ମାଲକାନଗିରି,୨୦।୮(ଡି.ଏନ୍.ଏ.): ମାଲକାନଗିରି ସଦର ବ୍ଲକ ପାଣ୍ଡ୍ରିପାଣି ଆଶ୍ରମ ବିଦ୍ୟାଳୟରେ ଜଣେ ନବମ ଶ୍ରେଣୀ ଛାତ୍ରଙ୍କ ମୃତ୍ୟୁକୁ ନେଇ ପରିବାର ଓ ଗ୍ରାମବାସୀ ବିଦ୍ୟାଳୟ ମାଟ୍ରୋନ ଏବଂ ବିଦ୍ୟାଳୟର ଶିକ୍ଷକ ଶିକ୍ଷୟିତ୍ରୀଙ୍କୁ ଦାୟୀ କରିଛନ୍ତି। ଘଟଣାରୁ ପ୍ରକାଶ ଯେ, ଉକ୍ତ ବିଦ୍ୟାଳୟର ଛାତ୍ରାବାସରେ ରହି ଖଇରପୁଟ ବ୍ଲକ ପୋଡାଭଟା ଗ୍ରାମର ସୋନିଆ ଦୋରା ନବମ ଶ୍ରେଣୀରେ ଅଧ୍ୟୟନ କରୁଥିଲେ। ସୋନିଆ ଜଣେ ମା’ବାପ ଛେଉଣ୍ଡ। ତାଙ୍କ ଦାଦା ପୁତୁରା ସୋନିଆଙ୍କୁ ଉଚ୍ଚ ଶିକ୍ଷିତ କରିବା ପାଇଁ ପାଣ୍ଡ୍ରିପାଣି ଆଶ୍ରମ ବିଦ୍ୟାଳୟକୁ ପଠାଇଥିଲେ। ତେବେ ଶୁକ୍ରବାର ତାଙ୍କର ପେଟ ବ୍ୟଥା ହୋଇଥିଲା। ସେ ଛାତ୍ରାବାସରେ ଥିବା କର୍ତ୍ତୃପକ୍ଷଙ୍କୁ ଜଣାଇଥିଲେ। ଛାତ୍ର ଅସୁସ୍ଥ ହେବା ଘଟଣାକୁ ଛାତ୍ରାବାସ କର୍ତ୍ତୃପକ୍ଷ ଗୁରୁତର ସହ ନେଇ ନ ଥିଲେ। ସେ ଛାତ୍ରକୁ କିଛି ଔଷଧ ଦେଇ ନୀରବ ରହିଥିବା ପରିବାର ଲୋକେ ଅଭିଯୋଗ କରିଛନ୍ତି। ସୋନିଆ ଅସୁସ୍ଥ ହେବାରୁ ତାଙ୍କୁ ମାଲକାନଗିରି ଚିକିତ୍ସାଳୟକୁ ଅଣାଯାଇଥିଲାା ଚିକିତ୍ସା ସମୟରେ ସୋନିଆଙ୍କ ମୃତ୍ୟୁ ହୋଇ ଯାଇଥିଲା।
ଅନ୍ୟପକ୍ଷେ ସୋନିଆଙ୍କ ମୃତ୍ୟୁକୁ ନେଇ ଭାଇ ସୁରେଶ ଦୋରା ଏବଂ ସମ୍ପର୍କୀୟ ସବିତା ଗୌଡ, ଗ୍ରାମ ମୁଖିଆଙ୍କ ସହ ଗ୍ରାମବାସୀ ପାଣ୍ଡ୍ରିପାଣି ଡାକ୍ତର ଖାନାରେ ୫ ଘଣ୍ଟା ଧରି ମୃତଦେହ ରଖି ଚିକିତ୍ସାରେ ଅବହେଳା ଏବଂ ବିଦ୍ୟାଳୟ କର୍ତ୍ତୃପକ୍ଷ ବେଖାତିର ମନୋଭାବକୁ ଦାୟୀ କରି ମାଲକାନଗିରି ଥାନାରେ ଅଭିଯୋଗ କରିଛନ୍ତି।
ଏ ସମ୍ବନ୍ଧରେ ପ୍ରଧାନ ଶିକ୍ଷୟିତ୍ରୀ ଗୋଲାପ ପୂଜାରୀ ପ୍ରକାଶ କରିଛନ୍ତି ଯେ, ଶୁକ୍ରବାର ସୋନିଆଙ୍କ ପେଟ ବ୍ୟଥା ହେଉଥିବା ଜାଣି ତାଙ୍କୁ ପାଣ୍ଡ୍ରିପାଣି ଗୋଷ୍ଠି ସ୍ବାସ୍ଥ୍ୟକେନ୍ଦ୍ରକୁ ପଠାଯାଇଥିଲା। ଚିକିତ୍ସା ପରେ ଉକ୍ତ ଛାତ୍ର ଛାତ୍ରାବାସକୁ ଆସି ସୁସ୍ଥ ଥିବା ପ୍ରକାଶ କରିଥିଲୋ କିନ୍ତୁ ପରେ ସ୍ବାସ୍ଥ୍ୟାବସ୍ଥା ଖରାପ ହେବାରୁ ତାଙ୍କୁ ପାଣ୍ଡ୍ରିପାଣି ସ୍ବାସ୍ଥ୍ୟକେନ୍ଦ୍ରକୁ ପଠାଯାଇଥିଲା। କିନ୍ତୁ ଅଧିକ ଚିକିତ୍ସା ଲାଗି ତାଙ୍କୁ ମାଲକାନଗିରି ଚିକିତ୍ସାଳୟକୁ ପଠାଯାଇଥିଲା। ପରେ ତାଙ୍କର ମୃତ୍ୟୁ ହୋଇଥିବା ଶିକ୍ଷୟିତ୍ରୀ କହିଥିଲେ। ଏ ସମ୍ପର୍କରେ ତଦନ୍ତ ଜାରି ରହିଥିବା ଥାନା ଅଧିକାରୀ ପ୍ରକାଶ କରିଛନ୍ତି।
