ଓ୍ବିମ୍ବେଲଡନ୍, ୫ା୭ (ପି.ଟି.): ସର୍ବପୁରାତନ ଟେନିସ୍ ଗ୍ରାଣ୍ଡସ୍ଲାମ ଓ୍ବିମ୍ବେଲଡନ୍ର ଦ୍ୱିତୀୟ ଦିନରେ ବର୍ଷା କାରଣରୁ ଏକାଧିକ ମ୍ୟାଚ୍ ବାଧାପ୍ରାପ୍ତ ହୋଇଛି। ତେବେ ପୁରୁଷ ଟପ୍ ସିଡ୍ ଖେଳାଳି କାର୍ଲୋସ୍ ଅଲକାରାଜ ଗାର୍ଫିଆ, ଜାନିକ୍ ସିନ୍ନର ଓ ମହିଳା ସିଙ୍ଗଲ୍ସରେ ଡିଫେଣ୍ଡିଂ ଚାମ୍ପିୟନ ଏଲିନା ରିବାକିନା ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି। ପୁରୁଷ ବର୍ଗରେ ମାତ୍ର ଦୁଇଟି ମ୍ୟାଚ୍ ଖେଳ ହେବା ସମ୍ଭବ ହୋଇଥିବା ବେଳେ ମହିଳା ବର୍ଗରେ ମଧ୍ୟ ମାତ୍ର ଗୋଟିଏ ମ୍ୟାଚ୍ ସମ୍ପୂର୍ଣ୍ଣ ହୋଇଥିଲା। ଟପ୍ ସିଡ୍ ରହିଥିବା ଅଲକାରାଜ ଫ୍ରାନ୍ସର ଜେରେମି ଚାର୍ଡିଙ୍କୁ ୬-୦, ୬-୨ ଓ ୭-୫ରେ ପରାସ୍ତ କରିଥିଲେ। ପ୍ରଥମ ସେଟ୍କୁ ୬-୦ରେ ଜିତିବା ପରେ ଦ୍ୱିତୀୟ ସେଟ୍କୁ ମଧ୍ୟ ଏକପାଖିଆ ଭାବେ ଜିତି ନେଇଥିଲେ ଅଲକାରାଜ। ନିର୍ଣ୍ଣାୟକ ସେଟ୍ରେ ଏକଦା ମ୍ୟାଚ୍ ୫-୫ ସ୍ଥିତିରେ ରହିଥିଲେ ମଧ୍ୟ ଅଲକାରାଜ ୭-୫ରେ ମ୍ୟାଚ୍କୁ ଜିତି ନେଇଥିଲେ। ୧ ଘଣ୍ଟା ୫୩ ମିନିଟ ସମୟ ନେଇ ସେ ଏହି ମ୍ୟାଚକୁ ଜିତି ନେବା ସହିତ ଦ୍ୱିତୀୟ ରାଉଣ୍ଡରେ ପ୍ରବେଶ କରିଥିଲେ।
ପୁରୁଷ ସିଙ୍ଗଲ୍ସରେ ସମାପ୍ତ ହୋଇଥିବା ଅନ୍ୟ ମ୍ୟାଚ୍ଟିରେ ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି ଅଷ୍ଟମ ସିଡ୍ ଜାନିକ୍ ସିନ୍ନର। ଆର୍ଜେଣ୍ଟିନାର ଜୁଆନ୍ ମାନୁଏଲ ସେରୁଣ୍ଡୋଲୋଙ୍କୁ ସେ .୬-୨, ୬-୨ ଓ ୬-୨ର ସିଧାସଳଖ ସେଟ୍ରେ ପରାସ୍ତ କରିଥିଲେ। ଅନ୍ୟ ସିଡେଡ ଖେଳାଳିଙ୍କ ମଧ୍ୟରେ ଷ୍ଟିଫାନୋସ୍ ସିତ୍ସିପାସ ଓ ହୋଲ୍ଗର ରୁନଙ୍କ ପରି ସିଡେଡ ଖେଳାଳିଙ୍କ ବର୍ଷା କାରଣରୁ ବନ୍ଦ ରହିଛି।
ମହିଳା ସିଙ୍ଗଲ୍ସରେ ମାତ୍ର ଗୋଟିଏ ମ୍ୟାଚ୍ ସମ୍ପୂର୍ଣ୍ଣ ହୋଇଥିଲା। ଡିଫେଣ୍ଡିଂ ଚାମ୍ପିୟନ୍ କାଜାଖସ୍ତାନର ଏଲିନା ରିବାକନା ଏହି ମ୍ୟାଚରେ ଆମେରିକାର ସେଲ୍ବି ରୋଜର୍ସଙ୍କୁ ୪-୬, ୬-୧ ଓ ୬-୨ ସେଟରେ ପରାସ୍ତ କରିଥିଲେ। ସେଲ୍ବି ପ୍ରଥମ ସେଟ୍ରେ ବିଶ୍ୱ ମାନ୍ୟତାର ୩ ନମ୍ବର ଖେଳାଳି ରିବାକିନାଙ୍କୁ ପରାସ୍ତ କରିଥିଲେ। ତେବେ ଚମତ୍କାର ପ୍ରତ୍ୟାବର୍ତ୍ତନ ସହିତ ରିବାକିନା ପରବର୍ତ୍ତୀ ଦୁଇ ସେଟ୍କୁ ଜିତି ନେଇଥିଲେ। ସେଣ୍ଟର କୋର୍ଟରେ ଖେଳା ଯାଇଥିବା ଏହି ମ୍ୟାଚ୍ ଦେଖିବାକୁ ଟେନିସ୍ କିମ୍ବଦନ୍ତୀ ରୋଜର ଫେଡେରର ଓ ଓ୍ବେଲ୍ସ ରାଜକୁମାରୀ ଉପସ୍ଥିତ ରହିଥିଲେ। ଫେଡେରରଙ୍କୁ ନିଜର ଆଦର୍ଶ ମାନୁଥିବା ରିବାକିନା ମ୍ୟାଚ୍ ପରେ ତାଙ୍କୁ ଧନ୍ୟବାଦ ଜଣାଇଥିଲେ। ମୋର ଆଦର୍ଶ ଦର୍ଶକ ଷ୍ଟାଣ୍ଡରେ ବସି ମୋ ମ୍ୟାଚ ଦେଖିବା ମୋ ପାଇଁ ଗର୍ବର ବିଷୟ ବୋଲି କହିଥିଲେ ରିବାକିନା।
