ସୋନପୁର,୩୦।୧୨(ନି.ପ୍ର.): ସୁବର୍ଣ୍ଣପୁର ଜିଲା ମୁଖ୍ୟ ଚିକିତ୍ସାଳୟରେ ଶିଶୁପୁତ୍ର ବଦଳ କରାଯାଇଥିବା ବୁଧବାର ଅଭିଯୋଗ ହୋଇଛି। ଘଟଣାର ୫ ଦିନ ପରେ ଏ ନେଇ ଉଲୁଣ୍ଡା ଥାନା ଗଣ୍ଡପାଲିର ବିଶିକେଶନ ଝାଙ୍କର ସୋନପୁର ଥାନାରେ ଅଭିଯୋଗ କରିଛନ୍ତି। ପୋଲିସ ହସ୍ପିଟାଲକୁ ଯାଇ ଅଭିଯୋଗର ସତ୍ୟତା ଅନୁଧ୍ୟାନ କରୁଛି। ଅପରପକ୍ଷରେ ବିଶିକେଶନଙ୍କ ସ୍ତ୍ରୀ ବନିତାଙ୍କ ଅସ୍ତ୍ରୋପଚାର ପରେ ତାଙ୍କ ଗର୍ଭରୁ ଗତ ୨୪ ତାରିଖ ମଧ୍ୟାହ୍ନରେ ଏକ ଶିଶୁକନ୍ୟା ଜନ୍ମ ହୋଇଥିବା ହସ୍ପିଟାଲ ରେକର୍ଡରୁ ଜଣାପଡିଛି। ବନିତା ଶିଶୁକନ୍ୟାଙ୍କ ସହିତ ଏବେ ବି ଚିକିତ୍ସାଧୀନ ଅଛନ୍ତି। ତେବେ ନବଜାତକଙ୍କ ବାପା ବିଶିକେଶନ ଅଭିଯୋଗ କରିଛନ୍ତି ଯେ, ଅସ୍ତ୍ରୋପଚାର ପରେ ଷ୍ଟାଫନର୍ସ ତାଙ୍କୁ କହିଥିଲେ ତୁମର ଏକ ପୁତ୍ରସନ୍ତାନ ଜନ୍ମ ହୋଇଛି। କିନ୍ତୁ ଅଧାଘଣ୍ଟା ପରେ ଶିଶୁକନ୍ୟା ଜନ୍ମ ହୋଇଥିବା କହିଥିଲେ। ତେଣୁ ତାଙ୍କର ଶିଶୁ ପୁତ୍ରକୁ ବଦଳ କରାଯାଇଛି ଓ ଏଥିରେ ହସ୍ପିଟାଲ କର୍ତ୍ତୃପକ୍ଷ ସାମିଲ ଥିବା ସେ ଅଭିଯୋଗ କରିଛନ୍ତି। ଏ ସମ୍ପର୍କରେ ଭାରପ୍ରାପ୍ତ ସିଡିଏମ୍ଓ ଡାକ୍ତର ରମେଶ ସ୍ବାଇଁଙ୍କୁ ପଚରାଯିବାରେ ସେ କହିଛନ୍ତି, ଆମ ନିକଟରେ କୌଣସି ଅଭିଯୋଗ ହୋଇନି। ଅଭିଯୋଗ ହେଲେ ତଦନ୍ତ କରାଯିବ ବୋଲି ସେ କହିଥିଲେ। ଅନ୍ୟପକ୍ଷେ ସୋନପୁର ଆଇଆଇସି ନିରଞ୍ଜନ ଦାସ କୁହନ୍ତି ତଦନ୍ତ ଜାରି ରହିଛି। ଘଟଣା ଦିନ ହସ୍ପିଟାଲରେ ୨ଟି କନ୍ୟାସନ୍ତାନ ଜନ୍ମ ହୋଇଥିବା କାଗଜପତ୍ର ଦେଖିବା ପରେ ଜଣାପଡିଛି।
