ସମ୍ବଲପୁର,୧୮ା୧୧(ବ୍ୟୁରୋ): ସମ୍ବଲପୁର ମହାନଗର ନିଗମ ଦଣ୍ଡେଇପାଲି ଗ୍ରାମ ଛକ ରାସ୍ତା କଡ଼ରେ କୃଷକ ଭବନକୁ ସ୍ଥାନୀୟ ଜଣେ ଚାଷୀ ରାମ ସାଗର ସାହୁ ଜବରଦଖଲ କରିଥିବା ନେଇ ସ୍ଥାନୀୟ କେତେଜଣ ଯୁବକ ଜିଲାପାଳଙ୍କ ନିକଟରେ ଅଭିଯୋଗ କରିଛନ୍ତି। ସେମାନଙ୍କ ଅଭିଯୋଗକ୍ରମେ, ପ୍ରାୟ ୨୦ବର୍ଷ ହେବ ଚାଷୀମାନଙ୍କ ପାଇଁ କୃଷକ ଭବନ ନିର୍ମାଣ କରାଯାଇଥିଲା। ଆଖପାଖ ଜମିରେ ନଡ଼ିଆ ଗଛ ଓ ବିଭିନ୍ନ ଫଳଫୁଲ ଗଛ ଲଗାଯାଇଛି। ଉକ୍ତ ଜମି ଓ ଘରକୁ ଜବରଦଖଲ କରାଯାଇଥିବାରୁ ଗ୍ରାମର ସାମୂହିକ କାର୍ଯ୍ୟ ପାଇଁ ବ୍ୟବହାରରେ ଆସିପାରୁନାହିଁ। କିଛିଦିନ ପୂର୍ବରୁ ବିଧାୟକ ନାଉରୀ ନାଏକ ଉକ୍ତ ସ୍ଥାନରେ କଂକ୍ରିଟ ରାସ୍ତା ନିର୍ମାଣ ପାଇଁ ୫ଲକ୍ଷ ଟଙ୍କା ଅନୁଦାନ ଦେଇଛନ୍ତି। ହେଲେ ଜମି ଜବରଦଖଲ ଥିବାରୁ କାମ ହୋଇପାରୁନାହିଁ। ଏ ନେଇ ଶୀଘ୍ର ପଦକ୍ଷେପ ଗ୍ରହଣ କରିବାକୁ ସେମାନେ ଦାବି କରିଛନ୍ତି। କଶୋର ମହାକୁଡ଼, ଚନ୍ଦନ ସାହାଣୀ, ବିଭୂତି ନାଏକ, ପୂର୍ଣ୍ଣଚନ୍ଦ୍ର ବୁଡ଼େକ, ରାହୁଲ ବେହେରା ପ୍ରମୁଖଙ୍କ ସ୍ବାକ୍ଷର ରହିଛି। ଅନ୍ୟପଟୋ ଚାଷୀ ସାହୁ କହିଛନ୍ତି, କୃଷକ ଭବନ ସରକାରୀ ସମ୍ପତ୍ତି ଅଟେ। ଅସାମାଜିକ କାର୍ଯ୍ୟ ନ ହେବା ପାଇଁ ଏହାକୁ ବହୁବର୍ଷ ଧରି ରଖିଛି। ଫୁଲଫଳ ଗଛ ଲାଗି ସୌନ୍ଦର୍ଯ୍ୟକରଣ କରାଯାଇଛି। ସାମାଜିକ କାର୍ଯ୍ୟ ପାଇଁ ଗ୍ରାମରେ ଏକ କଲ୍ୟାଣ ମଣ୍ଡପ ନିର୍ମାଣ କରାଯାଇଛି। ଉକ୍ତ ମଣ୍ଡପକୁ ଯାଇଥିବା ରାସ୍ତା ବିଧାୟକ ପାଣ୍ଠିରୁ କଂକ୍ରିଟକରଣ କରିବାକୁ ପରାମର୍ଶ ଦେଇଥିଲି। ଏହି କୃଷକ ଭବନରେ ସ୍ଥାନୀୟ ଲୋକଙ୍କ ପାଇଁ ସରକାରୀ କାର୍ଯ୍ୟ କରାଯାଉଛି। ଜିଲା ଶ୍ରମ ବିଭାଗର ଏକ ଟିମ୍ ଅସ୍ଥାୟୀ ଭାବେ ଅଫିସ କାର୍ଯ୍ୟ କରୁଛନ୍ତି। ଶ୍ରମ ବିଭାଗର ଏକ ଶାଖା ଖୋଲିବା ପାଇଁ ଜିଲାପାଳଙ୍କଠାରେ ଅନୁରୋଧ କରାଯାଇଛି। କାଳେ ସରକାରୀ ହାତକୁ କୃଷକ ଭବନ ଚାଲିଯିବ ସେଥିପାଇଁ କେତେଜଣ ବ୍ୟକ୍ତି ସହି ପାରୁନାହାନ୍ତି। ଏହାବ୍ୟତୀତ କେତେଜଣ ଅଭିଯୋଗକାରୀ ଶକ୍ତି ଓ ଜଳସେଚନ ବିଭାଗର ୧୩ଏକର ୯୫ଡେସିମିଲ ଜମି ଜବରଦଖଲ କରିଛନ୍ତି। ଏହାକୁ ନେଇ ସଦର ଥାନା ଓ ଜିଲାପାଳଙ୍କ ପାଖରେ ଆବଶ୍ୟକ କାଗଜପତ୍ର ସହ ଅଞ୍ଚଳବାସୀ ଅଭିଯୋଗ କରିଛନ୍ତି। ଏହି ଜମିକୁ ସୁରକ୍ଷା ଦେବାକୁ ଏହା ଏକ ରାଜନୈତିକ ଉଦ୍ଦେଶ୍ୟ ବୋଲି ସେ କହିଥିଲେ।