ଅହମ୍ମଦାବାଦ,୧୮।୩: ସ୍ଥାନୀୟ ନରେନ୍ଦ୍ର ମୋଦି ଷ୍ଟାଡିମୟରେ ଖେଳାଯାଇଥିବା ୪ର୍ଥ ଟି୨୦ ମ୍ୟାଚ୍ରେ ଇଂଲଣ୍ଡକୁ ୮ ରନ୍ରେ ହରାଇ ଦେଇଛି ଭାରତ। ଏଥି ଯୋଗୁ ୫ ମ୍ୟାଚ୍ ବିଶିଷ୍ଟ ସିରିଜ୍ ଏବେ ୨-୨ର ବରାବର ସ୍ଥିତିରେ ପହଞ୍ଚିଛି। ସିରିଜ୍ର ଅନ୍ତିମ ତଥା ଫାଇନାଲ ମ୍ୟାଚ୍ ଆସନ୍ତା ଶନିବାର ସମାନ ଭେନ୍ୟୁରେ ଖେଳାଯିବ।
ସୂର୍ଯ୍ୟକୁମାର ଯାଦବଙ୍କ ଅର୍ଦ୍ଧଶତକୀୟ ଇନିଂସ ବଳରେ ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ଟିମ୍ ଇଣ୍ଡିଆ ପୂରା ୨୦ ଓଭରରେ ୮ ଉଇକେଟ ହରାଇ ୧୮୫ ରନ୍ କରିଥିଲା। ସୂର୍ଯ୍ୟ ସର୍ବାଧିକ ୫୭ ରନ୍ କରିଥିବାବେଳେ ତାଙ୍କୁ ସହାୟତା ଦେଇଥିଲେ ଶ୍ରେୟାସ ଆୟାର (୩୭) ଓ ରିଷଭ ପନ୍ତ (୩୦) ଉପଯୁକ୍ତ। ଭ୍ରମଣକାରୀ ବୋଲରଙ୍କ ମଧ୍ୟରେ ସବୁଠୁ ଘାତକ ସାବ୍ୟସ୍ତ ହୋଇଥିଲେ ଜୋଫ୍ରା ଆର୍ଚ୍ଚର। ସେ ୪ ଉଇକେଟ ହାତେଇଥିଲେ। ଜବାବରେ ଭାରତୀୟ ବୋଲିଂ ଆଟାକ୍ ଇଂଲଣ୍ଡ ଦଳକୁ କ୍ରମାଗତ ଝଟକା ଦେଇଥିଲା। ଏଥିଯୋଗୁ ଇଂଲଣ୍ଡ ଶେଷ ପର୍ଯ୍ୟନ୍ତ ଖେଳି ୮ ଉଇକେଟ ହରାଇ ୧୭୭ ରନ୍ କରିବାକୁ ସକ୍ଷମ ହୋଇଥିଲା। ଦଳ ପାଇଁ ଜାସନ ରୟ ୪୦, ବେନ ଷ୍ଟୋକ୍ସ ୪୬, ଜନ୍ନି ବେଆରଷ୍ଟୋ ୨୫ ରନ୍ କରିଥିଲେ। ଭାରତ ପାଇଁ ଶାର୍ଦ୍ଦୁଳ ଠାକୁର ସର୍ବାଧିକ ୩ ଉଇକେଟ ନେଇଥିବାବେଳେ ରାହୁଲ ଚହର ଓ ହାର୍ଦ୍ଦିକ ପାଣ୍ଡ୍ୟା ୨ ଲେଖାଏ ଉଇକେଟ ହାତେଇଥିଲେ। ଚଳିତ ସିରିଜ୍ରେ ପ୍ରଥମ ଥର ପାଇଁ ଆଗ ବ୍ୟାଟିଂ କରିଥିବା ଦଳ ବିଜୟ ହାସଲ କରିଛି।