ନୂଆଦିଲ୍ଲୀ,୧୭।୧୦: ଅବକାରୀ ନୀତି ଦୁର୍ନୀତି ମାମଲାରେ ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କୁ ସୋମବାର ହାଜର ହେବା ପାଇଁ ସିବିଆଇ ସମନ ଜାରି କରିଥିଲା। ସିସୋଡିଆ ସିବିଆଇ କାର୍ଯ୍ୟାଳୟରେ ହାଜର ହେବା ପରେ ତାଙ୍କୁ ପ୍ରାୟ ୯ଘଣ୍ଟା ଧରି ପଚରାଉଚରା କରାଯାଇଥିଲା। ୯ଘଣ୍ଟାର ଜେରା ପରେ ସିସୋଡିଆ ସିବିଆଇ କାର୍ଯ୍ୟାଳୟରୁ ବାହାରକୁ ଆସିଛନ୍ତି। କାର୍ଯ୍ୟାଳୟରୁ ବାହାରିବା ପରେ ମନୀଷ ସିସୋଡିଆ ଭାଜପାକୁ ଟାର୍ଗେଟ କରି ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ତାଙ୍କୁ ଏଏପି ଛାଡ଼ିବାକୁ ଚାପ ପକାଯାଉଛି। ନଚେତ୍ ତାଙ୍କ ନାଁରେ ମିଥ୍ୟା ମାମଲା ଜାରି ରହିବ। ଏପରିକି ତାଙ୍କୁ ମୁଖ୍ୟମନ୍ତ୍ରୀ ପଦ ପାଇଁ ମଧ୍ୟ ଅଫର ଦିଆଯାଇଛି। କିନ୍ତୁ ସେ ଏହି ଅଫରକୁ ମନା କରିଦେବା ସହ ଏଠାରେ ଅପରେଶନ୍ ଲୋଟସ୍କୁ ସଫଳ ହେବାକୁ ଦେବେ ନାହିଁ ବୋଲି ସେ କହିଛନ୍ତି। ଏଥିସହ ତାଙ୍କ ନାଁରେ ଥିବା ମାମଲାରେ କୌଣସି ସତ୍ୟତା ନାହିଁ ବୋଲି ସିସୋଡିଆ କହିଛନ୍ତି। ଅନ୍ୟପଟେ ସିସୋଡିଆ ଫେରିବା ପରେ ଏଏପି ଆଶ୍ୱସ୍ତ ହୋଇଛି। କାରଣ ସିବିଆଇ ତାଙ୍କୁ ଗିରଫ କରିପାରେ ସନ୍ଦେହରେ ଏଏପି କର୍ମକର୍ତ୍ତା ବିକ୍ଷୋଭ ପ୍ରଦର୍ଶନ କରିଥିଲେ। ବିକ୍ଷୋଭ ସମୟରେ କର୍ମକର୍ତ୍ତା ଓ ପୋଲିସଙ୍କ ମଧ୍ୟରେ ଧସ୍ତାଧସ୍ତି ମଧ୍ୟ ହୋଇଥିଲା।