ବ୍ରହ୍ମପୁର ଅଫିସବ,୧୨।୭: କରୋନା ଏବେ ସାରା ବିଶ୍ୱ ପାଇଁ ଚିନ୍ତାର କାରଣ ପାଲଟିଛି। କରୋନା ମୁକାବିଲା ପାଇଁ ସରକାର ଲକ୍ଡାଉନ୍ ଓ ଶଟ୍ଡାଉନ୍ ଘୋଷଣା କରିଛନ୍ତି। କରୋନା ସଂକ୍ରମଣରୁ ଲୋକମାନଙ୍କୁ ରକ୍ଷା କରିବା ପାଇଁ ସରକାର ଯଥା ସମ୍ଭବ ପଦକ୍ଷେପ ନେଉଛନ୍ତି । ବିଶେଷ କରି ମଧୁମେହ (ଡାଇବେଟିସ)ରୋଗୀଙ୍କ କ୍ଷେତ୍ରରେ କରୋନା ସଂକ୍ରମଣର ଅଧିକ ଆଶଙ୍କା ରହିଥାଏ। କାରଣ ମଧୁମେହ ରୋଗୀଙ୍କ ଶରୀରରେ ରୋଗ ପ୍ରତିରୋଧକ ଶକ୍ତି କମ ରହିଥାଏ ବୋଲି ଏମ୍କେସିଜି ମେଡିକାଲର ଏଣ୍ଡ୍ରୋକ୍ରାଇନୋଲୋଜି ବିଭାଗର ଡାକ୍ତର ପି. ରବି କୁମାର କହିଛନ୍ତି ।
ସେହିପରି ଯେଉଁ ବ୍ୟକ୍ତିମାନେ ମଧୁମେହ ସହିତ ଉଚ୍ଚ ରକ୍ତଚାପ, ହୃଦରୋଗ, କିଡ୍ନୀ ଜନିତ ସମସ୍ୟାରେ ପୀଡିତ ସେମାନଙ୍କୁ ମଧ୍ୟ ସତର୍କ ରହିବାକୁ ପଡିବ । ମଧୁମେହରେ ପୀଡିତ ଥିବା ୬୦ବର୍ଷ ତାଠୁ ଊର୍ଦ୍ଧ୍ୱ ବ୍ୟକ୍ତି, ମାତ୍ରାଧିକ ମଦ୍ୟପାନ ତଥା ଧୂମପାନ କରୁଥିବା ବ୍ୟକ୍ତିଙ୍କୁ କରୋନା ସଂକ୍ରମଣର ଅଧିକ ଆଶଙ୍କା ରହିଥାଏ। କରୋନା ସଂକ୍ରମଣ ହେଲେ ରକ୍ତ ଶର୍କରା ସ୍ତର ବୃଦ୍ଧି ହେବା ସହିତ ରୋଗୀ କୋମାକୁ ଚାଲିଯିବା ଭୟ ରହିଥାଏ ବୋଲି ସେ କହିଛନ୍ତି । କରୋନା ସଂକ୍ରମଣରୁ ନିଜକୁ ରକ୍ଷା କରିବା ପାଇଁ ମଧୁମେହ ରୋଗୀଙ୍କୁ ଅଧିକ ସଚେତନ ରହିବାକୁ ପଡ଼ିବ । ସାମାଜିକ ଦୂରତ୍ୱ ପାଳନ କରିବା ସହିତ ରକ୍ତଶର୍କରା, ରକ୍ତଚାପକୁ ନିୟନ୍ତ୍ରଣ ରଖିବା ଆବଶ୍ୟକ। ଡାକ୍ତରଙ୍କ ପରାମର୍ଶ ନେଇ ଆବଶ୍ୟକ ଔଷଧ ଖାଇବା ଜରୁରୀ । ପ୍ରତିଦିନ ଅତି କମରେ ୩୦ ମିନଟ୍ ପର୍ଯ୍ୟନ୍ତ ବ୍ୟାୟମ ନ ଚେତ ଯୋଗାଭ୍ୟାସ କରିବା ଆବଶ୍ୟକ। ଆବଶ୍ୟକ ଔଷଧ, ଇନସୁଲିନ ପାଖରେ ରଖିବାକୁ ଡା. କୁମାର କହିଛନ୍ତି । ମଦ୍ୟପାନ, ଧୂମପାନଠାରୁ ନିଜକୁ ଦୂରେଇ ରଖି ପୁଷ୍ଟିକର ଖାଦ୍ୟ ଖାଇବା ସହ ଦୈନିକ ୬/୭ ଘଣ୍ଟା ଶୋଇବା ଆବଶ୍ୟକ । ଏହି ସବୁ ନିୟମ ପାଳନ କଲେ ମଧୁମେହ ରୋଗୀ କରୋନା ସଂକ୍ରମଣରୁ ନିଜକୁ ରକ୍ଷା କରି ପାରିବେ ବୋଲି ସେ କହିଛନ୍ତି ।