ବାହାନଗା,୧୩ା୬(ଡି.ଏନ୍.ଏ.): ବାଲେଶ୍ୱର ଜିଲା ବାହାନଗା ଷ୍ଟେଶନ ନିକଟରେ ଗତ ୨ ତାରିଖରେ ଘଟିଥିବା ଭୟଙ୍କର ରେଳ ଦୁର୍ଘଟଣାରେ ମୃତ ବ୍ୟକ୍ତିମାନଙ୍କ ଉଦ୍ଦେଶ୍ୟରେ ସ୍ମୃତିଚାରଣ ଓ ଏକାଦଶାହ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ବାହାନଗା, ସୋର ଓ ବାଲେଶ୍ୱର ଅଞ୍ଚଳର ବିଭିନ୍ନ ସାମାଜିକ ଅନୁଷ୍ଠାନ ପକ୍ଷରୁ ଏହି କାର୍ଯ୍ୟକ୍ରମ ଆୟୋଜନ କରାଯାଇଥିଲା। ରବିବାର ଦଶାହ ଅବସରରେ ଅନେକ ଲୋକ ମୁଣ୍ଡନ ହୋଇଥିବା ବେଳେ ସୋମବାର ଏକାଦଶାହରେ ସର୍ବଧର୍ମ ପ୍ରାର୍ଥନା ଓ ଶ୍ରଦ୍ଧାଞ୍ଜଳି ସଭା ଅନୁଷ୍ଠିତ ହୋଇଥିଲା। ଏହି ସଭାରେ ମୁଖ୍ୟ ଅତିଥି ଭାବେ ଶକ୍ତିମନ୍ତ୍ରୀ ପ୍ରତାପ କେଶରୀ ଦେବ ଯୋଗ ଦେଇଥିଲେ। ଏଥିରେ ଶରତ ଚନ୍ଦ୍ର ରାଜ ସଭାପତିତ୍ୱ କରିଥିଲା ବେଳେ ମଞ୍ଚ ସଂଯୋଜନା କରିଥିଲେ ସଂସ୍କୃତି ମନ୍ତ୍ରୀ ଅଶ୍ୱିନୀ କୁମାର ମହାପାତ୍ର। ଅନ୍ୟମାନଙ୍କ ମଧ୍ୟରେ ପ୍ରଦୀପ ଜେନା, ନୀଳାମ୍ବର ମହାଳିକ, ଶିଶିର ଅଗସ୍ତି, ମଧୁସୂଦନ ଶିଅଳ, ନାରାୟଣ ପଣ୍ଡା, ଜୟୀରାମ ଦାସ, ରବୀନ୍ଦ୍ର ଜେନା, ବ୍ୟୋମକେଶ ରାୟ, ତାପସ ପରିଡ଼ା, ଶୁଭେନ୍ଦୁ ମଙ୍ଗରାଜ, ସଞ୍ଜୀବ ମଲ୍ଲିକ, ଭ୍ରମରବର ନାୟକ, ଫକୀର୍ ଚରଣ ଦାସ, ଛାୟା ପଣ୍ଡା ପ୍ରମୁଖ ଅତିଥି ଭାବେ ଯୋଗଦେଇଥିଲେ। ମୃତ ରେଳଯାତ୍ରୀଙ୍କ ଅମର ଆତ୍ମାର ସଦ୍ଗତି ନିମନ୍ତେ ବାହାନଗା ଉଚ୍ଚ ବିଦ୍ୟାଳୟ ପଡ଼ିଆରେ ବିଶ୍ୱଶାନ୍ତି ମହାଯଜ୍ଞ, ଅଷ୍ଟପ୍ରହର ନାମ ସଙ୍କୀର୍ତ୍ତନ, ଅଖଣ୍ଡ ଗାୟତ୍ରୀ ମନ୍ତ୍ର ଜପ, ସାମୂହିକ ବେଦପାଠ, ଦୀପଦାନ ଆଦି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।
ଶକ୍ତି ମନ୍ତ୍ରୀଙ୍କ ସଭାରେ ପାଓ୍ବାର କଟ୍
ବାହାନଗା/ବାଲେଶ୍ୱର ଅଫିସ,(ଡି.ଏନ୍.ଏ.): ରାଜ୍ୟରେ ବିଦ୍ୟୁତ୍ କାଟ ହେଉନାହିଁ ବୋଲି ଶକ୍ତିମନ୍ତ୍ରୀ ପ୍ରତାପ କେଶରୀ ଦେବ ଦୃଢ଼ୋକ୍ତି ପ୍ରକାଶ କରୁଥିବା ବେଳେ ସେ ନିଜେ ଉପସ୍ଥିତ ଥିବା ଏକ ସଭାରେ ବିଦ୍ୟୁତ୍ କାଟ୍ ହେବା ଚର୍ଚ୍ଚାର ବିଷୟ ପାଲଟିଛି। ଏହି ପ୍ରସଙ୍ଗକୁ ନେଇ ରାଜନୀତି ଜୋର ଧରିଛି। ବାଲେଶ୍ୱର ଜିଲା ବାହାନଗାଠାରେ ମୃତ ରେଳଯାତ୍ରୀଙ୍କ ସ୍ମୃତି ଉଦ୍ଦେଶ୍ୟରେ ସୋମବାର ଅନୁଷ୍ଠିତ ସର୍ବଧର୍ମ ପ୍ରାର୍ଥନା ଓ ଶ୍ରଦ୍ଧାଞ୍ଜଳି ସଭାରେ ମୁଖ୍ୟ ଅତିଥିଭାବେ ଶକ୍ତିମନ୍ତ୍ରୀ ପ୍ରତାପ କେଶରୀ ଯୋଗଦେଇଥିଲେ। ସଭାକାର୍ଯ୍ୟ ଚାଲିଥିବା ବେଳେ ହଠାତ୍ ବିଦ୍ୟୁତ୍ କାଟ ହୋଇଥିଲା। ଦୀର୍ଘ ସମୟ ପର୍ଯ୍ୟନ୍ତ କରେଣ୍ଟ ଆସି ନ ଥିଲା। ଏହି ସମୟରେ ଜେନେରେଟର ବ୍ୟବହାର କରାଯାଇଥିଲା। ଶକ୍ତିମନ୍ତ୍ରୀ ସଭା କାର୍ଯ୍ୟକ୍ରମ ସାରି ଯିବା ସମୟରେ କରେଣ୍ଟ ଆସିଥିଲା। ଗଣମାଧ୍ୟମ ପ୍ରତିନିଧିମାନେ ଶକ୍ତିମନ୍ତ୍ରୀଙ୍କ ମତାମତ ଜାଣିବାକୁ ଚାହିଁଥିଲେ ମଧ୍ୟ ସେ କିଛି ଉତ୍ତର ନ ଦେଇ ଚାଲିଯାଇଥିଲେ। ପାଓ୍ବାର କଟ୍ ସମ୍ପର୍କରେ ବାହାନଗା ବିଦ୍ୟୁତ୍ ବିଭାଗ ଏସ୍ଡିଓଙ୍କୁ ପଚାରିବାରୁ ସୋର ଗ୍ରୀଡ୍ରୁ ଲାଇନ୍ ଟ୍ରିପ୍ ହୋଇଯାଇଥିଲା । ଫଳରେ ୪୫ ମିନିଟ୍ ବିଦ୍ୟୁତ୍ କଟିଥିଲା। କୌଣସି ଉଦ୍ଦେଶ୍ୟ ରଖି ବିଦ୍ୟୁତ୍ କାଟ୍ ହୋଇ ନ ଥିଲା ବୋଲି ସେ କହିଛନ୍ତି।