ମୁମ୍ବାଇ: ଅଭିନେତା ରଣବୀର କପୁର ଏବଂ ଅଭିନେତ୍ରୀ ଆଲିଆ ଭଟ୍ଟଙ୍କ ବିବାହ ପୂର୍ବର କାର୍ଯ୍ୟ ଆରମ୍ଭ ହୋଇଛି। ଅଭିନେତ୍ରୀଙ୍କ ହାତରେ ରଣବୀର କପୁରଙ୍କ ନାମରେ ମେହେନ୍ଦୀ ଲାଗିଛି। ମେହେନ୍ଦୀ ସହିତ ସଙ୍ଗୀତ କାର୍ଯ୍ୟକ୍ରମ ମଧ୍ୟ ଜୋରସୋର୍ରେ ଚାଲିଛି। ଦୁହେଁ ଜୀବନସାଥୀ ହେବେ। ରଣବୀର ଏବଂ ଆଲିଆଙ୍କ ବିବାହ ପୂର୍ବର କୌଣସି ଫଟୋ ଏପର୍ଯ୍ୟନ୍ତ ଭାଇରାଲ ହୋଇ ନ ଥିଲା। କିନ୍ତୁ ସେମାନଙ୍କ ଘରେ ଅତିଥିମାନେ ପହଞ୍ଚିସାରିବା ପରେ ଫଟୋଗୁଡ଼ିକ ଏବେ ସୋସିଆଲ ମିଡିଆରେ ଛାଇଯାଇଛି। କରୀନା କପୁର ଖାନ ଏବଂ କରିସ୍ମାଙ୍କୁ ଭାଇ ରଣବୀର-ଆଲିଆଙ୍କ ବିବାହ ପୂର୍ବ କାର୍ଯ୍ୟକ୍ରମରେ ଯୋଗଦେବା ପାଇଁ ‘ବାସ୍ତୁ’ରେ ପହଞ୍ଚିବା ପରେ ପ୍ରଶଂସକମାନେ କରୀନାଙ୍କୁ ପ୍ରଶଂସା କରିଛନ୍ତି। କରୀନା ଏକ ଧଳା ରଙ୍ଗର ଲେହେଙ୍ଗା ପିନ୍ଧିଥିବାବେଳେ କରିସ୍ମା ବି ଏକ ଗାଢ଼ ହଳଦିଆ ରଙ୍ଗର ଚୁଡ଼ିଦାର ପିନ୍ଧିଥିବା ନଜର ଆସିଛନ୍ତି।
ଅନ୍ୟ ଅତିଥିମାନଙ୍କ ମଧ୍ୟରେ ନୀତୁ କପୁର, ଭଉଣୀ ରିଦ୍ଧିମା ଓ କପୁର ଫ୍ୟାମିଲିର ସମସ୍ତ ସଦସ୍ୟଙ୍କ ସମେତ କରଣ ଜୋହର୍ ମଧ୍ୟ ମେହେନ୍ଦୀ ସେରିମନିରେ ପହଞ୍ଚିଛନ୍ତି। ସେହିପରି ମହେଶ ଭଟ୍ଟ, ସୋନି ରାଜଦାନ ଓ ପୂଜା ଭଟ୍ଟଙ୍କୁ ମଧ୍ୟ ଦେଖିବାକୁ ମିଳିଛି। ଆଲିଆ ଓ ରଣବୀରଙ୍କ ମେହେନ୍ଦୀ ସେରିମନିରେ ସମସ୍ତେ ହଳଦିଆ ରଙ୍ଗର ଡ୍ରେସ୍କୋଡ୍ରେ ନଜର ଆସିଛନ୍ତି ।ଆସନ୍ତାକାଲି ଅର୍ଥାତ୍ ୧୪ ତାରିଖରେ ଉଭୟଙ୍କ ହାତଗଣ୍ଠି ପଡ଼ିବ।