ବ୍ରହ୍ମପୁର ଅଫିସ,୮ା୨: ବ୍ରହ୍ମପୁର ସରକାରୀ ପଲିଟେକନିକରେ ପଢୁଥିବା ଜଣେ ଛାତ୍ରଙ୍କୁ ଅନୁଷ୍ଠାନର ଶିକ୍ଷକମାନେ ମାନସିକ ଓ ଶାରୀରିକ ନିର୍ଯାତନା ଦେଉଥିବା ଅଭିଯୋଗ ହୋଇଛି। ଏପରିକି ତାଙ୍କୁ ଆତ୍ମହତ୍ୟା କରିବାକୁ ବାଧ୍ୟ କରାଯାଉଥିବା ନେଇ ଛାତ୍ରଙ୍କ ପରିବାର ଲୋକେ ବୈଦ୍ୟନାଥପୁର ଥାନାରେ ମଙ୍ଗଳବାର ଅଭିଯୋଗ କରିଛନ୍ତି।
ଆଶିଷ ମହାରଣା ପଲିଟେନିକର ମେକାନିକାଲ ଇଞ୍ଜିନିରିଂରେ ପଢୁଛନ୍ତି। ସେ ୨୦୧୯ରେ ଏଠାରେ ନାମ ଲେଖାଇବା ପରଠାରୁ ଏଠାକାର ଶିକ୍ଷକମାନେ ତାଙ୍କୁ ବିଭିନ୍ନ ପ୍ରକାର ମାନସିକ ନିର୍ଯାତନା ଦେଇଆସୁଛନ୍ତି ବୋଲି ଆଶିଷଙ୍କ ମାଆ ଆରତୀ ମହାରଣା ଅଭିଯୋଗ କରିଛନ୍ତି। ତାଙ୍କ ସାର୍ଟିଫିକେଟ ନେଇ ଚାଲିଯିବାକୁ ଶିକ୍ଷକମାନେ ବାଧ୍ୟ କରୁଥିବା ସେ ଏତଲାରେ ଦର୍ଶାଇଛନ୍ତି। ନିର୍ଯାତନା ଅସହ୍ୟ ହେବାରୁ ଆଶିଷ ଗତ ୩ ତାରିଖରେ ଘରୁ କେଉଁଆଡେ ନିଖୋଜ ହୋଇଯାଇଥିଲେ। ବହୁ ଖୋଜାଖୋଜି ପରେ ତାଙ୍କୁ ନ ପାଇ ପରିବାର ଲୋକେ ଗୋପାଳପୁର ଥାନାରେ ଏତଲା ଦେଇଥିଲେ। ହେଲେ ଏହାର ଦୁଇ ଦିନ ପରେ ତାଙ୍କୁ ରେଳ ଧାରଣା ନିକଟରୁ ଉଦ୍ଧାର କରାଯାଇଥିଲା। ପଲିଟେକନିକର ଶିକ୍ଷକଙ୍କ ନିର୍ଯାତନା ସମ୍ପର୍କରେ ପରିବାର ପକ୍ଷରୁ ବୈଷୟିକ ଶିକ୍ଷା ନିର୍ଦ୍ଦେଶାଳୟରେ ଅଭିଯୋଗ କରାଯାଇଥିବା ବେଳେ ବ୍ରହ୍ମପୁର ଏସ୍ପିଙ୍କ ନିକଟରେ ମଧ୍ୟ ଅଭିଯୋଗ ହୋଇଛି। ପରେ ବୈଦ୍ୟନାଥପୁର ଥାନାରେ ନଂ ୭୧/୨୩ରେ ଏକ ମାମଲା ରୁଜୁ କରାଯାଇ ପୋଲିସ ଘଟଣାର ତଦନ୍ତ ଆରମ୍ଭ କରିଛି। ଏନେଇ ପଲିଟେକନିକ୍ ଅଧ୍ୟକ୍ଷ ନିଶାକର ମଲ୍ଲିକ କହିଛନ୍ତି, ଏଭଳି ଅଭିଯୋଗ ଭିତ୍ତିହୀନ। ସମ୍ପୃକ୍ତ ଛାତ୍ରଙ୍କର ଗତ ଜୁଲାଇରେ ପାଠପଢ଼ା ସରିଥିଲା। ହେଲେ ତାଙ୍କର ତୃତୀୟ ଓ ପଞ୍ଚମ ସେମିଷ୍ଟରରେ କେତେକ ପେପର ବ୍ୟାକ୍ ଥିଲା। ଜାନୁୟାରୀ ୩୦, ୩୧ ଓ ଫେବୃୟାରୀ ୧ ତିନିଦିନ ସେ କଲେଜକୁ ଆସି ପ୍ରାକ୍ଟିକାଲ ପରୀକ୍ଷା ଦେଇଥିବା ବେଳେ ଗତ ୪ ତାରିଖ ଠାରୁ ଆରମ୍ଭ ହୋଇଥିବା ଥିଓରି ପରୀକ୍ଷା ଦେଇନାହାନ୍ତି। ପଲିଟେକ୍ନିକ୍ କଲେଜକୁ ସମ୍ପୃକ୍ତ ଛାତ୍ର ଗତ ୬ ମାସ ଧରି ଆସିନଥିବା ବେଳେ ତାଙ୍କୁ କିପରି ଶିକ୍ଷକମାନେ ନିର୍ଯାତନା ଦେଲେ ବୋଲି ଯେଉଁ ଅଭିଯୋଗ କରୁଛନ୍ତି ତାହା ଭିତ୍ତହୀନ ବୋଲି ସେ କହିିଛନ୍ତି।