ଆଳି,୨୭ା୧୧(ଡି.ଏନ.ଏ.): ଆଳି ବ୍ଲକକୁ ଯୋଗାଯୋଗ ନିମନ୍ତେ ଗୋଟିଏ ପଟେ ବ୍ରାହ୍ମଣୀ ସେତୁ, ଅପରପକ୍ଷେ ବୈତରଣୀ ସେତୁ ଓ ଗୋବିନ୍ଦପୁର ସେତୁ ନିର୍ମାଣ ହୋଇଛି। ଏହି ସେତୁ ନିର୍ମାଣ ପରେ ଆଳି ଓ ରାଜକନିକା ଦୁଇଟି ବ୍ଲକର ଜନସାଧାରଣ ସିଧାସଳଖ ଜିଲା ବାହାରକୁ ଯାତାୟାତ କରିପାରୁଛନ୍ତି। କଟକ-ଚାନ୍ଦବାଲି ରାସ୍ତାରେ ଦୈନିକ ଶତାଧିକ କାର, ବସ୍, ଟ୍ରକ୍ ଆଦି ଯାନବାହନ ଚଳାଚଳ କରିବାରୁ ଅବସ୍ଥା ଖରାପ ହୋଇଯାଇଥିଲା। କିଛିବର୍ଷ ପୂର୍ବରୁ ବିଶ୍ୱ ବ୍ୟାଙ୍କ ସହାୟତାରେ ଜଗତପୁରରୁ ଚାନ୍ଦବାଲି ପର୍ଯ୍ୟନ୍ତ ରାସ୍ତାକୁ ନବୀକରଣ ପରେ ଯାନବାହନ ଚଳାଚଳ ବୃଦ୍ଧି ପାଇବାରେ ଲାଗିଛି। ଅପରପକ୍ଷରେ ଆଳି ପତ୍ରପୁର ସେତୁ ନିକଟରୁ ଆଳି ଗଡଗଡି ସେତୁ ପର୍ଯ୍ୟନ୍ତ ଯାଇଥିବା ଏହି ରାସ୍ତାରେ ପ୍ରତ୍ୟେକ ଦିନ ଦୁର୍ଘଟଣା ଘଟୁଛି। ମୁଖ୍ୟତଃ ଡାକବଙ୍ଗଳା ଛକଠାରେ ଥିବା ବୁଲାଣି ଏବେ ଦୁର୍ଘଟଣାସ୍ଥଳ ଭାବେ ପରିଗଣିତ ହେଉଛି। ଏହି ବୁଲାଣିଟି ଏପରି ହୋଇଛି ଯେ, ପ୍ରତ୍ୟେକ ଦିନ ବାଇକ୍ ଓ କାର ଦୁର୍ଘଟଣା ମଧ୍ୟ ଘଟୁଛି। ଗତ ସପ୍ତାହରେ ଏକ କାର ଉକ୍ତ ବୁଲାଣିରେ ଭାରସାମ୍ୟ ହରାଇ ରାସ୍ତା ତଳକୁ ଓଲଟି ପଡିଥିଲା। କିଛିଦିନ ପୂର୍ବେ କଟକରୁ ମୃତଦେହ ନେଇ ଆମ୍ବୁଲାନ୍ସ ଚାନ୍ଦବାଲି ଅଭିମୁଖେ ଆସୁଥିବା ବେଳେ ସେହି ସ୍ଥାନରେ ଓଲଟି ପଡିଥିଲା। ଆମ୍ବୁଲାନ୍ସ ଓଲଟି ପଡିବାରୁ ସେଥିରେ ଥିବା ଲୋକେ ମଧ୍ୟ ଆହତ ହୋଇଥିଲେ। ବିଭାଗୀୟ ଅଧିକାରୀ ଏହି ଘଟଣା ପ୍ରତି ଅବଗତ ଥିଲେ ମଧ୍ୟ ଏହାର ପ୍ରତିକାର ନିମନ୍ତେ କୌଣସି କାର୍ଯ୍ୟାନୁଷ୍ଠାନ ନେଉନାହାନ୍ତି। ଏ ସମ୍ପର୍କରେ ଆଳି ପୂର୍ତ୍ତ ବିଭାଗ କନିଷ୍ଠଯନ୍ତ୍ରୀ ଜ୍ୟୋତି ରଞ୍ଜନ ବେହେରାଙ୍କୁ ପଚାରିବାରୁ ଡାକବଙ୍ଗଳା ଛକର ଦୁଇପାର୍ଶ୍ୱରେ ଦୁଇଟି ସୋଲାର ବ୍ଲିଙ୍କ ଲାଗିବ। ଉଭୟପାର୍ଶ୍ୱର ୨ଶହ ଫୁଟ ଦୂରରେ ଦୁଇଟି ବିଜ୍ଞାପନ ବୋର୍ଡ ମଧ୍ୟ ଲଗାଯିବ। ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ନିକଟକୁ ଏହି ପ୍ରସ୍ତାବ ପଠାଯାଇଛି ବୋଲି ସେ କହିଛନ୍ତି।