ପୁରୀ,୧୬ା୬(ଅଜିତ୍ କୁମାର ମହାନ୍ତି)ସନାତନ ହିନ୍ଦୁ ଧର୍ମରେ ଜଗଦ୍ଗୁରୁ ଶଙ୍କରାଚାର୍ଯ୍ୟଙ୍କ ସ୍ଥାନ ସର୍ବୋଚ୍ଚ। ଚାରିଗୋଟି ପୀଠ ମଧ୍ୟରୁ ପୁରୀର ଗୋବର୍ଦ୍ଧନ ପୀଠ ଅନ୍ୟତମ। ଆଦି ଶଙ୍କରଙ୍କ ପରେ ତାଙ୍କର ଶିଷ୍ୟମାନେ ଗୋବର୍ଦ୍ଧନ ପୀଠରେ ଶଙ୍କରାଚାର୍ଯ୍ୟ ଭାବରେ ଦାୟିତ୍ୱ ତୁଲାଇ ଆସୁଛନ୍ତି। ବର୍ତ୍ତମାନ ଜଗଦ୍ଗୁରୁ ଶଙ୍କରାଚାଯର୍ର୍ୟ ସ୍ବାମୀ ନିଶ୍ଚଳାନନ୍ଦ ସରସ୍ବତୀ ମହାରାଜ ପୁରୀ ଗୋବର୍ଦ୍ଧନ ପୀଠର ୧୪୫ତମ ଶଙ୍କରାଚାର୍ଯ୍ୟ ଅଟନ୍ତି। ତାଙ୍କ ପୂର୍ବରୁ ଯେଉଁ ଶଙ୍କରାଚାର୍ଯ୍ୟମାନେ ଥିଲେ ସେମାନଙ୍କ ସ୍ବର୍ଗବାସ ପରେ ମଠ ପଛପାର୍ଶ୍ୱରେ ଥିବା ସ୍ଥାନରେ ସେମାନଙ୍କୁ ସମାଧି ଦିଆଯାଇଛି। ତେବେ କାଳକ୍ରମେ ମଠର ଜାଗାକୁ ଅସାଧୁ ଉପାୟରେ ଅନେକ ବ୍ୟକ୍ତି ମାଡ଼ି ବସିଛନ୍ତି। ଏପରି କି ଏହା ଐତିହ୍ୟ କୀର୍ତ୍ତିରାଜି ହୋଇଥିଲେ ସୁଦ୍ଧା ଏହାର ସଂରକ୍ଷଣ ନେଇ ପୂର୍ବ ସରକାର କୌଣସି ପଦକ୍ଷେପ ନେଇନାହାନ୍ତି। ଏବେ ମଠର ପଛପାର୍ଶ୍ୱ ସାତସାନ ଲେନ୍କୁ ଲାଗି ରହିଥିବା ପୂର୍ବତନ ଶଙ୍କରାଚାର୍ଯ୍ୟ ଏବଂ ସାଧୁସନ୍ଥଙ୍କ କିଛି ସମାଧିକୁ ଜଣେ ବ୍ୟକ୍ତି ଭାଙ୍ଗି ଘର ନିର୍ମାଣ କରୁଥିବା ନେଇ ଅଭିଯୋଗ ହୋଇଛି। ଅପରକ୍ଷରେ ଘର ନିର୍ମାଣ କରୁଥିବା ବ୍ୟକ୍ତି ଆପୋସ ବୁଝାମଣାରେ ମଠ ଜାଗା ଛାଡ଼ିଦେବାକୁ ପ୍ରସ୍ତୁତ ବୋଲି କହିଛନ୍ତି।
ଏନେଇ ଗୋବର୍ଦ୍ଧନ ମଠ କାର୍ଯ୍ୟାଳୟ ସମ୍ପାଦକ ଶ୍ରୁୟସ ପ୍ରଶାନ୍ତ ଏବଂ ମଠର ଲୋକ ସମ୍ପର୍କ ଅଧିକାରୀ ଦେବାଶିଷ ମିଶ୍ର ସୂଚନା ଦେଇ କହିଛନ୍ତି, ମଠର ପଛପାର୍ଶ୍ୱରେ କିଛି ଦିନ ହେବ ଜଣେ ବ୍ୟକ୍ତି ତାଙ୍କର ପୁରୁଣାଘରକୁ ଭାଙ୍ଗି ନୂତନ ନିର୍ମାଣ କାର୍ଯ୍ୟ ଆରମ୍ଭ କରିଛନ୍ତି। ତେବେ ସେ ତାଙ୍କ ଘର ନିର୍ମାଣ ସମୟରେ ମଠ ପରିସରରେ ଥିବା ପୂବ ଶଙ୍କରାଚାର୍ଯ୍ୟଙ୍କ କିଛି ସମାଧିକୁ ଭାଙ୍ଗି ତାହା ଉପରେ ନିର୍ମାଣ କାର୍ଯ୍ୟ କରୁଛନ୍ତି। ଏହା ଜାଣିବା ପରେ ଆଲୋଚନା ନିମନ୍ତେ ମଠ ପରିଚାଳନା କମିଟି ପକ୍ଷରୁ ଉକ୍ତ ବ୍ୟକ୍ତିଙ୍କୁ ବାରମ୍ବାର ଡାକିବା ପରେ ମଧ୍ୟ ବ୍ୟକ୍ତିଜଣଙ୍କ ଏସମ୍ପର୍କରେ ଆଲୋଚନା କଲେ ନାହିଁ। ଫଳରେ ଶୁକ୍ରବାର ମଠପକ୍ଷରୁ ଆରକ୍ଷୀ ଅଧୀକ୍ଷକ ଓ ଜିଲା ପ୍ରଶାସନକୁ ଲିଖିତ ଆକାରରେ ଜଣାଯାଇଥିଲା। ପ୍ରଶାସନକୁ ଜଣାଇବା ପରେ ଶନିବାର ପୋଲିସ, ଉପଜିଲାପାଳ, ତହସିଲଦାର ଘଟଣାସ୍ଥଳକୁ ଆସି ସମସ୍ତ ଘଟଣା ଦେଖି ଅନୁଧ୍ୟାନ କରିବା ସହ ଘର ନିର୍ମାଣ କରୁଥିବା ବ୍ୟକ୍ତିଙ୍କ ସହ ଆଲୋଚନା କରିଛନ୍ତି। ଏପରିକି ଜିଲାପାଳ ମଧ୍ୟ ଉଭୟ ମଠ କର୍ତ୍ତୃପକ୍ଷ ଏବଂ ଘର ନିର୍ମାଣ କରୁଥିବା ବ୍ୟକ୍ତିଙ୍କୁ ଆଲୋଚନା ପାଇଁ ଡକାଇଥିବା ମିଶ୍ର କହିଛନ୍ତି। ଅପରପକ୍ଷରେ ଘର ନିର୍ମାଣ କରୁଥିବା ବିଶ୍ୱମ୍ଭର ସାହୁ କହିଛନ୍ତି, ଆମେ ଏକ ଘର କିଣିଥିଲୁ। ବର୍ତ୍ତମାନ ସେହି ଘରକୁ ଭାଙ୍ଗି ନୂତନ ଭାବରେ ଘର ନିର୍ମାଣ କରୁଛୁ। ନିର୍ମାଣ କରିବା ସମୟରେ ସେଠାରେ କିଛି ସମାଧି ରହିଥିବା ଗୋବର୍ଦ୍ଧନ ମଠ ପକ୍ଷରୁ ଜାଣିବାକୁ ପାଇଛୁ। ତେବେ ଆପୋସ ବୁଝାମଣାରେ ଆମେ ମଠର ଯେତିକି ଜାଗା ତାହା ଛାଡ଼ି ଦେବୁ ଏବଂ ଏଥିରେ କୌଣସି ଆପତ୍ତି ନ ଥିବା ସାହୁ କହିଛନ୍ତି।