ଭୁବନେଶ୍ୱର,୧୬।୧(ବ୍ୟୁରୋ):ହକି ବିଶ୍ୱକପ୍ ସହ ରାଜଧାନୀରେ ଆୟୋଜନ ହୋଇଛି ଭଳିକି ଭଳି ମନୋରଞ୍ଜନ କାର୍ଯ୍ୟକ୍ରମ। ପୋଖରୀପୁଟସ୍ଥିତ କଳାଭୂମି ସମେତ ୩ ପାର୍କରେ ଆୟୋଜିତ କାହାଣୀ ଉତ୍ସବ ‘ଭୁ-ଫେଷ୍ଟୋ’ ପିଲାଙ୍କଠାରୁ ବୟସ୍କଙ୍କୁ ଆକୃଷ୍ଟ କରୁଛି। ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ(ବିଡିଏ) ପକ୍ଷରୁ ବକୁଳ ଫାଉଣ୍ଡେଶନ ଆନୁକୂଲ୍ୟରେ ଚାଲିଥିତ୍ବା ଏହି କାହାଣୀ ଉତ୍ସବ ଦିନକୁ ଦିନ ଅଧିକ ଆଦର ଲାଭ କରିବାରେ ଲାଗିଛି।
ସମ୍ ହସପିଟାଲ ନିକଟ ଏପିଜେ ଅବଦୁଲ କଲାମ ପାର୍କରେ ଷ୍ଟୋରୀ ଟେଲର ଅକ୍ଷୟ ଗାନ୍ଧୀଙ୍କ କାହାଣୀରୁ କାର୍ଯ୍ୟକ୍ରମ ଆରମ୍ଭ ହୋଇଥିଲା। ସେ ହିନ୍ଦୀ ଭାଷାରେ ପିଲାଙ୍କ ମନକୁ ଛୁଇଁଲା ଭଳି କାହାଣୀ ପରିବେଷଣ କରିଥିଲେ। କାହାଣୀରେ ବିଭିନ୍ନ ଜୀବଜନ୍ତୁଙ୍କ ଚରିତ୍ରକୁ ନିଜର ଅଙ୍ଗଭଙ୍ଗୀ ଏବଂ ପଶୁପକ୍ଷୀଙ୍କ ସ୍ବରରେ ଜୀବନ୍ତ କରିବାକୁ ଚେଷ୍ଟା କରିଥିଲେ। ପରେ ସ୍କଟ୍ଲ୍ୟାଣ୍ଡର ଷ୍ଟୋରୀ ଟେଲର ମାରିୟନ୍ କେନିଙ୍କ କାହାଣୀ ପରିବେଷଣ ସମୟରେ ପୂରା ଅଞ୍ଚଳ ତାଳିରେ ଗୁଞ୍ଜରିତ ହୋଇଥିଲା। ସେହିପରି ଇଣ୍ଡୋନେସିଆର ଆରିୟୋଙ୍କ କାହାଣୀ ପରିବେଷଣ ଶୈଳୀ ମଧ୍ୟ ବେଶ୍ ନିଆରା ଥିଲା। ବିଶିଷ୍ଟ ଓଡ଼ିଆ ଷ୍ଟୋରୀ ଟେଲର ହୃଦୟରଞ୍ଜନଙ୍କ କାହାଣୀ ସବୁ ବର୍ଗର ଲୋକଙ୍କ ମନକୁ ଛୁଇଁଥିଲା। ସାଉଥ୍ ଆଫ୍ରିକାର ବୋଙ୍ଗିସ୍ବା ସ୍ଥାନୀୟ ଇନ୍ଦିରା ଗାନ୍ଧୀ (ଆଇଜି) ପାର୍କରେ ପିଲାଙ୍କୁ ମନମତାଣିଆ କାହାଣୀ ଶୁଣାଇଥିଲେ। ଦ ପପେଟାରିଆନ୍ସଙ୍କ କୌତୁକିଆ କଥାରେ ଦର୍ଶକ ହସି ହସି ବେଦମ ହୋଇଥିଲେ। ଅନ୍ୟ ଷ୍ଟୋରୀ ଟେଲରଙ୍କ ମଧ୍ୟରେ କପିଲ ପାଣ୍ଡେ ହିନ୍ଦୀରେ ଏବଂ ପ୍ରାଚୀ ତାରା ଓଡ଼ିଆରେ କାହାଣୀ ଶୁଣାଇଥିଲେ।
ବୁଦ୍ଧ ଜୟନ୍ତୀ ପାର୍କରେ ସିଙ୍ଗାପୁରର ରୋଗର ଜେଙ୍କିନ୍ସ ପିଲାଙ୍କୁ କାହାଣୀ ଶୁଣାଇବା ସହିତ ସେମାନଙ୍କ ସହ କଥା ହୋଇ ମନୋରଞ୍ଜନ କରିଥିଲେ। ତାଙ୍କ ସହ ଲୋପାମୁଦ୍ରା ସେନାପତି ମଧ୍ୟ ଯୋଡ଼ି ହୋଇ ପିଲାଙ୍କ ସହ ମତ ବିନିମୟ କରୁଥିବା ଦେଖିବାକୁ ମିଳିଥିଲା। ଏଠାରେ ମଧ୍ୟ ‘ଦ ପପେଟାରିଆନ୍ସ’ ଲୋକଙ୍କୁ ହସାଇ ହସାଇ ବେଦମ କରିଥିଲେ। ନୁପୂର ଅଗ୍ରଓ୍ବାଲ ମ୍ୟାଜିକ ଷ୍ଟୋରୀ ପରିବେଷଣ କରିଥିଲେ। ପୂର୍ବରୁ ଆଇଜି ପାର୍କରେ ପିଲାଙ୍କ ମନ କିଣିଥିବା ୟୁଏସ୍ଏର ଆଣ୍ଟୋନିଓ ରୋଚା କଳାଭୂମିରେ ଅଙ୍ଗଭଙ୍ଗୀ ପ୍ରଦର୍ଶନ ସହ କାହାଣୀ ଶୁଣାଇଥିଲେ। ଅନୁଭା ଦଶପାଲ, ମୀରା ଦାସ ଏବଂ ଶାଶ୍ୱତୀ ପଟ୍ଟନାୟକଙ୍କ କାହାଣୀ ଶ୍ରୋତାଙ୍କୁ ବାନ୍ଧି ରଖିଥିଲା। ସମସ୍ତ ୪ ସ୍ଥାନରେ ପୂର୍ବାପେକ୍ଷା ରବିବାର ଅଧିକ ଭିଡ଼ ଦେଖିବାକୁ ମିଳିଥିଲା। ଆସନ୍ତା ୧୭ ତାରିଖ ପର୍ଯ୍ୟନ୍ତ ଚାଲିବାକୁ ଥିବା ଏହି କାର୍ଯ୍ୟକ୍ରମରେ ଅଧିକ ସଂଖ୍ୟକ ଦର୍ଶକ ଯୋଗଦେଇ ଉପଭୋଗ କରିବା ପାଇଁ ବକୁଳ ଫାଉଣ୍ଡେଶନର ପ୍ରତିଷ୍ଠାତା ସୁଜିତ ମହାପାତ୍ର ଆମନ୍ତ୍ରଣ କରିଛନ୍ତି। କାହାଣୀ ଶୁଣିବା ସହ କାହାଣୀ ପଢ଼ିବା ପାଇଁ ସେ ଦର୍ଶକଙ୍କ ଉଦ୍ଦେଶ୍ୟରେ ବାର୍ତ୍ତା ଦେଇଛନ୍ତି।