ଆବୁଧାବି, ୧୩ା୯ (ପି.ଟି.)-ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ପ୍ରଥମ ଥର ଜଣେ ଆମେରିକୀୟ ଖେଳାଳିଙ୍କୁ ଦେଖିବାକୁ ମିଳିବ। ସେ ହେଉଛନ୍ତି ଫାଷ୍ଟ ବୋଲର ଅଲି ଖାନ୍। ସେ କୋଲକାତା ନାଇଟ ରାଇଡର୍ସ (କେକେଆର୍) ଦଳ ତରଫରୁ ଖେଳିବେ। ୨୯ ବର୍ଷୀୟ ଏହି ଫାଷ୍ଟ ବୋଲରଙ୍କୁ ଇଂଲିଶ ସିମ୍ ବୋଲର ହ୍ୟାରି ଗର୍ନେଙ୍କ ସ୍ଥାନରେ ନିଆଯିବ। ତେବେ ଆଇପିଏଲ୍ ଅନୁମୋଦନକୁ ଅପେକ୍ଷା କରାଯାଇଛି। କାନ୍ଧରେ ଅସ୍ତ୍ରୋପଚାର ଯୋଗୁ ଗର୍ନେ ଉଭୟ ଆଇପିଏଲ୍ ଓ ଗତ ମାସରେ ଇଂଲଣ୍ଡର ଭାଇଟାଲିଟି ବ୍ଲାଷ୍ଟରୁ ଓହରିଯାଇଥିଲେ। ନିକଟରେ ଶେଷ ହୋଇଥିବା କ୍ୟାରିବିୟନ ପ୍ରିମିୟର ଲିଗ୍ (ସିପିଏଲ୍)ରେ ଅଲି ଖାନ୍ ତ୍ରିନବାଗୋ ନାଇଟ୍ ରାଇଡର୍ସ ତରଫରୁ ଖେଳିଥିଲେ। ଏହି ଦଳ ଟୁର୍ନାମେଣ୍ଟରେ ଅପରାଜିତ ରହିବା ସହ ଟାଇଟଲ ବିଜୟୀ ହୋଇଥିଲା। ଖାନ୍ ୭.୪୩ ଆଭରେଜରେ ସମାନ ସଂଖ୍ୟକ ମ୍ୟାଚରୁ ୮ଟି ଉଇକେଟ ଅକ୍ତିଆର କରିଥିଲେ। ଗତ ସିଜନରେ ସେ କେକେଆର୍ ଟାର୍ଗେଟରେ ରହିଥିଲେ। ମାତ୍ର ଚୁକ୍ତି ସ୍ବାକ୍ଷରିତ ହୋଇପାରି ନ ଥିଲା। ୨୦୧୮ ଗ୍ଲୋବାଲ ଟି୨୦ କାନାଡାରେ ଖାନ୍ଙ୍କ ପ୍ରତିଭାକୁ ଓ୍ବେଷ୍ଟଇଣ୍ଡିଜର ଷ୍ଟାର ଅଲରାଉଣ୍ଡର ଡ୍ବେନ୍ ବ୍ରାଭୋ ଚିହ୍ନଟ କରିଥିଲେ। ତାଙ୍କୁ ଆଣି ସେ ସିପିଏଲ୍ରେ ଖେଳାଇଥିଲେ। ଅଲି ଖାନ୍ ସିପିଏଲ୍ ଅଲ୍ଷ୍ଟାର ଟିମ୍ରେ ସ୍ଥାନ ପାଇଥିଲେ। ଏହି ଆମେରିକୀୟ ବୋଲର ଗୁୟାନା ଆମାଜନ ଓ୍ବାରିୟର୍ସ ତରଫରୁ ଖେଳିଥିଲେ। ୧୨ଟି ମ୍ୟାଚରୁ ସେ ୧୬ଉଇକେଟ ଅକ୍ତିଆର କରିଥିଲେ। ସେହି ସିଜନରେ ଜଣେ ଫାଷ୍ଟ ବୋଲର ହିସାବରେ ସେ ଦ୍ୱିତୀୟ ସର୍ବାଧିକ ଉଇକେଟ ଅକ୍ତିଆର କରିଥିଲେ। ବ୍ରାଭୋ ଇତିମଧ୍ୟରେ ଇନ୍ଷ୍ଟାଗ୍ରାମ୍ରେ ଏକ ଭିଡିଓ ପୋଷ୍ଟ କରିଛନ୍ତି। ଏଥିରେ ଖାନ୍, ବ୍ରେଣ୍ଡନ ମ୍ୟାକ୍କୁଲମ ସମେତ ଅନ୍ୟ କେତେଜଣ ଏକ ବିମାନ ଭିତରେ ବସିଥିବାର ଦୃଶ୍ୟ ରହିଥିଲା। ଭିଡିଓଟିର କ୍ୟାପଶନ ଲେଖାଥିଲା ‘ନେକ୍ସଟ ଷ୍ଟପ୍ ଦୁବାଇ’। ଖାନ୍ ଘଣ୍ଟା ପ୍ରତି ୧୪୦ କିମିରୁ ଅଧିକ ବେଗରେ ବୋଲିଂ କରିପାରନ୍ତି। ସେ ଭଲ ୟର୍କର ପକାଇପାରନ୍ତି। ଦିନେଶ କାର୍ତ୍ତିକଙ୍କ ନେତୃତ୍ୱାଧୀନ କେକେଆର୍ ସେପ୍ଟେମ୍ବର ୨୩ରେ ଏହାର ପ୍ରଥମ ମ୍ୟାଚ ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ଖେଳିବ।