ମୁମ୍ବାଇ: ସାଉଥ୍ ସୁପରଷ୍ଟାର ଅଲ୍ଲୁ ଅର୍ଜୁନଙ୍କ ଫିଲ୍ମ ପୁଷ୍ପା ସଫଳତା ପାଇବା ପରେ ଫିଲ୍ମ ନିର୍ମାତା ଅଲ୍ଲୁଙ୍କ ସୁପରହିଟ୍ ଫିଲ୍ମ ‘ବୈକୁଣ୍ଠପୁରମୁଲୋ’ ଜାନୁୟାରୀ ୨୬ରେ ହିନ୍ଦୀ ଭର୍ସନରେ ରିଲିଜ୍ ହେବାକୁ ଘୋଷଣା କରାଯାଇଥିଲା। ତେବେ କୋଭିଡ୍ ପରିସ୍ଥିତିକୁ ନଜରରେ ରଖି ଫିଲ୍ମ ନିର୍ମାତା ଏହାର ରିଲିଜ୍ ତାରିଖକୁ ବାତିଲ୍ କରିଦେଇଛନ୍ତି। ନିକଟରେ ଫିଲ୍ମ ଶେହଜାଦାର ନିର୍ମାତା ‘ବୈକୁଣ୍ଠପୁରମୁଲୋ’ ର ହିନ୍ଦୀ ଭର୍ସନ ରିଲିଜ୍ ନ କରିବାକୁ ଅନୁରୋଧ କରିଥିଲେ। କାହିଁକି ନା ‘ବୈକୁଣ୍ଠପୁରମୁଲୋ’ର ହିନ୍ଦୀ ରିମେକ ହେଉଛି ଫିଲ୍ମ ଶେହଜାଦା। ତେବେ ‘ବୈକୁଣ୍ଠପୁରମୁଲୋ’ ର ହିନ୍ଦୀ ଭର୍ସନ ରିଲିଜ୍ ହେଲେ ଫିଲ୍ମ ଶେହଜାଦା ଉପରେ ଏହାର ପ୍ରଭାବ ପଡିପାରେ ବୋଲି କୁହାଯାଉଥିଲା। ଆସନ୍ତା ନଭେମ୍ବର ୪ରେ ଫିଲ୍ମ ଶେହଜାଦା ରିଲିଜ୍ ହେବାର ଅଛି। ତେବେ ଫିଲ୍ମ ‘ବୈକୁଣ୍ଠପୁରମୁଲୋ’ର ରିଲିଜ୍ ତାରିଖ ବାତିଲ୍ ଘୋଷଣା କରାଯିବା ପରେ ଶେହଜାଦାର ଟିମ୍ ମନୀଷ ଶାହାଙ୍କୁ ଧନ୍ୟବାଦ ଜଣାଇଲେ।