ମୁରିବାହାଲ, ୨୩ା୫(ଡି.ଏନ.ଏ.): ବଲାଙ୍ଗୀର ଜ଼ିଲା ମୁରିବାହାଲ ପଞ୍ଚାୟତ ସମିତିର ତ୍ରୈମାସିକ ବୈଠକ ସୋମବାର ବ୍ଲକ ସଭା ଗୃହଠାରେ ଅନୁଷ୍ଠିତ ହୋଇଯାଇଛି। ପଞ୍ଚାୟତ ସମିତି ଅଧ୍ୟକ୍ଷ ହରିବନ୍ଧୁ ମେହେରଙ୍କ ସଭାପତିତ୍ୱରେ ଅନୁଷ୍ଠିତ ବୈଠକ ପ୍ରାରମ୍ଭରେ ଗ୍ରାମ ପଞ୍ଚାୟତ ଅଧିକାରୀ ଏନ.ଯେ.ଥିଓଫିଲ ପୃର୍ବ ବିବରଣୀ ପାଠ କରିଥିଲେ। ସ୍ବାସ୍ଥ୍ୟ ବିଭାଗ ପକ୍ଷରୁ ପ୍ରତୀକ କୁମାର ମେହେର ବିଭାଗ ସମ୍ବନ୍ଧରେ ସୂଚନା ଦେଇଥିଲେ। ସମନ୍ବିତ ଶିଶୁ ବିଭାଗ ଯୋଜନା ଅଧିକାରୀ ସୁପ୍ରଭାତ ମହାପାତ୍ର ନିଜ ବିଭାଗ ତଥ୍ୟ ପ୍ରଦାନ କରୁଥିବା ବେଳେ ବ୍ଲକ ଅନ୍ତର୍ଗତ ୨୨ ପଞ୍ଚାୟତର ୧୯୭ ଅଙ୍ଗନୱାଡି କେନ୍ଦ୍ରରେ ନିମ୍ନମାନର ଛତୁଆ ବଣ୍ଟନ କରାଯାଉଥିବାରୁ ଶିଶୁମାନେ କୁପୋଷଣର ଶିକାର ହେଉଛନ୍ତି ବୋଲି ଗୁଡିଘାଟ ସମିତି ସଭ୍ୟ ପୁଣ୍ୟ ହରପାଳ ଓ ଇଛାପଡା ସମିତି ସଭ୍ୟ ତୋଫାନ ନାଗ ଅଭିଯୋଗ କରିଥିଲେ। ଏଣୁ ଛତୁଆ ବଣ୍ଟନ କରୁଥିବା ଏସ୍ଏଚ୍ଜିକୁ ବଦଳାଇ ନୂତନ ନିଯୁକ୍ତି ଦେବା ପାଇଁ ଜ଼ିଲା ପରିଷଦ ଉପାଧ୍ୟକ୍ଷ ମିଥିଲା ମାଝି କହିଥିଲେ। ଏହି ସମୟରେ ପଞ୍ଚାୟତ ସମିତି ଉପାଧ୍ୟକ୍ଷ ଯାଜ୍ଞସିନୀ ହାତୀ ନିଜ ସିଟ୍ରୁ ଉଠି ମତେ କୌଣସି ଗୁରୁତ୍ୱ ଦିଆଯାଉନାହିଁ ବୋଲି କହି ବୈଠକ ବର୍ଜନ କରିଥିଲେ। ଏହାପରେ ବିଭିନ୍ନ ସମସ୍ୟାକୁ ନେଇ ମୁରିବାହାଲ ସମିତି ସଭ୍ୟ ଚକ୍ରଧର ହେର୍ଣ୍ଣା ଗୃହରେ ମହାତ୍ମା ଗାନ୍ଧୀଙ୍କ ଫୋଟୋ ରଖି ତଳେ ଅନଶନରେ ବସିଥିଲେ। ପରେ ଅଧ୍ୟକ୍ଷ ହରିବନ୍ଧୁ ମେହେର, ବିଡ଼ିଓ ପୂର୍ଣ୍ଣାନନ୍ଦ ପୁଟେଲ ହେର୍ଣ୍ଣାଙ୍କ ସହ ଆଲୋଚନା କରିଥିଲେ। ବୈଠକରେ ଉପସ୍ଥିତ କଣ୍ଟାବାଞ୍ଜି ବିଧାୟକ ସନ୍ତୋଷ ସିଂ ସାଲୁଜାଙ୍କ ହସ୍ତକ୍ଷେପ ପରେ ସେ ଅନଶନରୁ ଉଠି ନିଜ ଆସନରେ ବସିଥିଲେ। ଗୃହ ସ୍ବଭାବିକ ହେବା ପରେ ଶିକ୍ଷା, ଉଦ୍ୟାନ, କୃଷି, ପ୍ରାଣୀସମ୍ପଦ, ଯୋଗାଣ, ବିଦ୍ୟୁତ୍ ବିଭାଗ ଅଧିକାରୀମାନେ ଉପସ୍ଥିତ ରହି ନିଜ ବିଭାଗର ଯୋଜନା ସମ୍ପର୍କରେ ଗୃହକୁ ଅବଗତ କରିଥିଲେ। ଆଲୋଚନାରେ ମୁରିବାହାଲ ପଞ୍ଚାୟତ ସରପଞ୍ଚ ବିଶ୍ୱବିହାରୀ ଯୋଶୀ ପଞ୍ଚାୟତର ନିଜସ୍ବ କାର୍ଯାଳୟ ନ ଥିବା ବିଷୟ ସଭାର ଦୃଷ୍ଟି ଆକର୍ଷଣ କରିଥିଲେ। ଏ ନେଇ ଏକ ପ୍ରସ୍ତାବ ଗୃହୀତ କରି ଜ଼ିଲାପାଳଙ୍କ ଦୃଷ୍ଟି ଆକର୍ଷଣ କରିବାକୁ ଅନୁରୋଧ କରିଥିଲେ। ଗ୍ରାମ୍ୟ ଜଳ ଯୋଗାଣ ପରିମଳ ବିଭାଗ ସହକାରୀ ଯନ୍ତ୍ରୀ ସରୋଜ ସେଟ ବ୍ଲକରେ କେନ୍ଦ୍ର ସରକାର ଯୋଜନାରେ ଘର ଘର ନଳ, ଘର ଘର ଜଳ ଯୋଜନାରେ ୨୦ ଗ୍ରାମରେ ଓଭରହେଡ ଟ୍ୟାଙ୍କ ନିର୍ମାଣ କରା ଯାଉଛି ବୋଲି ତଥ୍ୟ ଦେଇଥିଲେ। ଉକ୍ତ କାର୍ଯ୍ୟକୁ ସଠିକ ଏବଂ ସମୟରେ ସାରିବା ପାଇଁ ଏମ୍ପି ପ୍ରୀତିନିଧି ଶ୍ରୀବତ୍ସ ବେହେରା ପରାମର୍ଶ ଦେଇଥିଲେ। ବିଡିଓ ପୁଟେଲ ବିଭିନ୍ନ ବିଭାଗର ସମସ୍ୟା ଉପରେ ଉତ୍ତର ରଖିଥିଲେ। ବୈଠକରେ ଅତିରିକ୍ତ ସହକାରୀ ଯନ୍ତ୍ରୀ ଅବିନାଶ ମୋଡି, ଜିଲା ପରିଷଦ ସଭ୍ୟ ଗୋପୀନାଥ ପାଣିଗ୍ରାହୀ, ସରପଞ୍ଚ କାଳିଆ ସରାଫ, ସବିତା ବିଭାର, ରାମଦାସ ମହାକୁର, ସମିତି ସଭ୍ୟ ସନ୍ୟାସୀ ପୁଟେଲ, ଭୀମ ବାଗ ଆଲୋଚନାରେ ଭାଗ ନେଇଥିଲେ।