ୍ଜଓ୍ବାହିରିଙ୍କ ମୁହଁ ଉକ୍ତ ଭିଡିଓରେ ଦେଖିବାକୁ ମିଳିଥିବା ସୂଚନା ଦିଆଯାଇଛି। ଏଥିରେ ସେ ଜାନୁୟାରୀ ୧ରେ ସିରିଆରେ ରୁଷିଆ ସୈନ୍ୟଙ୍କ ଉପରେ ଅଲ୍-କାଏଦାର ଆକ୍ରମଣକୁ ପ୍ରଶଂସା କରିଛନ୍ତି। ୨୦ ବର୍ଷ ପରେ ଆଫଗାନିସ୍ତାନରୁ ଆମେରିକା ସୈନ୍ୟ ପ୍ରତ୍ୟାହାର କଥା ମଧ୍ୟ ସେ ଉଠାଇଛନ୍ତି। ତେବେ ଅଲ୍ଜଓ୍ବାହିରିଙ୍କ ଏହି ମନ୍ତବ୍ୟ ପୁରୁଣା ହୋଇଥାଇପାରେ ବୋଲି ଏସ୍ଆଇଟିଇ କହିଛି। କାରଣ ଗତ ମାସରେ ତାଲିବାନ୍ ଆଫଗାନିସ୍ତାନ ଉପରେ କବ୍ଜା କରିବା ବାବଦରେ ସେ କିଛି ପ୍ରତିକ୍ରିୟା ଦେଇନାହାନ୍ତି।
ଶେଷ ଆଡ଼କୁ ଅସୁସ୍ଥତା କାରଣରୁ ଅଲଜଓ୍ବାହିରିଙ୍କ ମୃତ୍ୟୁ ହୋଇଥିବା ନେଇ ରିପୋର୍ଟ ପ୍ରକାଶ ପାଇଥିଲା। ଏହାପରଠାରୁ ତାଙ୍କର କୌଣସି ଫଟୋ, ଭିଡିଓ କିମ୍ବା ଜୀବିତ ଥିବାର ପ୍ରମାଣ ସାମ୍ନାକୁ ଆସି ନ ଥିଲା। ଦୋହା ଚୁକ୍ତି ପରଠାରୁ ଆଫଗାନିସ୍ତାନରୁ ଆମେରିକୀୟ ସୈନ୍ୟ ପ୍ରତ୍ୟାହାର ସ୍ଥିର ହୋଇଥିଲା। ତେଣୁ ଏହା ପୁରୁଣା ଭିଡିଓ ହୋଇଥାଇପାରେ ଏବଂ ଅଲଜଓ୍ବାହିରି ଜୀବିତ ନ ଥାଇ ପାରନ୍ତି ବୋଲି ଏସ୍ଆଇଟିଇ ନିର୍ଦ୍ଦେଶିକା ରିଟା କାଟ୍ଜ ଟୁଇଟ କରିଛନ୍ତି।
