ଚଟ୍ଟୋଗ୍ରାମ,୮।୨: ବାଂଲାଦେଶର ଚଟ୍ଟୋଗ୍ରାମରେ ଖେଳାଯାଉଥିବା ପ୍ରଥମ ଟେଷ୍ଟରେ ଓ୍ବେଷ୍ଟଇଣ୍ଡିଜ୍ ଘରୋଇ ଦଳକୁ ୩ ଉଇକେଟ୍ରେ ପରାସ୍ତ କରିଛି। ଏହି ବିଜୟ ଓ୍ବେଷ୍ଟଇଣ୍ଡିଜ୍ ପାଇଁ ଖାସ୍ ଥିଲା। ବାଂଲାଦେଶ ଓ୍ବେଷ୍ଟଇଣ୍ଡିଜ୍କୁ ୩୯୫ରନ୍ର ବିଶାଳ ବିଜୟ ଲକ୍ଷ୍ୟ ଦେଇଥିଲା। ଏହି ଲକ୍ଷ୍ୟକୁ ପିଛା କରିବା ଓ୍ବେଷ୍ଟଇଣ୍ଡିଜ୍ ପାଇଁ କଷ୍ଟକର ହୋଇଥିଲେ ମଧ୍ୟ ଅଲରାଉଣ୍ଡର କାଇଲ ମେୟର୍ସଙ୍କ ଚମତ୍କାର ଶତକ ବଳରେ ଅସମ୍ଭବ ସମ୍ଭବରେ ପରିଣତ ହୋଇଥିଲା। କ୍ୟାରିୟର୍ର ପ୍ରଥମ ମ୍ୟାଚ୍ରେ କାଇଲ ୩୧୦ଟି ବଲ୍ରେ ୨୧୦ ରନ୍ର ପାଳି ଖେଳିଥିଲେ। ଏହି ପାଳିରେ ସେ ଅନେକ ରେକର୍ଡ ହାସଲ କରିଥିଲେ। ସେ ବିଶ୍ୱର ଏକମାତ୍ର କ୍ରିକେଟର୍ ଭାବେ ଡେବ୍ୟୁ ମ୍ୟାଚ୍ର ଦ୍ୱିତୀୟ ଇନିଂସରେ ଦ୍ୱିଶତକ ଅର୍ଜନ କରିଛନ୍ତି। କାଇଲି ବାରବାଡୋସର ଖେଳାଳି ଅଛନ୍ତି। ସେ ଜଣେ ମିଡିୟମ୍ ପେସ୍ ବୋଲର୍ ଏବଂ ବିସ୍ଫୋରକ ବ୍ୟାଟ୍ସମ୍ୟାନ୍ ଭାବେ ଜଣାଶୁଣା। ୨୦୧୭ରେ ସେ ମୁତ୍ୟୁମୁଖରୁ ବର୍ତ୍ତିଥିଲେ। କାଇଲି ମାୟର୍ସ ଭିଣ୍ଡଓ୍ବାର୍ଡ ଆୟଲାଣ୍ଡ ପ୍ରାଞ୍ଚାଇଜ୍ ଟିମ୍ର ଟ୍ରେନିଂ କ୍ୟାମ୍ପରେ ଯୋଗ ଦେବା ପାଇଁ ଡୋମିନିକା ଯାଇଥିଲେ। ସେଠାରେ ଏକ ବାତ୍ୟା ହୋଇଥିଲା। ସେତେବେଳେ କାଇଲିଙ୍କ ସହ ସମସ୍ତ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। ସେ ସମୟରେ ଡୋମିନିକାରେ ମାରିୟ ତୁଫାନ ତାଣ୍ଡବ ଲୀଳା ରଚିଥିଲା। କାଇଲିଙ୍କ ମାତାପିତା ଭୟଭୀତ ହୋଇଯାଇଥିଲେ। ସୌଭାଗ୍ୟବଶତଃ ସେ ମୃତ୍ୟୁମୁଖରୁ ବର୍ତ୍ତିଯାଇଥିଲେ।