ଚାନ୍ଦବାଲି,୨୨ା୮(ଡିି.ଏନ୍.ଏ.) : ଭଦ୍ରକ ଜିଲା ଚାନ୍ଦବାଲି ଥାନା ପଣସପଡ଼ା ଗାଁରେ ବଧୂହତ୍ୟା ଅଭିଯୋଗରେ ଶାଶୁ, ଶ୍ୱଶୁର ଓ ନଣନ୍ଦେଇଙ୍କୁ ପୋଲିସ୍ ଅଟକ ରଖି ପଚରାଉଚରା କରୁଥିବା ବେଳେ ଦିଅର ଫେରାର ହୋଇଯାଇଛନ୍ତି।
ସୂଚନା ଅନୁଯାୟୀ, ବାଂଶଡ଼ା ଥାନା ଅନ୍ତର୍ଗତ ତୋଟାପଡ଼ା ପଞ୍ଚାୟତର ମାଣିପୁର ନୂଆସାହି ଗାଁର ବୁଦ୍ଧଦେବ ନାୟକଙ୍କ ଝିଅ ସୁଜାତା ଜୁଲାଇ ୨୦୧୯ରେ ପଣସପଡ଼ା ପଞ୍ଚାୟତର ହରିହର ମହାନ୍ତିଙ୍କ ପୁଅ ଶରତଙ୍କୁ ବିବାହ କରିଥିଲେ। ଶରତ ବିଦେଶରେ ଏକ କମ୍ପାନୀରେ କାମ କରନ୍ତି। ବିବାହର କିଛିଦିନ ପରେ ଶରତ ବିଦେଶ ଚାଲି ଯାଇଥିଲେ। ବିବାହ ପରେ ଅଧିକ ଯୌତୁକ ଦାବିରେ ଶାଶୁଘର ଲୋକେ ସୁଜାତାଙ୍କୁ ମାନସିକ ଓ ଶାରୀରିକ ନିର୍ଯାତନା ଦେଉଥିଲେ। ସ୍ବାମୀଙ୍କ ଅନୁପସ୍ଥିତରେ ଦିଅର ଓ ନଣନ୍ଦେଇ ଶାରୀରିକ ସମ୍ପର୍କ ରଖିବାକୁ ସୁଜାତାଙ୍କୁ ବାଧ୍ୟ କରିବା କଥା ବାପଘର ଲୋକ ଅଭିଯୋଗ କରିଛନ୍ତି। ଶନିବାର ସକାଳେ ନିଜ ଶୋଇବା ଘର ଫ୍ୟାନ୍ରେ ଏକ ରଶିରେ ସୁଜାତାଙ୍କ ମୃତଦେହ ଝୁଲୁଥିବାର ବାପଘର ଲୋକ ଖବର ପାଇଥିଲେ।
ତେବେ ଅଧିକ ଯୌତୁକ ଦାବି ଓ ସ୍ବାମୀଙ୍କ ଅନୁପସ୍ଥିତିରେ ଶାରୀରିକ ସମ୍ପର୍କରେ ଅରାଜି ହେବାରୁ ସୁଜାତାଙ୍କୁ ଶାଶୁଘର ଲୋକେ ମାରି ଝୁଲାଇ ଦେଇଛନ୍ତି ବୋଲି ମୃତ ସୁଜାତାଙ୍କ ପରିବାର ପକ୍ଷରୁ ଚାନ୍ଦବାଲି ଥାନାରେ ଅଭିଯୋଗ ହୋଇଛି। ଖବର ପାଇ ଚାନ୍ଦବାଲି ପୋଲିସ ଘଟଣାସ୍ଥଳରେ ପହଞ୍ଚି ମାଜିଷ୍ଟ୍ରେଟଙ୍କ ଉପସ୍ଥିତିରେ ମୃତଦେହ ଜବତ କରିଥିବା ବେଳେ ଶାଶୁ ଜାନକୀ ମହାନ୍ତି, ଶ୍ୱଶୁର ହରିହର ମହାନ୍ତି ଓ ନଣନ୍ଦେଇ ବସନ୍ତ ନାୟକଙ୍କୁ ଅଟକ ରଖି ପଚରା ଉଚୁରା କରିଛି। ଦିଅର କାଳିଆ ମହାନ୍ତି ଫେରାର ହୋଇଛନ୍ତି। ଭଦ୍ରକରୁ ଫରେନ୍ସିକ୍ ଦଳ ଆସି ପଣସପଡ଼ାରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି।