ମସ୍କୋ,୧୧।୧୦: ଇସ୍ରାଏଲ ଓ ହମାସ୍ର ରକ୍ତାକ୍ତ ସଂଘର୍ଷ ଆଜିକୁ ୫ଦିନ ଧରି ଲାଗି ରହିଛି। ଯୁଦ୍ଧରେ ସରକାରୀ ସମ୍ପତ୍ତି, ଘର, ଯାନବାହାନ କ୍ଷତି ହେବା ସହିତ ଅଧିକରୁ ଅଧିକ ସାଧାରଣ ନାଗରିକ ଶିକାର ହେଉଛନ୍ତି। ଯୁଦ୍ଧକୁ ନେଇ ସବୁ ଦେଶ ଦୁଇ ଭାଗରେ ବିଭକ୍ତ ହୋଇଛନ୍ତି। ଭାରତ ଏବଂ ଆମେରିକା ସମେତ ଅନେକ ଦେଶ ଇସ୍ରାଏଲର ସମର୍ଥନରେ ଛିଡା ହୋଇଥିବାବେଳେ ଶକ୍ତିଶାଳୀ ଦେଶ ଋଷିଆ ପାଲେଷ୍ଟାଇନ ଆତଙ୍କବାଦୀ ଗୋଷ୍ଠୀ ହମାସ୍କୁ ସମର୍ଥନ କରିଛି। ସେହିପରି ଯୁଦ୍ଧ ପାଇଁ ଆମେରିକାକୁ ଦାୟୀ କରିଛି।
ଋଷିଆର ରାଷ୍ଟ୍ରପତି ଭ୍ଲାଦିମିର ପୁଟିନ କହିଛନ୍ତ, ଇସ୍ରାଏଲ ଏବଂ ପାଲେଷ୍ଟାଇନମାନଙ୍କ ମଧ୍ୟରେ ହୋଇଥିବା ଏହି ହିଂସା ଏକ ଭୟାନକ ରୂପକୁ ଦର୍ଶାଉଛି। ଏଥିରୁ ଜଣାପଡୁଛି ଯେ, ମଧ୍ୟ-ପୂର୍ବରେ ଆମେରିକାର ନୀତି ବିଫଳ ହୋଇଛି ଏବଂ ଏହି ଯୁଦ୍ଧରେ ପାଲେଷ୍ଟାଇନଙ୍କ ଆବଶ୍ୟକତା ପ୍ରତି ଧ୍ୟାନ ଦିଆଯାଉ ନାହିଁ।
ମୁଁ ଭାବୁଛି ଅନେକ ଲୋକ ମୋ ସହ ସହମତ ହେବେ ଯେ ଏହି ଯୁଦ୍ଧ ମଧ୍ୟ-ପୂର୍ବରେ ଆମେରିକାର ରାଜନୀତିର ବିଫଳତାର ଏକ ସ୍ପଷ୍ଟ ଉଦାହରଣକୁ ପ୍ରକାଶ କରିଛି। ସେହିପରି ସ୍ବାଧୀନ ତଥା ସାର୍ବଭୌମତ୍ୟ ପାଲେଷ୍ଟାଇନ ରାଷ୍ଟ୍ର ଗଠନ ସମ୍ପର୍କରେ ମିଳିତ ଜାତିସଂଘ ସୁରକ୍ଷା ପରିଷଦର ନିଷ୍ପତ୍ତି କାର୍ଯ୍ୟକାରୀ କରିବାର ଆବଶ୍ୟକତା ରହିଛି। ଏହି ସମସ୍ୟାର ସମାଧାନ କରିବା ପରିବର୍ତ୍ତେ ଆମେରିକା ଏକଚାଟିଆ ଅଧିକାର କରିବାକୁ ଚେଷ୍ଟା କରିଛି। ପାଲେଷ୍ଟାଇନବାସୀଙ୍କ ସ୍ବାର୍ଥକୁ ଆମେରିକା ଅଣଦେଖା କରୁଥିବା ପୁଟିନ ଅଭିଯୋଗ କରିଛନ୍ତି।