ଓ୍ବିମ୍ବେଲଡନ,୧୩ା୭: ଡିଫେଣ୍ଡିଂ ଚାମ୍ପିୟନ ସ୍ପେନ୍ର କାର୍ଲୋସ ଅଲ୍କାରାଜ ଚଳିତ ଓ୍ବିମ୍ବେଲଡନ ଓପନ ଗ୍ରାଣ୍ଡସ୍ଲାମ ଟେନିସ ପୁରୁଷ ସିଙ୍ଗଲ୍ସ ଫାଇନାଲରେ ପ୍ରବେଶ କରିଛନ୍ତି। ଶୁକ୍ରବାର ସେଣ୍ଟର କୋର୍ଟରେ ଅନୁଷ୍ଠିତ ପ୍ରଥମ ସେମିଫାଇନାଲରେ ସେ ବିନା ପତାକାରେ ଖେଳୁଥିବା ରୁଷିଆର ଡାନିଲ ମେଡଭେଡେଭଙ୍କୁ ୬-୭ (୧/୭), ୬-୩, ୬-୪, ୬-୪ ସେଟ୍ରେ ପରାସ୍ତ କରିଛନ୍ତି। ଟାଇବ୍ରେକରରେ ଶେଷ ହୋଇଥିବା ପ୍ରଥମ ସେଟ୍ରେ ବାଜି ମାରିଥିଲେ ମେଡଭେଡେଭ। ମାତ୍ର ଅଲ୍କାରାଜ ସଫଳ ପ୍ରତ୍ୟାବର୍ତ୍ତନ କରି ପରବର୍ତ୍ତୀ ୩ଟି ସେଟ୍କୁ ଜିତି ନେଇଥିଲେ। ଫଳରେ ମେଡଭେଡେଭଙ୍କ ଅଭିଯାନ ଏଠାରୁ ଶେଷ ହୋଇଛି।
ଚଳିତ ବର୍ଷ ଫ୍ରେଞ୍ଚ୍ ଓପନ ଜିତି ସାରିଥିବା ଅଲ୍କାରାଜ ଦ୍ୱିତୀୟ ଥରପାଇଁ ଓ୍ବିମ୍ବେଲଡନ ଗ୍ରାଣ୍ଡସ୍ଲାମ ଟାଇଟଲ ବିଜୟର ଦ୍ୱାରରେ ପହଞ୍ଚତ୍ ଯାଇଛନ୍ତି। ସେ ୨୦୨୩ରେ ମଧ୍ୟ ଏଠାରେ ଚାମ୍ପିୟନ ହୋଇଥିଲେ। ୨୦୨୨ରେ ସେ ୟୁଏସ୍ ଓପନ ଟାଇଟଲ ହାସଲ କରିଥିଲେ। ଫାଇନାଲରେ ସେ ଇଟାଲିର ଲୋରେଞ୍ଜୋ ମୁସେଟି କିମ୍ବା ସର୍ବିୟାର ନୋଭାକ୍ ଜୋକୋଭିଚ୍ଙ୍କୁ ଭେଟିବେ। ମୁସେଟି ପ୍ରଥମଥରପାଇଁ କୌଣସି ଗ୍ରାଣ୍ଡସ୍ଲାମର ସେମିଫାଇନାଲରେ ପ୍ରବେଶ କରିଥିବାବେଳେ ଜୋକୋଭିଚ୍ ୭ ଥର ୨୦୧୧, ୨୦୧୪, ୨୦୧୫, ୨୦୧୮, ୨୦୧୯, ୨୦୨୧ ଓ ୨୦୨୨ରେ ଓ୍ବିମ୍ବେଲଡନ ଚାମ୍ପିୟନ ହୋଇ ସାରିଛନ୍ତି। ପ୍ରକାଶ ଯୋଗ୍ୟ ଯେ, ଇଟାଲୀର ଜସ୍ମିନ୍ ପାଓଲିନି ଓ ଚେକ୍ ରିପବ୍ଲିକର ବାର୍ବରା କ୍ରେଜିକୋଭା ଚଳିତ ବର୍ଷର ମହିଳା ସିଙ୍ଗଲ୍ସ ଫାଇନାଲରେ ପ୍ରବେଶ କରିଛନ୍ତି। କ୍ରୋଏସିଆର ଡୋନ୍ନା ଭେକିକଙ୍କୁ ହରାଇ ଜସ୍ମିନ୍ ପାଓଲିନି ଓ କାଜାଖସ୍ତାନର ଏଲିନା ରିବାକିନାଙ୍କୁ ହରାଇ ବାର୍ବରା କ୍ରେଜିକୋଭା ପ୍ରଥମ ଥର ପାଇଁ ଓ୍ବିମ୍ବେଲଡନ୍ ଫାଇନାଲରେ ପହଞ୍ଚିଛନ୍ତି।