କୋଲକାତା,୨୧।୬: ପଶ୍ଚିମବଙ୍ଗ ଅଲିପୁରଦ୍ୱାର ଜିଲାର ଜିଲାପାଳ ସୁରେନ୍ଦ୍ର କୁମାର ମିନା ଏବେ ଚର୍ଚ୍ଚାରେ ରହିଛନ୍ତି। ଗାଁରେ ଟିକାକରଣ ପାଇଁ ଜିଲାପାଳ କଠିନ ରାସ୍ତା ଦେଇ ପାହାଡ଼ ଚଢ଼ିଥିବା ଦେଖିବାକୁ ମିଳିଛି। ଏହି ସମୟରେ ତାଙ୍କ ସହ ଏକ ମେଡିକାଲ ଟିମ୍ ମଧ୍ୟ ରହିଥିଲେ। ସୁରେନ୍ଦ୍ରଙ୍କ ଏହି ସମୟର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଥିବା ବେଳେ ତାଙ୍କୁ ବେଶ୍ ପ୍ରଶଂସା ମଧ୍ୟ କରାଯାଉଛି।
ସୂଚନାଯୋଗ୍ୟ, ଭାରତ ଓ ଭୂଟାନ ସୀମା ନିକଟବର୍ତ୍ତୀ ବକ୍ସା ହିଲ୍ ସ୍ଥିତ ୧୧ କିଲୋମିଟର ଦୂରରେ ଥିବା ଅଦମା ଗାଁରେ ଲୋକଙ୍କ ଟିକାକରଣ ପାଇଁ ଜିଲାପାଳ ସୁରେନ୍ଦ୍ର ମୀନା ଏକ ଡାକ୍ତରୀ ଟିମ୍ ସହ ପହଞ୍ଚିଥିଲେ। ଗାଁକୁ ଭଲ ରାସ୍ତା ଭଲ ନ ଥିବା ବେଳେ ସେ ପାହାଡ଼ିଆ ଅଞ୍ଚଳ ଦେଇ ନଦୀ ନାଳ ପାର କରି ଉକ୍ତ ଗାଁରେ ପହଞ୍ଚି ଲୋକଙ୍କୁ କରୋନା ଟିକାକରଣ କରାଇଥିଲେ। ଏଥିସହ ଗାଁଲୋକଙ୍କୁ ମାସ୍କ ଓ ସାନିଟାଇଜର ବଣ୍ଟନ କରି କରୋନା ଓ ଟିକା ବିଷୟରେ ସଚେତନ କରିଥିଲେ। କେବଳ ସେତିକି ନୁହେଁ ଅଦ୍ମା ଗାଁକୁ ଯିବା ରାସ୍ତାରେ ପଡ଼ୁଥିବା ଅନ୍ୟ ଗାଁଗୁଡ଼ିକରେ ମଧ୍ୟ ସେ ଟିକାକରଣ ଅଭିଯାନ ଚଲାଇଥିଲେ।