ବ୍ରହ୍ମଗିର,୧୦।୬(ଡି.ଏନ୍.ଏ): ଅଲାରନାଥଙ୍କ ଅନବସର ଦର୍ଶନ ସମୟରେ ଭକ୍ତଙ୍କୁ ଗର୍ଭଗୃହକୁ ମନା। ଭକ୍ତମାନେ ଅର୍ଦ୍ଦଳି ନିକଟରୁ ଠାକୁରଙ୍କୁ ଦର୍ଶନ କରିବେ। ହାଇକୋର୍ଟଙ୍କ ନିର୍ଦ୍ଦେଶ ପରେ ଶୁକ୍ରବାର ବ୍ରହ୍ମଗିରି ତହସିଲଦାର ସ୍କୃତିରଞ୍ଜନ ଶତପଥୀ ଏକ ଖବରଦାତା ସମ୍ମିଳନୀରେ ଜଣାଇବା ସହିତ କାର୍ଯ୍ୟକାରୀ କରାଯାଇଛି। ପ୍ରକାଶ ଯେ, ଅଲାରନାଥ ମନ୍ଦିରରେ ଗର୍ଭଗୃହ ସଙ୍କୀର୍ଣ୍ଣ ହୋଇଥିବା ବେଳେ ପ୍ରବେଶ ଓ ପ୍ରସ୍ଥାନ ଦ୍ୱାର ଗୋଟିଏ ରହିଛି। ଅନବସର ସମୟରେ ଲକ୍ଷାଧିକ ଭକ୍ତଙ୍କ ସମାଗମ ହୋଇଥାଏ। ଫଳରେ ଦର୍ଶନ ପାଇଁ ଭକ୍ତଙ୍କୁ ଦୀର୍ଘ ସମୟ ଅପେକ୍ଷା କରିବାକୁ ପଡିଥାଏ। ଅନ୍ୟପକ୍ଷରେ ଗର୍ଭଗୃହକୁ ଭକ୍ତମାନେ ଦର୍ଶନ କରିବାକୁ ଯିବା ଦ୍ୱାରା ବାହାରେ ଭକ୍ତମାନେ ଘଣ୍ଟା ଘଣ୍ଟା ଅପେକ୍ଷା କରିବା ଅସହ୍ୟ ହୋଇପଡ଼େ। ତେଣୁ ଗର୍ଭଗୃହକୁ ଯାଇ ଦର୍ଶନ କରିବାକୁ କେତେଜଣ ସେବାୟତ ବିରୋଧ କରିଥିଲେ। ଏନେଇ ଏହି ସେବାୟତଙ୍କ ମଧ୍ୟରୁ ମଧୁସୂଦନ ପୂଜାପଣ୍ଡା ହାଇକୋର୍ଟରେ ଏକ ପିଟିଶନ୍ ଦାଏର କରିଥିଲେ। ହାଇକୋର୍ଟ ଏକ ରାୟ ପ୍ରକାଶ କରି ଅନବସର ସମୟରେ ମନ୍ଦିରର ଗର୍ଭଗୃହକୁ ଭକ୍ତମାନେ ନ ଯାଇ ଅର୍ଦ୍ଦଳିଠାରୁ ଦର୍ଶନ କରିବେ ବୋଲି ନିର୍ଦ୍ଦେଶ ଦେଇଛନ୍ତି ା ଏହାସହ ବୟସ୍କ ବ୍ୟକ୍ତି ଓ ଦିବ୍ୟାଙ୍ଗମାନଙ୍କ ପାଇଁ ହୁଇଲଚେୟାର, ଭ୍ରାମ୍ୟମାଣ ଶୌଚାଳୟ ଆଦିର ବ୍ୟବସ୍ଥା କରିବାକୁ ନିର୍ଦ୍ଦେଶନାମା ରହିଛି ା ଏହି ଦର୍ଶନ ସମୟରେ ମନ୍ଦିରର ନୀତିକାନ୍ତି ଅନୁଯାୟୀ ମଧ୍ୟାହ୍ନରେ ମଧ୍ୟାହ୍ନ ଧୂପ ହେଉଥିବାରୁ ପ୍ରାୟ ଏକ ଘଣ୍ଟାରୁ ଊର୍ଦ୍ଧ୍ୱ ସମୟ ଧରି ମନ୍ଦିରରେ ସର୍ବସାଧାରଣ ଦର୍ଶନ ବନ୍ଦ ରହିଥାଏ। ଫଳରେ ଧାଡ଼ିରେ ଥିବା ଭକ୍ତମାନେ ଖରାରେ ଛିଡ଼ାହୋଇଥାନ୍ତି। ଏହି ସମୟରେ ଭକ୍ତମାନେ ଧାଡିରେ ନ ରହିବାକୁ ଅନୁରୋଧ କରାଯାଇଛି। ଶୃଙ୍ଗଳିତ ଦର୍ଶନ ପାଇଁ ସେବାୟତମାନଙ୍କ ସହ ଏକ ସମନ୍ବୟ ବୈଠକ କରାଯାଇ ନୀତିନିର୍ଘଣ୍ଟ କରାଯିବ ବୋଲି ତହସିଲଦାର ସୂଚନା ଦେଇଛନ୍ତି। ଖବରଦାତା ସମ୍ମିଳନୀରେ ବ୍ରହ୍ମଗିରି ଥାନା ଅଧିକାରୀ ଦିଲୀପ କୁମାର ଧଳ, ବ୍ରହ୍ମଗିରି ବିଡିଓ ପ୍ରଦ୍ୟୁମ୍ନ ନାୟକ ପ୍ରମୁଖ ଉପସ୍ଥିତ ଥିଲେ।
