ସମ୍ବଲପୁର,୨୩ା୧୨(ବ୍ୟୁରୋ):ପଶ୍ଚିମ ଓଡ଼ିଶାରେ ହାଇକୋର୍ଟ ସ୍ଥାୟୀ ବେଞ୍ଚ ଦାବି ନେଇ ଡିସେମ୍ବର ୧୨ ତାରିଖ ଆନ୍ଦୋଳନ ସମୟରେ କୋର୍ଟ ପରିସରରେ ଭଙ୍ଗାରୁଜା ଓ ବିଚାରପତିମାନଙ୍କୁ ବାହାର କରିଦେବା ଭଳି ଘଟଣା ଘଟିଥିଲା। ଏହି ଘଟଣାରେ ପୋଲିସ ମୋଟ ୩୮ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ଗୁରୁବାର ଅତିରିକ୍ତ ଜିଲାଜଜ୍ ତଥା ସ୍ବତନ୍ତ୍ର ଭିଜିଲାନ୍ସ କୋର୍ଟରେ ସମସ୍ତ ଅଭିଯୁକ୍ତମାନଙ୍କ ଜାମିନ ଆବେଦନର ଶୁଣାଣି ହୋଇଥିଲା। ଅପରାହ୍ନରେ ଅଭିଯୁକ୍ତଙ୍କ ଓକିଲ ଓ ସରକାରୀ ଓକିଲ ନିଜ ପକ୍ଷ ରଖିଥିଲେ। ଗିରଫ ସମସ୍ତ ୩୮ ଜଣଙ୍କ ଜାମିନ ଆବେଦନ ଖାରଜ ହୋଇଥିବା ନେଇ କୋର୍ଟ ରାୟ ଶୁଣାଇଛନ୍ତି।
ଅଭିଯୁକ୍ତ ପକ୍ଷଙ୍କ ଓକିଲ ତଥା ସିଏସି ସଦସ୍ୟ ପ୍ରମୋଦ ଦାସ କହିଛନ୍ତି, ସମସ୍ତ ତଥ୍ୟ ଦେଇ ଜାମିନ ଆବେଦନ କରାଯାଇଥିଲା। ବିଚାରପତି ଜାମିନ ଆବେଦନକୁ ଖାରଜ କରିଦେଇଛନ୍ତି। ଆଗକୁ କି ପଦକ୍ଷେପ ନିଆଯିବ ସେ ନେଇ ସିଏସିରେ ବୈଠକ ପରେ ନିଷ୍ପତ୍ତି ନିଆଯିବ ବୋଲି କହିଛନ୍ତି। ପୂର୍ବରୁ ଗତ ୧୭ରେ ଏସ୍ଡିଜେଏମ୍ କୋର୍ଟରେ ଜାମିନ ଆବେଦନ ଖାରଜ ହୋଇଥିଲା। ଏବେ ପୁଣି ଜାମିନ ଆବେଦନ ଖାରଜ ହେବା ପରେ ସମର୍ଥକମାନେ ନିରାଶ ହୋଇଛନ୍ତି। ସେମାନଙ୍କ କହିବା କଥା କୋର୍ଟ ରାୟକୁ ସ୍ବାଗତ କରାଯାଉଛି, ହେଲେ ସରକାରୀ ପେଞ୍ଚରେ ଜିଲାର ଓକିଲ ଓ ଆନ୍ଦୋଳନକାରୀ ଫସିଯାଇଛନ୍ତି। ଅନ୍ୟପଟେ ଗୁରୁବାର ମଧ୍ୟ କୋର୍ଟ କାର୍ଯ୍ୟରେ ଅଚଳାବସ୍ଥା ଜାରି ରହିଥିଲା। ପଶ୍ଚିମ ଓଡିଶାର ବିଭିନ୍ନ ବାର୍ର ସଦସ୍ୟମାନେ ଆସି ଜିଲା ଓକିଲ ସଂଘର ସଦସ୍ୟ, ଜିଲା ପ୍ରଶାସନ ଓ ଜେଲ ଭିତରେ ଓକିଲମାନଙ୍କୁ ଭେଟି ଆଲୋଚନା କରିଥିଲେ। କୋର୍ଟ କାର୍ଯ୍ୟ ଯେଭଳି ସ୍ବାଭାବିକ ହେବ, ମହକିଲମାନେ ନିଜ କାମ ସୁରୁଖୁରୁରେ କରିପାରିବେ ସେ ନେଇ ଜିଲା କୋର୍ଟ, ଜିଲା ପ୍ରଶାସନ ଓ ସରକାର ପଦକ୍ଷେପ ଗ୍ରହଣ କରନ୍ତୁ ବୋଲି ଦାବି କରିଛନ୍ତି। ବିଚାରପତି, କର୍ମଚାରୀ ଓ ଅଧିକାରୀ ଆସି କୋର୍ଟ କାର୍ଯ୍ୟ କରୁଛନ୍ତି। ହେଲେ ଓକିଲ ନ ଥିବାରୁ ମହକିଲମାନେ ଫେରି ଯାଉଛନ୍ତି। ୫୪ଜଣ ଓକିଲଙ୍କୁ ବାଦ ଦେଇ ଅନ୍ୟ ଓକିଲମାନଙ୍କ ନିଲମ୍ବନ ଆଦେଶ ୧୪ ତାରିଖରେ ପ୍ରତ୍ୟାହୃତ ହୋଇଥିଲା। ଏହା ସତ୍ତ୍ୱେ ସେମାନେ କାର୍ଯ୍ୟରେ ଯୋଗଦାନ କରୁ ନାହାନ୍ତି। ଘଟଣାରେ ଗିରଫ ୩୮ ଜଣଙ୍କ ମଧ୍ୟରେ ୮ ଜଣ କିନ୍ନର, ଜଣେ ସାଧାରଣ ଲୋକ ଓ ୨୯ଜଣ ଓକିଲ ଅଛନ୍ତି।