ମୋହାଲି,୨୨ା୯(ପି.ଟି.):ଦିନିକିଆ କ୍ରିକେଟ ବିଶ୍ୱକପର ଅନ୍ତିମ ପ୍ରସ୍ତୁତି ଭାବରେ ଅଷ୍ଟ୍ରେଲିଆ ବିପକ୍ଷରେ ୩ ମ୍ୟାଚ୍ ବିଶିଷ୍ଟ ସିରିଜ ଖେଳିବ ଭାରତ। ଶୁକ୍ରବାର ଠାରୁ ଏହି ସିରିଜ୍ ଆରମ୍ଭ ହେଉଥିବା ବେଳେ ଶ୍ରେୟସ୍ ଆୟର ଓ ସୂର୍ଯ୍ୟକୁମାର ଯାଦବଙ୍କ ଉପରେ ସମସ୍ତଙ୍କ ନଜର ରହିବ। ଆୟରଙ୍କୁ ନିଜର ଫିଟନେସ୍ ଓ ସୂର୍ଯ୍ୟକୁମାରଙ୍କୁ ଦିନିକିଆରେ ନିଜର ଫର୍ମ ପ୍ରମାଣ କରିବା ପାଇଁ ଏହା ଅନ୍ତିମ ସୁଯୋଗ ରହିବ। ପ୍ରଥମ ଦୁଇ ଦିନିକିଆ ପାଇଁ ରୋହିତ ଶର୍ମା, ବିରାଟ କୋହଲି, କୁଲଦୀପ ଯାଦବ ଓ ହାର୍ଦ୍ଦିକ ପାଣ୍ଡ୍ୟାଙ୍କୁ ବିଶ୍ରାମ ଦିଆଯାଇଥିବା ବେଳେ ବେଞ୍ଚଷ୍ଟ୍ରେନ୍ଥ ପରୀକ୍ଷା ପାଇଁ ଏହା ରାହୁଲ ଡ୍ରାଭିଡଙ୍କ ପାଇଁ ଅନ୍ତିମ ସୁଯୋଗ ରହିବ। ମୁମ୍ବାଇର ଦୁଇ ଖେଳାଳି ଆୟର ଓ ସୂର୍ଯ୍ୟକୁମାରଙ୍କ ଖେଳିବା ଶୈଳୀ ଭିନ୍ନ। ଆୟର ୪ ନମ୍ବରରେ ନିଜର ଦକ୍ଷତା ପ୍ରମାଣିତ କରି ସାରିଛନ୍ତି। ତେବେ ଫିଟନେସ ତାଙ୍କ ପାଇଁ ବଡ ସମସ୍ୟା ରହିଛି। ଆୟର ସମ୍ପୂର୍ଣ୍ଣ ଫିଟ୍ ନ ଥିବା ବେଳେ ଅଷ୍ଟ୍ରେଲିଆ ସିରିଜରେ ୧୦୦ ଓଭର ଖେଳିବା ପାଇଁ ପ୍ରସ୍ତୁତ ଥିବେ ବୋଲି ମୁଖ୍ୟ ଚୟନକର୍ତ୍ତା ଅଜିତ ଅଗରକର କହିଛନ୍ତି। ମଧ୍ୟକ୍ରମରେ ଇଶାନ କିଶନ ଚମତ୍କାର ଫର୍ମରେ ରହିଥିଲେ ମଧ୍ୟ ସ୍ପିନ୍ ଖେଳିବାରେ ଆୟରଙ୍କ ଦକ୍ଷତା ଅତ୍ୟନ୍ତ ପ୍ରଭାବୀ। ଅନ୍ୟ ପକ୍ଷରେ ଟି୨୦ରେ ବିଶ୍ୱର ଏକ ନମ୍ବର ବ୍ୟାଟର ରହିଥିବା ସୂର୍ଯ୍ୟକୁମାରଙ୍କ ପାଇଁ ଦିନିକିଆରେ ସମାନ ଫଳାଫଳ ମିଳିନାହିଁ। ୨୭ ଦିନିକିଆ ଖେଳି ସାରିଥିଲେ ମଧ୍ୟ ତାଙ୍କର ଆଭରେଜ ମାତ୍ର ୨୪ ରହିଛି। ଯଦିଓ ବିଶ୍ୱକପରେ ସୂର୍ଯ୍ୟକୁମାରଙ୍କୁ ଆକ୍ସନରେ ଦେଖିବାର ସମ୍ଭାବନା କମ ତେବେ ବ୍ୟାକ ଅପ୍ ଭାବରେ ସେ ଦଳରେ ରହିଥିବାରୁ ତାଙ୍କର ଫର୍ମକୁ ଫେରିବା ଅତ୍ୟନ୍ତ ଆବଶ୍ୟକ। ଗୁରୁବାର ଏକ ଖବରଦାତା ସମ୍ମିଳନୀରେ ଯୋଗ ଦେଇ ଅଶ୍ୱିନଙ୍କ ପ୍ରଶଂସା କରିଥିଲେ ଭାରତୀୟ ଦଳର ମୁଖ୍ୟ କୋଚ୍ ରାହୁଲ ଡ୍ରାଭିଡ୍। ଅଶ୍ୱିନଙ୍କ ପରି ଅଭିଜ୍ଞ ଖେଳାଳି ଦଳକୁ ପ୍ରତ୍ୟାବର୍ତ୍ତନ କରିବା ଭାରତ ପାଇଁ ଶୁଭ ସଙ୍କେତ ବୋଲି କହିଛନ୍ତି ମୁଖ୍ୟ କୋଚ୍।
ସ୍ପିନ୍ ବିଭାଗରେ ଅକ୍ଷର ପଟେଲ ଆହତ ଥିବା ବେଳେ ଭାରତୀୟ ଦଳରେ ସୁଯୋଗ ପାଇଛନ୍ତି ସ୍ପିନର ରବିଚନ୍ଦ୍ରନ ଅଶ୍ୱିନ୍ ଓ ଓ୍ବାଶିଂଟନ୍ ସୁନ୍ଦର। ୨ ସପ୍ତାହ ତଳେ ଅଶ୍ୱିନ ଭାରତୀୟ ଦଳର ରାଡାରରେ ନ ଥିବା ବେଳେ ଅଚାନକ ତାଙ୍କୁ ଦଳକୁ ଡାକରା ମିଳିଛି। କୁଲଦୀପଙ୍କ ଅନୁପସ୍ଥିତିରେ ଉଭୟ ଅଶ୍ୱିନ ଓ ସୁନ୍ଦରଙ୍କ ପାଖରେ ଚୟନକର୍ତ୍ତାଙ୍କୁ ପ୍ରଭାବିତ କରିବାର ସମାନ ସୁଯୋଗ ରହିଛି। ସେହିପରି ଓ୍ବାର୍ନର ଓ ସ୍ମିଥ୍ଙ୍କ ବିପକ୍ଷରେ ଅଶ୍ୱିନଙ୍କ ପ୍ରଦର୍ଶନ ଉପରେ ସମସ୍ତଙ୍କ ନଜର ରହିବ। ତେବେ ଯଦି ଅକ୍ଷର ଫିଟ୍ ହୁଅନ୍ତି ତେବେ ଅଶ୍ୱିନଙ୍କ ସମ୍ଭାବନା କମ ରହିବ। ଅକ୍ଷରଙ୍କ ହାର୍ମଷ୍ଟ୍ରିଙ୍ଗରେ ସେକଣ୍ଡ ଗ୍ରେଡ୍ ଟିୟର ରହିଥିବା ବେଳେ ସୁସ୍ଥ ହେବା ପାଇଁ ୨ ସପ୍ତାହ ସମୟ ଲାଗିବ। ରୋହିତଙ୍କ ଅନୁପସ୍ଥିତିରେ ଇଶାନ କିଶନ୍ ଓ ଶୁବମନ ଗିଲ୍ ଓପନ କରିବା ସ୍ପଷ୍ଟ ହୋଇଛି। ତେବେ ପେସ୍ ବୋଲରଙ୍କ ଓ୍ବାର୍କଲୋଡ ମ୍ୟାନେଜମେଣ୍ଟକୁ ନେଇ ଚର୍ଚ୍ଚା ଆରମ୍ଭ ହୋଇଛି। ଅନ୍ୟ ପକ୍ଷରେ ଅଷ୍ଟ୍ରେଲିଆ ଏହାର ଅନ୍ତିମ ସିରିଜ ୨-୩ରେ ପରାଜିତ ହୋଇଥିଲା। ତେବେ ଦଳର କିଛି ଖେଳାଳି ଚମତ୍କାର ଫର୍ମରେ ରହଛନ୍ତି। ଘରୋଇ ପରିବେଶରେ ଭାରତ ଫେଭରିଟ୍ ହୋଇଥିଲେ ହେଁ ଅଷ୍ଟ୍ରେଲିଆ କଡା ଟକ୍କର ଦେବ। ମୋହାଲିର ପିଚ୍ ସାଧାରଣ ଭାବରେ ପେସ୍ ବୋଲିଂକୁ ଅଧିକ ସୁହାଇଥାଏ। ଉଭୟ ଦଳ ଏହାର ଫାଇଦା ନେବାକୁ ପ୍ରୟାସ କରିବେ।