ନୂଆଦିଲ୍ଲୀ,୧୧।୩ : ଇଡିର କାର୍ଯ୍ୟାନୁଷ୍ଠାନ ସମ୍ପର୍କରେ ବିରୋଧୀଙ୍କ ଅଭିଯୋଗକୁ ଖଣ୍ଡନ କରି ଭାରତୀୟ ଜନତା ପାର୍ଟି ଏହାର ପାଲଟା ଜବାବ ଦେଇଛି। ଭାଜପା ମୁଖପାତ୍ର ଗୌରବ ଭାଟିଆ କହିଛନ୍ତି ଯେ ଦୁର୍ନୀତି ସହ ଜଡିତ ସମସ୍ତ ଆଞ୍ଚଳିକ ଦଳର ନେତାଙ୍କୁ ଧରାଯିବ। କେହି ରକ୍ଷା ପାଇବେ ନାହିଁ। ସେମାନେ ବେଳେବେଳେ ପୀଡିତ କାର୍ଡ ଖେଳୁଛନ୍ତି। ବହୁ ସମୟରେ ମଧ୍ୟ ଭାବପ୍ରବଣତା କାର୍ଡ ଖେଳି ଜନସାଧାରଣଙ୍କ ଦୟା ସାଉଁଟିବାର ଉଦ୍ୟମ କରୁଛନ୍ତି। ମାତ୍ର ସେମାନେ କେବେ ମଧ୍ୟ ରକ୍ଷା ପାଇବେ ନାହିଁ। ସମସ୍ତ ଦୁର୍ନୀତିଗ୍ରସ୍ତଙ୍କୁ ଗୋଟିଏ ପରେ ଗୋଟିଏ ଧରାଯାଉଛି।
ନୀତୀଶ କୁମାରଙ୍କୁ ଟାର୍ଗେଟ କରି ସେ କହିଛନ୍ତି ଯେ ନୀତୀଶ ଜି, ଆପଣ ଅତୀତରେ ଲାଲୁ ଯାଦବ, ରାବ୍ରି ଦେବୀ ଏବଂ ତେଜସ୍ବୀ ଯାଦବଙ୍କ ବିରୋଧରେ ଦୁର୍ନୀତି ଅଭିଯୋଗ ଥିବା ଦାବି କରିଥିଲେ। ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ ବୋଲି ମଧ୍ୟ କହିଥିଲେ। ଆପଣ କାହିଁକି ସେ ପୁରୁଣା ମନ୍ତବ୍ୟ ବିଷୟରେ ନ କହି ଇଡିର କାର୍ଯ୍ୟର ବିରୋଧ କରି ଏବେ ଭାଜପାକୁ ଟାର୍ଗେଟ କରୁଛନ୍ତି। ପୁରୁଣା ମନ୍ତବ୍ୟ ବିଷୟରେ କାହିଁକି ଚୁପ୍ ରହୁଛନ୍ତି। କିଛି କହୁନାହାଁନ୍ତି କାହିଁକି?
ମନୀଷ ସିସୋଡିଆଙ୍କୁ ହାଜତରେ ପଚରାଉଚରା ଆବଶ୍ୟକ ବୋଲି କୋର୍ଟ କହିଛନ୍ତି। ଲଜ୍ଜାଜନକ କାର୍ଯ୍ୟକଳାପକୁ ଆଗକୁ ବଢ଼଼ାଇବାରେ ସିସୋଡିଆଙ୍କର ହାତ ଅଛି ଏବଂ ଦୁର୍ନୀତିର ନିଶାରେ ସେ ବୁଡି ରହିନ୍ତେି। ଆଜି ଜନସାଧାରଣଙ୍କ ଅନୁଭବ କରୁୁଛନ୍ତି ଯେ ଦୁର୍ନୀତିଗ୍ରସ୍ତ ଯେତେ ପ୍ରଭାବଶାଳୀ ହେଲେ ମଧ୍ୟ ଆଇନ ଶକ୍ତିଶାଳୀ ସାବ୍ୟସ୍ତ ହେଉଛି। ଯେତେବେଳେ ଦୁର୍ନୀତିଗ୍ରସ୍ତ ଧରାଯାଉଛନ୍ତି ଜନସାଧାରଣ ସେହି ପ୍ରସଙ୍ଗ ବିଷୟରେ କଦାପି କଥାବାର୍ତ୍ତା କରୁ ନାହାନ୍ତି। ସେମାନେ ମନେମନେ ଜାଣିଛନ୍ତି ଯେ ଧରାପଡ଼ିଥିବା ନେତା ଦୁର୍ନୀତି କରିଛନ୍ତି।
କଂଗ୍ରେସ ଅନେକ ଦୁର୍ନୀତି କରିଥିଲା। ସେଥିମଧ୍ୟରେ ୨-ଜି ସ୍କାମ, କମନୱେଲଥ ଗେମ୍ସ ସ୍କାମ ଆଦି ରହିଛି। କଂଗ୍ରେସ ଶାସନ ଦୁର୍ନୀତିର ସମୟ ଥିଲା। କିନ୍ତୁ ବର୍ତ୍ତମାନ ଲୋକମାନେ ସଚେତନ ହୋଇଛନ୍ତି ଏବଂ ସେମାନେ ଚାହୁଁଛନ୍ତି ଯେ ପ୍ରତ୍ୟେକ ଦୁର୍ନୀତିଗ୍ରସ୍ତଙ୍କୁୁ ଏକ ଶିକ୍ଷା ଦିଆଯାଉ।