ବାଲେଶ୍ୱର ଅଫିସ, ୮।୭: ପିଲାମାନେ ବଡ଼ ହେଲେ ବୃଦ୍ଧାବସ୍ଥାରେ ବାପା ମା’ଙ୍କ ସାହାରା ହେବେ ବୋଲି ଭାବିଥାନ୍ତି। ହେଲେ ଆଜିକାଲି ପୁଅ ବୋହୂ ସେମାନଙ୍କ ଉପରେ ନିର୍ଯାତନା କରୁଥିବା ଦେଖିବାକୁ ମିଳିଛି। କିଛି ଏଭଳି ଦୃଶ୍ୟ ଦେଖିବାକୁ ମିଳିଛି ବାଲେଶ୍ବର ଜିଲା ବାଲିଆପାଳ ଥାନା ଅନ୍ତର୍ଗତ ଦେଉଳା ଗ୍ରାମ ପଞ୍ଚାୟତର ବାସୁଦେବପୁର ଗ୍ରାମରେ। ଉକ୍ତ ଗ୍ରାମର ସୁଶୀଳା ବିଶ୍ବାଳ, ସ୍ବାମୀ ଉମାକାନ୍ତ ବିଶ୍ବାଳ ପୁଅ ବୋହୂଙ୍କ ନାଁରେ ନିର୍ଯାତନା ଅଭିଯୋଗ ଆଣିଛନ୍ତି। ବାର୍ଦ୍ଧକ୍ୟ ଅବସ୍ଥାରେ କେହି ପୁଅ ଓ ବୋହୂ ତାଙ୍କର ଯତ୍ନ ନେଉ ନ ଥିବା ବେଳେ ନାନାପ୍ରକାର ମାନସିକ ନିର୍ଯାତନା ଓ ମାଡ଼ମାରୁଥିବା ନେଇ ସୁଶୀଳା ବାଲିଆପାଳ ଥାନାରେ ଏକ ଲିଖିତ ଅଭିଯୋଗ କରିଛନ୍ତି। ସୂଚନାଯୋଗ୍ୟ, ଉକ୍ତ ବୃଦ୍ଧ ଦମ୍ପତିଙ୍କ ୨ପୁଅ। ବାପା ଉମାକାନ୍ତ ବାଡ଼ିରେ ଥିବା ଗଛରୁ ପଇଡ଼ ବିଛାଉଥିବା ସମୟରେ ବଡ଼ ପୁଅ ଓ ବୋହୂ ତାଙ୍କୁ ମାଡ଼ ମାରିଥିବା ଅଭିଯୋଗ କରିଛନ୍ତି ମା’ ସୁଶୀଳା। ବାପା ଓ ମା’ଙ୍କୁ ନେଇ ବଡ଼ ପୁଅ ଓ ସାନ ପୁଅ ଭିତରେ ବହୁ ଟଣାଓଟରା ଥିବା ବେଳେ ତାଙ୍କୁ ଘରୁ ତଡ଼ିବାକୁ ସେମାନେ ଉଦ୍ୟମ କରୁଛନ୍ତି ବୋଲି ସୁଶୀଳା କହିଛନ୍ତି। ତେବେ ପୁଅ ବୋହୂଙ୍କ ଦାଉରୁ ରକ୍ଷା ପାଇବା ସହ ସେମାନଙ୍କର ସୁରକ୍ଷା ବ୍ୟବସ୍ଥା ଲାଗି ସୁଶୀଳା ଓ ଉମାକାନ୍ତ ବାଲିଆପାଳ ଥାନାରେ ଦ୍ୱାରସ୍ଥ ହୋଇଛନ୍ତି। ଅନ୍ୟପଟେ ବୃଦ୍ଧାବସ୍ଥାରେ ବାପା ମା’ଙ୍କ ପ୍ରତି ୨ପୁଅଙ୍କର ଏଭଳି ବ୍ୟବହାର ସମାଜ ପାଇଁ ଏକ ନିନ୍ଦନୀୟ।