ଯାଜପୁର ଟାଉନ,୨୫ା୧(ଡି.ଏନ.ଏ.): ଆଗାମୀ ପଞ୍ଚାୟତ ନିର୍ବାଚନ ପରିପ୍ରେକ୍ଷୀରେ ଏକ ସର୍ବଦଳୀୟ ବୈଠକ ସୋମବାର ଜିଲାପାଳଙ୍କ କାର୍ଯ୍ୟାଳୟ ସମ୍ମିଳନୀ ଗୃହରେ ଅନୁଷ୍ଠିତ ହୋଇଯାଇଛି। ଉକ୍ତ ବୈଠକରେ ଅତିରିକ୍ତ ଜିଲାପାଳ (ରାଜସ୍ବ) ଅକ୍ଷୟ କୁମାର ମଲ୍ଲିକ ଅଧ୍ୟକ୍ଷତା କରି ରାଜ୍ୟ ନିର୍ବାଚନ କମିଶନର ଧାର୍ଯ୍ୟ କରିଥିବା ମାର୍ଗଦର୍ଶିକାକୁ ସମସ୍ତ ରାଜନୈତିକ ଦଳ ଓ ପ୍ରାର୍ଥୀମାନେ ଅନୁପାଳନ କରିବାକୁ ଅନୁରୋଧ କରିଥିଲେ। ସାଧାରଣ ନିର୍ବାଚନ ପର୍ଯ୍ୟବେକ୍ଷକ ଡ. ପ୍ରତାପ କୁମାର ମିଶ୍ର ରାଜନୈତିକ ଦଳ ଓ ପ୍ରାର୍ଥୀମାନେ କମିଶନରଙ୍କ ନିୟମକୁ କଡ଼ାକଡି଼ ପାଳନ ପାଇଁ ପରାମର୍ଶ ଦେଇଥିଲେ। ଏସ୍ପି. ରାହୁଲ ପି.ଆର. ଆଇନ ଶୃଙ୍ଖଳା ରକ୍ଷା ପାଇଁ ପ୍ରତ୍ୟେକ ପ୍ରାର୍ଥୀ ଓ ରାଜନୈତିକ ଦଳର ସହଯୋଗ କାମନା କରିଥିଲେ।
ଧର୍ମଶାଳା ଓ ଯାଜପୁର ବ୍ଲକ୍ରେ ଫେବୃୟାରୀ ୧୬ରେ, ଦଶରଥପୁର ଓ ବଡ଼ଚଣା ବ୍ଲକ୍ରେ ୧୮ରେ, କୋରାଇ ଓ ବିଂଝାରପୁର ବ୍ଲକ୍ରେ ୨୦ରେ, ସୁକିନ୍ଦା ଓ ଦାନଗଦି ବ୍ଲକ୍ରେ ୨୨ରେ ଏବଂ ବରୀ ଓ ରସୁଲପୁର ବ୍ଳ୍କରେ ଫେବୃୟାରୀ ୨୪ରେ ମତଦାନ ପୂର୍ବାହ୍ନ ୭ରୁ ଆରମ୍ଭ ହୋଇ ଅପରାହ୍ନ ୧ ପର୍ଯ୍ୟନ୍ତ ଚାଲିବ। ଭୋଟ ଗଣତି ଫେବୃୟାରୀ ୨୬ରୁ ୨୮ ତାରିଖ ପର୍ଯ୍ୟନ୍ତ ସମ୍ପୃକ୍ତ ବ୍ଲକ୍ କାର୍ଯ୍ୟାଳୟରେ ସକାଳ ୮ରୁ ଅନୁଷ୍ଠିତ ହେବ ବୋଲି ମଲ୍ଲିକ ସୂଚନା ଦେଇଥିଲେ। କୋଭିଡ୍ କଟକଣା ମଧ୍ୟରେ ଭୋଟ ଗ୍ରହଣ ଓ ଗଣିତ କରାଯିବ। ପ୍ରାର୍ଥୀ ଯଦି କୋଭିଡ୍ ସଂକ୍ରମିତ ହୁଅନ୍ତି ଇଲୋକ୍ଟ୍ରୋନିକ ମିଡ଼ିଆ ବା ସାମାଜିକ ଗଣମାଧ୍ୟମରେ ପ୍ରଚାର କରିବେ। କୌଣସି ରୋଡ଼ ସୋ, ପଦଯାତ୍ରା, ସାଇକେଲ, ବାଇକ୍ ବା ଗାଡ଼ି ରାଲି କରାଯାଇପାରିବ ନାହିଁ। କୌଣସି ବିଜୟ ଶୋଭାଯାତ୍ରା ମଧ୍ୟ ହୋଇପାରିବ ନାହିଁ ବୋଲି ଏହି ବୈଠକରେ ସ୍ପଷ୍ଟ କରାଯାଇଥିଲା। ଉକ୍ତ ବୈଠକରେ କଳିଙ୍ଗ ନଗର ଅତିରିକ୍ତ ଜିଲାପାଳ ସନ୍ତୋଷ କୁମାର ମିଶ୍ର, ଅତିରିକ୍ତ ଜିଲାପାଳ (ପ୍ରଶାସନ) ମହିର ପ୍ରସାଦ ମହାନ୍ତି, ପ୍ରକଳ୍ପ ନିର୍ଦ୍ଦେଶକ ଅଶୋକ କୁମାର ବେହୁରିଆ, ଉପଜିଲାପାଳ ଡ.ଶରତ ଚନ୍ଦ୍ର ମହାପାତ୍ର, ଜିଲା ପଞ୍ଚାୟତ ଅଧିକାରୀ ଅଶୋକ କୁମାର ସେଠୀ ପ୍ରମୁଖ ଆଲୋଚନା ଅଂଶ ଗ୍ରହଣ କରିଥିଲେ।
